1 Ngɛ nɔmlɔ adesa blɔ fa mi ɔ, Abraham ji nɔ nɛ bɔ Yuda bi ɔmɛ a ma a. Anɛ kɛ lɛɛ e susu ngɛ yi wami hemi kɛ gu hemi kɛ yemi nɔ ɔ he kɛɛ? 2 Anɛ e ni tsumi kpakpahi a he je nɛ Mawu bu lɛ bemi ngɛ lo? Ke e ni tsumi kpakpahi a he i jinɛ e ngɛ nɔ́ ko nɛ e maa fia kɛ fɔ nɔ. Se ngɛ Mawu blɔ fa mi ɔ, Abraham be fiami nɔ́ ko kulaa. 3 Ejakaa Ngmami Klɔuklɔu ɔ ye odase ke Abraham he Mawu nɔ ye, nɛ lɔ ɔ he je nɛ Mawu kɛ e yayami ɔmɛ ke lɛ ngɛ nɛ e ngɔ lɛ ke "e yi fɔ" ɔ nɛ.

4 Lɔ ɔ he je ɔ, tsa pi Abraham ni tsumi kpakpa amɛ a he je nɛ a ha lɛ sihi he ngɛ hiɔwe ngɛ ɔ lo? Dabida! Yi wami hemi ɔ, e ji níke nɔ, ejakaa ke tsa pi nɔ́ke nɔ i ɔ, nɔ ko nine be nɔ sue ngɛ ni tsumi kpakpa ko he. 5 A kɛ kee nihi nɛ a tsu we e he ni. Ejakaa Mawu buɔ yayami peelɔ bemi, ke ji e heɔ Kristo nɔ yeɔ kaa e ma he e yi wami.

6 Matsɛ David ye odase ngɛ bua jɔmi nɛ yayami peelɔ naa ke Mawu bu lɛ bemi ɔ he nɛ e de ke, 7 "A gbaa nihi nɛ a ngɔ a tɔmi ɔmɛ kɛ ke mɛ, nɛ a tsi a yayami ɔmɛ a nɔ ɔ. 8 A gbaa nɔ nɛ Nutsɔ ɔ bui e yayami ɔmɛ a he akɔtaa hu."

9 Anɛ enɛ ɔ tsɔɔ kaa a kɛ kikɛmɛ a gbaami nɛ ɔ haa nihi nɛ heɔ Kristo nɔ yeɔ, nɛ a yeɔ Yuda bi ɔmɛ a mlaa amɛ hu a nɔ, aloo a kɛ haa nihi nɛ a yi Yuda bi ɔmɛ a mlaa amɛ a nɔ se a heɔ Kristo nɔ yeɔ lo? Nɛ Abraham hu nɛɛ? Ejakaa wa deɔ ke e nine su gbaami nɛ ɔmɛ a nɔ kɛ gu hemi kɛ yemi nɔ. Anɛ hemi kɛ yemi kɛkɛ aloo e ye Yuda bi ɔmɛ a mlaa amɛ hu a nɔ loko ji a ha lɛ kikɛmɛ a gbaami nɛ ɔmɛ lo?

10 Mɛni be mi nɛ Mawu gbaa Abraham? A gbaa lɛ loko ji e ba plɛ Yuda no nɛ a wo lɛ nyumu mi ngɛ Yuda bi ɔmɛ a kusumi nya.

11 A wui lɛ nyumu mi kɛ ya si be mi nɛ Mawu wo lɛ si kaa e maa gbaa lɛ ngɛ e hemi kɛ yemi ɔ he je, loko a wo lɛ nyumu mi. E nyumu mi womi ɔ ji okadi nɛ tsɔɔ kaa Abraham ngɛ hemi kɛ yemi momo nɛ Mawu ngɔ lɛ nɛ e pee lɛ dalɔ ngɛ e hɛ mi loko ji a wo lɛ nyumu mi ɔ nɛ. Lɔ ɔ he je ɔ, Abraham peeɔ mumi mi tsɛ kɛ ha nihi nɛ heɔ yeɔ nɛ a he a yi wami, nɛ pi Yuda bi ɔmɛ a mlaa amɛ a nɔ nɛ a yeɔ ɔ he je. Enɛ ɔ ha nɛ wa na kaa Mawu peeɔ nihi nɛ a yi Yuda bi ɔmɛ a mlaa amɛ a nɔ se a ngɛ hemi kɛ yemi ɔ dali. 12 Nɛ Abraham nɔuu ji mumi mi tsɛ kɛ ha Yuda bi ɔmɛ nɛ a wo mɛ nyumu mi ɔ hulɔ, nɛ a maa na kɛ gu Abraham nɔ́ kaa tsa pi kikɛmɛ a kusumi nɛ ɔ nɛ heɔ a yi wami. Ejakaa Mawu na Abraham mɔbɔ kɛ gu hemi kɛ yemi kɛkɛ nɔ loko ji a wo lɛ nyumu mi. 13 Enɛ ɔ ha nɛ wa na paa kaa Mawu wo Abraham si kaa e kɛ je ɔ tsuo ma ha lɛ kɛ e nina, pi ngɛ mlaa amɛ a nɔ nɛ e yeɔ ɔ he je, se mohu ngɛ Mawu nɔ nɛ e he ye kaa e maa ye e si womi ɔ nɔ ɔ. 14 Lɔ ɔ he je ɔ, ke nyɛ ngɛ dee ke Mawu gbaami ɔ e kɛ haa nihi nɛ yeɔ mlaa amɛ a nɔ ɔ, lɛɛ nyɛ ngɛ tsɔɔe kaa Mawu si nɛ e wo nihi nɛ heɔ yeɔ ɔ, e ji yaka nɔ́ ko. Kɛkɛ lɛɛ hemi kɛ yemi he be se nami. 15 Anɔkuale ɔ kɛkɛ ji, Mawu mlaa amɛ a nɔ yemi kɛ ha gbaami kɛ yi wami hemi nami ɔ, haa nɛ e naa wa he abofu, ejakaa wa tɔɔ mlaa amɛ a nɔ; se he nɛ mlaa ko be ɔ, tɔmi ko hu be lejɛ ɔ.

16 Lɔ ɔ he je ɔ, Mawu gbaami nɔ́ke nɔ ɔ hia hemi kɛ yemi kɛkɛ. Nɛ wa nine maa su nɔ ke wa ye Yuda bi ɔmɛ a mlaa amɛ a nɔ jio wa yi a nɔ jio. Waa hi hemi kɛ yemi kaa Abraham, nɔ nɛ ji wɔ tsuo wa tsɛ ngɛ hemi kɛ yemi blɔ fa mi ɔ. 17 Enɛ ɔ ji nɔ́ nɛ Ngmami Klɔuklɔu ɔ ngɛ tsɔɔe kaa Mawu pee Abraham mahi kulaa a tsɛ ɔ nɛ. Nɛ Mawu ma he nɔ fɛɛ nɔ nɛ heɔ e nɔ yeɔ kaa Abraham ɔ yi wami ngɛ ma tsuaa ma mi. Kikɛmɛ a si womi ɔ je Tsɛ Mawu dɛ, nɔ nɛ tleɔ ni gbogboehi si, nɛ e tuɔ níhi nɛ maa ba amɛ a he munyu kɛ nɔ mi mami kaa níhi nɛ ngɛ momo ɔ.

18 Lɔ ɔ he je ɔ, benɛ Abraham be hɛ nɔ kami ko kulaa kaa e ma fɔ bi, se Mawu de lɛ ke e ma ha lɛ binyumuyo nɛ ma fɔ bimɛ fuu nɛ e maa bɔ ma agbo ɔ, e he Mawu ye. 19 Akɛnɛ Abraham hemi kɛ yemi se ti ɔ, e hɛwi lɛ kaa e kɛ e yo Sara kulaa bwɔ, ejakaa e ye jeha lafa, nɛ e yo ɔ hu ye jeha nyingmi nɛɛ, lɔ ɔ he je ɔ, a bi fɔmi be be.

20 Abraham yi mi pee we lɛ sikɔsikɔ, se mohu e na hemi kɛ yemi agbo pe sa a, nɛ e je e yi kaa e gbaa lɛ loko ji Mawu si womi ɔ ba mi. 21 Ejakaa e he ye kaa Mawu ma nyɛ ye e si womi ɔ nɔ. 22 Abraham hemi kɛ yemi ɔ he je nɛ Mawu kɛ e he yayami ɔmɛ ke lɛ nɛ e pee lɛ dalɔ ɔ nɛ.

23 Nɛ tsa pi Abraham nɔ kake he je nɛ a ngma ngɛ ke, "A ngɔ lɛ dalɔ ngɛ e hemi kɛ yemi nya" a. 24 Se wɔ hu wa piɛ he, nɛ e ngɛ nɔ mi mae kaa ke wa ye Mawu nɔ nɛ tle Yesu, wa Nutsɔ, si ke je gbeje ɔ si womi ɔmɛ a nɔ ɔ, e ma he wɔ kulaa wa yi wami kaa bɔ nɛ e he Abraham yi wami ɔ. 25 Ejakaa e gbo ngɛ wa yayami ɔmɛ a he nɛ a tle lɛ si kɛ je gbeje ekohu ngɛ wa bemi bumi he.