1 Jehanɛ ɔ, i ngɛ bie ke, anɛ Mawu kua e bimɛ Yuda bi ɔmɛ lo? Dabi! Nyɛ kai kaa ami nitsɛ hu Yuda no nɛ je Abraham mi ji mi, nɛ a fɔ mi kɛ wo Benyamin weku ɔ mi.

2,3 Dabi, Mawu kua we lɛ nitsɛ e nimli nɛ e hla kɛ je sisije ɔ. Anɛ nyɛ kai nɔ́ nɛ Ngmami ɔ de benɛ Gbalɔ Elia po Yuda bi ɔmɛ a nya kɛ ha Mawu ke a gbe gbali ɔmɛ, nɛ a ku e bɔ sami la tɛ ɔmɛ, nɛ lɛ nɔ kake too pɛ ji nɔ nɛ piɛ nɛ suɔ Mawu, nɛ a ngɛ hlae nɛ a gbe lɛ hu ɔ lo?

4 Nɛ nyɛ kai heto nɛ Mawu ha lɛ ɔ lo? Mawu de lɛ ke, "Dabi, tsa pi mo nɔ kake too nɛ piɛ. I ngɛ nimli akpe kpaago ngɛ o se nɛ suɔ mi kɛ sa nɛ a kpla we si kɛ ha we wɔ ko."

5 Ja a nɔuu nɛ e ngɛ mwɔnɛ ɔ. Tsa pi Yuda bi ɔmɛ tsuo nɛ kpale ngɛ Mawu se, se mohu nihi bɔɔ ngɛ, nɛ e hla ngɛ e mɔbɔ nami kɛ e dloomi ɔ nya, nɛ a ma he a yi wami. 6 Lɔ ɔ he je ɔ, ke Mawu dloomi he je i ɔ, lɛɛ tsa pi a himi nɛ a hi ɔ he je i, ejakaa ke a himi he je i ɔ, lɛɛ dloomi ɔ pi dloomi hu.

7 Lɔ ɔ he je ɔ, bɔ nɛ e ngɛ ha ji nɛ ɔ nɛ. Yuda bi ɔmɛ ɔ, a ti nihi babauu a nine sui Mawu mɔbɔ nami ɔ nɛ a ngɛ hlae ɔ nɔ; a ti nihi bɔɔ nɛ Mawu hla a pɛ nɛ a nine su nɔ, se ni nɛmɛ nɛ piɛ ɔ lɛɛ a yu a hɛ ngmɛ. 8 Ngmami ɔ tu nɔ́ nɛ ɔ he munyu ke, Mawu fɔ a nɔ mahe, nɛ e ha nɛ a hɛ ngmɛhi yu nɛ a tuehi tsi bɔ nɛ pee nɛ a ko nu Kristo he munyu ɔ nɛ wa ngɛ fiɛɛ ɔ sisi. Nɛ ja a ji bɔ nɛ e ngɛ kɛ ba si mwɔnɛ ɔ.

9 Matsɛ David hu de ke, "Ha nɛ a nya mi ngma kpakpa kɛ a dloomi ni kpa amɛ nɛ mlɔɔ a hɛ mi nɛ a susu kaa a kɛ Mawu kpɛti ngɛ kpakpa. Ha nɛ nɔ́ kpakpa amɛ a pee tue gblami níhi kɛ ha mɛ nitsɛmɛ nɛ a kpata a hɛ mi. 10 Ha nɛ a hɛ mi nɛ wo diblii nɛ a ko hyɛ nɔ́; nɛ a mi nɛ dɔ kɛ tlomi nɛ jiɔ kɛ ya neneene."

11 Anɛ enɛ ɔ tsɔɔ kaa Mawu ngmɛɛ lɛ nitsɛ e nimli nɛ ji Yuda bi ɔmɛ a he kulaa lo? Dabi! Mawu blɔ nya tomi ɔ ji, e maa ngɔ yi wami hemi ɔ kɛ ha ma je li ɔmɛ bɔ nɛ pee nɛ Yuda bi ɔmɛ a hɛ nɛ dɔ nɛ a je hunga konɛ mɛ nitsɛmɛ a di Mawu yi wami hemi ɔ se. 12 Amlɔ nɛ ɔ ke je ɔ tsuo na ni ngɛ Mawu yi wami hemi nɛ e kɛ ha mɛ ɔ he je, be mi nɛ Yuda bi ɔmɛ lɛɛ a kua yi wami hemi ɔ he pɛtɛmi ɔ, lɛɛ je ɔ ma na jɔɔmi babauu pe enɛ ɔ ke Yuda bi ɔmɛ hu ba Yesu ngɔ ɔ.

13 Kaa bɔ nɛ nyɛ le ɔ, Mawu tsɔ mi nyɛ ma je li ɔmɛ nyɛ ngɔ kaa tsɔlɔ titli ko. I maa munyu nɛ ɔ nɔ mi nɛ i kaiɔ Yuda bi ɔmɛ ngɛ he be fɛɛ be, 14 kaa alinɔ ma nyɛ ha nɛ a di nɔ́ nɛ ma je li ɔmɛ a nine su nɔ ɔ se lo, konɛ a gu nɔ kɛ he a ti ni komɛ a yi wami. 15 Nɛ e maa pee gbeye nɔ́ ke Yuda bi ɔmɛ plɛ Kristo se nyɛɛli, ejakaa benɛ Mawu kua mɛ ɔ, e ngɔ hɛ kɛ fɔ ni kpahi ngɛ je ɔ mi ɔ nɔ nɛ e ma he a yi wami. Lɔ ɔ he je ɔ, e maa pee nyakpɛ sane agbo ke Yuda bi ɔmɛ maa kpale kɛ ba Kristo ngɔ. E ngɛ kaa ni gbogboehi nɛ te si kɛ je gbeje. 16 Si abɔ nɛ Mawu nimli ji Abraham kɛ gbali ɔmɛ ɔ, a bimɛ hu peeɔ Mawu bimɛ. Ejakaa ke tso ɔ sipoku ɔ ngɛ klɔuklɔu ɔ, e kɔni ɔmɛ hu maa pee klɔuklɔu.

17 Se a po tso kɔnihi nɛ ji Yuda bi ɔmɛ a ti ni komɛ nɛ je Abraham mi ɔ kɛ fɔ he nɛ a ngɔ ma je li nɛ je nga mi nu tso nɔ́ ɔ ngɔ ta he. Lɔ ɔ he je ɔ nyɛ hu nyɛ nine su Mawu gbaami nɛ e wo Abraham kɛ e bi ɔmɛ he si ɔ nɔ, nɛ nyɛ ngɛ lɛ nitsɛ e nu tso ɔ mi niye ni ɔ eko nae.

18 Se nyɛɛ hyɛ nɛ hi nɛ nyɛ ko fia kaa a ngɔ nyɛ ngɔ to kɔni ɔmɛ nɛ a po ɔmɛ a nane mi. Nɛ nyɛ kai kaa Mawu tso ɔ he kɔnihi nɛ nyɛ ji amlɔ nɛ ɔ he je nɛ nyɛ he ba se nami ngɛ; nɛ tsa pi tso ɔ sipokuhi ji nyɛ se e kɔnihi kɛkɛ.

19 Eko ɔ, nyɛ ma de ke, "Saminya, a po tso kɔni ɔmɛ bɔ nɛ pee nɛ a je blɔ ha mi, lɔ ɔ he je ɔ, e sa nɛ ma hi bɔ nɛ sa."

20 Nyɛ kai kaa a po tso kɔni ɔmɛ nɛ ji Yuda bi ɔmɛ, ejakaa a he we Mawu nɔ yi, se nyɛɛ lɛɛ nyɛ hemi kɛ yemi he je nɛ a ngɔ nyɛ kɛ to lejɛ ɔ ngɛ. Lɔ ɔ he je ɔ, nyɛ ko fia, se mohu nyɛɛ ba nyɛ he si nɛ nyɛɛ na lɛ si nɛ nyɛɛ hyɛ nɛ hi. 21 Ejakaa ke Mawu na we kɔnihi nɛ ngɛ tso ɔ he kekle ɔ mɔbɔ ɔ, e be nyɛ hu mɔbɔ nae.

22 Nyɛɛ le bɔ nɛ Mawu mi mi jɔ nɛ e sane hu wa kɛ ha. E sane wa ngɛ nihi nɛ gboɔ lɛ tue ɔ a nɔ, se e peeɔ nihi nɛ suɔ lɛ nɛ a heɔ e nɔ yeɔ ɔ kpakpa. Nɛ ke nyɛ hu nyɛ he we lɛ yi ɔ, a maa po nyɛ hu ngɔ sake kɛ fɔ he. 23 Se ke Yuda bi ɔmɛ ngmɛɛ hemi nɛ a he we e nɔ́ yi ɔ he nɛ a kpale kɛ ba e ngɔ ekohu ɔ, e maa ngɔ mɛ kɛ ta tso ɔ he ekohu, ejakaa e ngɛ he wami nɛ e kɛ ma nyɛ pee ja.

24 Ejakaa ke Mawu po nyɛ ngɛ nga mi nu tso he ngɔ ta lɛ nitsɛ e tso kpakpa a he, nɔ́ ko nɛ a pɔɛ peemi ɔ, anɛ nyɛ he we yi kaa e maa ngɔ Yuda bi ɔmɛ ekohu ngɔ ta mɛ nitsɛmɛ a tso ɔ he lo?

25 Mamimɛ, ma suɔ nɛ nyɛɛ le kikɛmɛ a anɔkuale sane nɛ je Mawu ngɔ nɛ ɔ, bɔ nɛ pee nɛ nyɛɛ ba nyɛ he si nɛ nyɛ ko fia. Ee, e ji anɔkuale sane kaa amlɔ nɛ ɔ, Yuda bi ɔmɛ a ti ni komɛ te si kɛ si Manye Munyu ɔ, se enɛ ɔ se be kɛe, ke ma je li ɔmɛ tsuo ba Kristo ngɔ ɔ. 26 Kɛkɛ ɔ a ma he Israel tsuo yi wami. Nyɛ kai nɔ nɛ gbali ɔmɛ de ngɛ enɛ ɔ he ɔ ke, "Kpɔlɔ ko maa te si ngɛ Zion, nɛ lɛ e ma ba je Yuda bi ɔmɛ kɛ je a yayami ɔmɛ a mi. 27 Jamɛ a be ɔ mi nɛ ma ngɔ a he yayami ɔmɛ kɛ ho kaa bɔ nɛ i wo si ɔ."

28 Amlɔ nɛ ɔ, Yuda bi ɔmɛ a ti nihi fuu ji Manye Munyu ɔ he nyɛli, ejakaa a sume Munyu ɔ. Se nyɛ na enɛ ɔ he se, ejakaa e ha nɛ Mawu ngɔ e nike ni ɔmɛ ngɔ ha nyɛ ma je li ɔmɛ. Se kɛ ɔ, Mawu suɔ Yuda bi ɔmɛ ngɛ si nɛ e wo Abraham kɛ Isak kɛ Yakob ɔ he. 29 Nɛ Mawu be e nike ni ɔmɛ kɛ e tsɛmi ɔ se gblae, ejakaa e be si womi ɔ nɔ tɔe. 30 Be nɛ be ɔ, nyɛ bui Mawu tue, se benɛ Yuda bi ɔmɛ kua e nike ni ɔmɛ ɔ, e na nyɛ mohu mɔbɔ ngɛ tue nɛ a bui lɛ ɔ he. 31 Amlɔ nɛ ɔ, Yuda bi ɔmɛ ji tue gboli, se be ko maa ba nɛ a maa na mɛ hu mɔbɔ kaa bɔ nɛ a na nyɛ mɔbɔ ɔ. 32 Ejakaa Mawu ngmɛɛ mɛ tsuo a he kɛ ha tue gbomi, bɔ nɛ pee nɛ e na mɛ tsuo mɔbɔ.

33 Oo, wa Mawu ɔ he ngɛ nyakpɛ! E nile kle nɛ e ji niatsɛ agbo; wa nɛ e kojomi ɔmɛ a sisi, nɛ wa nɛ e blɔ ɔmɛ hu a nya. 34 Ejakaa wa ti mɛnɔ nɛ le Nutsɔ ɔ juɛmi. Nɛ mɛnɔ le ni, bɔ nɛ e maa pee lɛ e ga wolɔ kɛ e kpakalɔ? 35 Nɛ mɛnɔ ma nyɛ ha lɛ nyɔ mi ni bɔ nɛ sa nɛ e ma ha nɛ e pee nɔ́ ko? 36 Ejakaa Mawu dɛ mi pɛ nɛ nɔ́ tsuaa nɔ jee, nɛ e he wami nya nɛ nɔ́ tsuaa nɔ ngɛ ngɛ, nɛ a ngɛ kɛ ha e hɛ mi nyami womi. A ngɔ anunyami kɛ ha lɛ kɛ ya neneene.