1 Anyɛmimɛ mlaa leli, suɔli ngɛ Kristo mi, anɛ nyɛ li kaa ke adesa gbo ɔ, mlaa ko be e nɔ he wami hu lo? 2 Wa naa kaa ke yo gba a, si abɔ nɛ e huno ɔ ngɛ je mi ɔ, mlaa fi lɛ kɛ pɛtɛ e huno ɔ he; se ke nyumu ɔ gbo ɔ, lɛɛ gbami mlaa a nui lɛ hu. 3 Nɛ e ngɛ he blɔ nɛ e gbaa nyumu kpa ke lɛ nitsɛ e suɔ. Se ke e huno ɔ gbo we nɛ e ya gba nyumu kpa a, lɛɛ e dɛ.

4 Anyɛmimɛ, ja a nɔuu nɛ Yuda bi ɔmɛ a mlaa amɛ ji nyɛ hunohi kɛ nyɛ nutsɔhi, ngɛ be nɛ be ɔ mi. Se akɛnɛ nyɛɛ kɛ Yesu gbo ngɛ sɛumi tso ɔ nɔ he je ɔ, a po nyɛɛ kɛ mlaa a kpɛti, nɛ e be nyɛ nɔ he wami ko hu. Nɛ nyɛ kpale kɛ ba wami mi ekohu benɛ a tle Kristo si kɛ je gbeje ɔ, nɛ nyɛ plɛ ni hehi. Nɛ jehanɛ ɔ, nyɛ plɛ nɔ nɛ a tle lɛ si kɛ je gbeje ɔ e nihi, konɛ nyɛɛ wo yiblii kpakpahi kɛ ha Mawu. 5 Benɛ yayami ngɛ nyɛ nɔ matsɛ yee ɔ, akɔnɔ níhi nɛ Mawu sume ɔ, a se nɛ nyɛ dii, nɛ a woɔ gbenɔ yiblii kɛ haa nyɛ. 6 Se amlɔ nɛ ɔ, a kpɔ nyɛ kɛ je mlaa a dɛ mi, ejakaa nyɛ gbo benɛ nyɛ ngɛ mlaa a nɔ yemi sisi ɔ, nɛ jehanɛ ɔ nyɛ ma nyɛ sɔmɔ Mawu kɛ nyɛ tsui kɛ juɛmi kulaa kɛ mumi he amlɔ nɛ ɔ nɛ nyɛ ngmɛɛ mlaa momo ɔmɛ a he ɔ.

7 Anɛ i ngɛ tsɔɔe kaa Mawu mlaa nɛ ɔmɛ a ji yayami lo? Dabi! Mlaa a pi yayami, se mohu e tsɔɔ mi yayami. Ejakaa jinɛ i be lee kaa akɔnɔ níhi nɛ ngɛ ye tsui mi ɔ, a ji yayami, ke mlaa de we mi ke, "O hɛ ko kɔ níhi a nɔ" ɔ. 8 Se yayami na he blɔ kɛ gu mlaa nɛ ɔ nɔ nɛ e tsɛɔ akɔnɔ níhi kɛ woɔ ye mi, ejakaa ke mlaa ko be nɛ a ma tɔ nɔ ɔ, yayami ko hu be si hie.

9 Lɔ ɔ he je nɛ i hi si saminya be mi nɛ i nui mlaa a sisi ɔ nɛ. Se benɛ i na anɔkuale ɔ, i nu sisi kaa i tɔ mlaa nɛ i pee yayami, nɛ i ngɛ kɛ ha gbenɔ. 10 I na kaa mlaa kpakpa a nɛ a to kaa e kpaka mi kɛ ya wami mi ɔ, e tsɛ gbenɔ mohu kɛ ha mi. 11 Yayami sisi mi, ejakaa e gu Mawu mlaa kpakpa amɛ a nɔ kɛ bu mi gbenɔ fɔ. 12 Se jinɛ mlaa a hi nɛ mu ko be he.

13 Se kɛ e ba kɛɛ? Anɛ tsa pi mlaa nɛ ha ye hɛ mi kpata a lo? Kɛ e pee kɛ hí kɛɛ mɔ? Lɔ ɔ ji kaa yayami nɛ ji abosiami nɔ́ ɔ, nɛ gu nɔ́ kpakpa a nɔ kɛ kpata ye hɛ mi. Ejakaa e kɛ Mawu mlaa kpakpa amɛ tsu abosiami ni tsumi. 14 Mlaa ji nɔ́ kpakpa, se haomi ɔ je ami mohu ye ngɔ, ejakaa a jua mi nɛ i plɛ yayami nyɔguɛ.

15 Se i nui ye he lo sisi kulaa, ejakaa i suɔ nɛ ma pee nɔ́ nɛ da, se i nyɛ we, nɛ i peeɔ nɔ́ nɛ i sume mohu. 16 Akɛnɛ i peeɔ níhi nɛ sɛ kaa maa pee ɔ, ye he nile deɔ mi ke mlaa amɛ nɛ i gboɔ a nɔ tue ɔ, a hi. 17 Se tsa pi ye he wami nya ni nɛ i ngɛ tsue, ejakaa yayami nɛ ngɛ ye mi nɛ he wa pe mi ɔ nɛ ha nɛ i ngɛ nɔ́ nɛ ɔmɛ tsue.

18 Ngɛ ye yayami su ɔ he je ɔ, i le kaa nɔ́ kpakpa ko be ye mi. Nɛ bɔ fɛɛ bɔ nɛ i bɔ mɔde kɛ ha a, i nyɛ we nɔ́ nɛ da ma pee. 19 Ejakaa i pee we kpakpa nɛ i suɔ kaa ma pee ɔ, se mohu yayami nɛ i sume ɔ, lɔ ɔ mohu nɛ i peeɔ. 20 Lɔ ɔ he je ɔ, ke i peeɔ níhi nɛ i sume ɔ, e tsɔɔ kaa tsa pi ami nitsɛ ye he wami nya ni nɛ i ngɛ pee ɔ; se mohu yayami nɛ wo mi kɔsɔkɔsɔ.

21 Nɔ́ nɛ ngɛ ni tsue ngɛ ye mi ji, ke i ngɛ hlae nɛ ma tsu nɔ́ ko kpakpa a, kɛkɛ yayami mohu ba je mi. 22 I suɔ kaa ma pee Mawu suɔmi nya nɔ́ ngɛ ye su he ɔ nya mohu, 23 se nɔ́ ko ngɛ ye mi nɛ e kɛ ye juɛmi ɔ ngɛ ta hwue, nɛ e ye kunimi nɛ e ha nɛ i pee nyɔguɛ kɛ ha yayami nɛ ngɛ ye mi kɛ sa a. Jinɛ ye juɛmi ji ma pee Mawu sɔmɔlɔ, se loloolo ɔ, yayami mohu ye mi nyɔguɛ. 24 Oo! Ye ni ngɛ mɔbɔ! Mɛnɔ po ma kpɔ mi kɛ je kikɛmɛ a gbenɔ nyɔguɛ yemi nɛ ɔ mi? 25 Se i naa Mawu si kɛ gu wa Nutsɔ Yesu Kristo nɔ, ejakaa e ha nɛ i ye ye he.