1 Se anɛ e sa kaa waa hi yayami pee kɛ sa konɛ Mawu nɛ hi wɔ mɔbɔ nae nɛ e kɛ hi wɔ kee daa kɛ daa lo?

2,3 E sɛ kulaa, ejakaa kɛ je benɛ wa plɛ Kristo se nyɛɛli nɛ a baptisi wɔ nɛ wa pee Kristo nihi kɛ gu e gbenɔ ɔ nɔ ɔ, a kplɔ yayami he wami ɔ ngɛ wa he. 4 Kɛ gu wa baptisimi ɔ nɔ ɔ, a pu wa yayami peemi su ɔ kɛ Yesu benɛ e gbo ɔ, nɛ benɛ Tsɛ Mawu tle lɛ si ngɛ e anunyami he wami ɔ nya a, e ha wɔ hu e nyakpɛ wami he ɔ.

5 Ejakaa waa kɛ lɛ pee kake, lɔ ɔ he je ɔ, waa kɛ lɛ gbo benɛ e gbo ɔ, nɛ waa kɛ lɛ maa hi wami he ɔ mi, nɛ wa maa te si kaa bɔ nɛ lɛ hu e te si ɔ. 6 A sɛu yayami nɔ́ ɔmɛ nɛ wa suɔ ɔ kɛ piɛ e he, nɛ a je wɔ kɛ je yayami nyɔguɛ yemi ɔ sisi, ejakaa a ku nɔ́ nɛ ngɛ wa mi nɛ haa wa peeɔ yayami ɔ dugudugu. 7 Ke wa gbo ɔ, yayami be wa nɔ he wami hu. 8 Nɛ si abɔ nɛ wa yayami suɔmi su ɔ gbo kɛ Kristo ɔ, wa heɔ yeɔ kaa waa kɛ lɛ tsuo ma na wami he ɔ. 9 Kristo te si kɛ je gbeje nɛ e be gboe hu kɔkɔɔkɔ. Gbenɔ be e nɔ he wami ko hu. 10 E gbo si kake kɛ ha wɔ tsuo nɛ e kɛ gbe yayami he wami. Amlɔ nɛ ɔ, e kɛ Mawu ngɛ huɛ bɔmi mi kɛ yaa neneene. 11 Lɔ ɔ he je ɔ, waa bu wa yayami peemi su ɔ kaa e gbo, nɛ e be hae nɛ wa maa pee yayami hu. Waa hi hɛ ngmle kɛ gu wa Nutsɔ Yesu Kristo nɔ, nɛ waa pee klaalo kɛ ha Mawu.

12 Lɔ ɔ he je ɔ, nyɛ ko ha yayami he blɔ nɛ e ye matsɛ ngɛ nyɛ nɔ hu, se mohu nyɛ si yayami akɔnɔ ni ɔmɛ a se. 13 Nɛ nyɛ ko ngɔ nyɛ nɔmlɔ tso ɔ he ko kɛ hi yayami pee hu, se mohu nyɛɛ ngɔ nyɛ he kɛ ha Mawu kulaa kaa nihi nɛ a tle mɛ si kɛ je gbeje, nɛ nyɛɛ pee Mawu dɛ mi níhi nɛ e kɛ nyɛ ma tsu e ni tsumi kpakpahi. 14 Amlɔ nɛ ɔ, yayami be nyɛ nɔ matsɛ yee hu, ejakaa a pine nyɛ kɛ je mlaa a nɔ yemi sisi, he nɛ yayami na nyɛ he blɔ ngɛ nɛ e ngɔ nyɛ nyɔguɛ ɔ; nɛ piɔ ɔ, nyɛ ye nyɛ he ngɛ Mawu dloomi kɛ mɔbɔ nami nya.

15 Akɛnɛ a kpɔ wɔ kɛ je mlaa a sisi kɛ ba Mawu dloomi ɔ mi ɔ, anɛ lɔ ɔ tsɔɔ kaa waa ya nɔ nɛ waa pee yayami nɛ e ko gba wa nya lo? Dabi!

16 Anɛ nyɛ li kaa nyɛ ma nyɛ hla nyɛ nitsɛmɛ nyɛ Nutsɔ? Nyɛ ma nyɛ hla yayami, nɛ e kɛ gbenɔ baa a, aloo tue bumi, nɛ e kɛ bemi yemi baa a. Nɛ nɔ nɛ nyɛ ngɔ nyɛ he kɛ ha a, lɛ nɛ e maa pee nyɛ Nutsɔ, nɛ nyɛ maa pee e nyɔguɛhi. 17 Se nyɛɛ na Mawu si, ejakaa nyɛ ngɔ nyɛ he kɛ ha yayami nɛ e ye nyɛ nɔ matsɛ be ko nɛ be ɔ mi. Se amlɔ nɛ ɔ, nyɛ bu Mawu anɔkuale tsɔɔmi ɔ tue kɛ nyɛ tsui kulaa. 18 Jehanɛ ɔ, nyɛ ye nyɛ he, ejakaa a kpɔ nyɛ kɛ je yayami nyɔguɛ yemi ɔ sisi kɛ ba nyɛ Nutsɔ he nɛ ji Mawu dami ɔ mi.

19 I kɛ nyɔguɛhi kɛ nutsɔhi tsɔɔ nyɛ níhi a nya, ejakaa e ma ha nɛ nyɛɛ na nɔ́ nɛ i ngɛ hlae ma tsɔɔ nyɛ ɔ nya. Amlɔ nɛ ɔ, nyɛɛ pee nyɛ he nyɔguɛhi kɛ ha níhi nɛ da kɛ níhi nɛ ngɛ klɔuklɔu kaa bɔ nɛ kekle ɔ, nyɛ pee nyɛ he nyɔguɛhi kɛ ha yayami tsuaa yayami ɔ.

20 Benɛ yayami ye nyɛ nɔ matsɛ ɔ, nyɛ yi kpakpa peemi he kɔmɔ. 21 Anɛ nyɛ wo yiblii kpakpa ko kɛ je yayami peemi mi lo? Dabi, nyɛ wui yiblii kpakpa ko, nɛ amlɔ nɛ ɔ, ke nyɛ susu níhi nɛ nyɛ pee ɔmɛ a he ɔ, a ji zo kɛ ha nyɛ, ejakaa gbenɔ ji jamɛ a yayami ni ɔmɛ a he se nami. 22 Se amlɔ nɛ ɔ nɛ a kpɔ nyɛ kɛ je yayami nɔ yemi sisi, nɛ a pee nyɛ Mawu nyɔguɛhi ɔ, e he se nami ji klɔuklɔu peemi kɛ neneene wami nami. 23 Ejakaa yayami he hiɔwo ɔ gbenɔ i. Se Mawu dloomi nɔ́ke nɔ ji neneene wami nɛ a naa kɛ guɔ Kristo Yesu wa Nutsɔ ɔ nɔ.