1 Nɔ tsuaa nɔ nɛ ba e he si kɛ ha ma nɔ yeli, ejakaa Mawu ji nɔ nɛ to nɔ yemi ɔ. Nɛ nɔ yemi ko be he ko nɛ pi Mawu nɛ to lɛ. 2 Enɛ ɔ he je ɔ, nihi nɛ yi ma nɔ yemi mlaa amɛ a nɔ ɔ, Mawu tue nɛ a ngɛ gboe ɔ nɛ, nɛ a maa gbla a tue. 3 Ejakaa polisi wui kpakpa peeli a he gbeye, se mohu nihi nɛ peeɔ yayami ɔ, mɛ ji nihi nɛ yeɔ lɛ gbeye. Enɛ ɔ he je ɔ, ke o sume nɛ o ye gbeye ɔ, lɛɛ moo ye mlaa amɛ a nɔ, nɛ e maa hi ha mo. 4 Polisi ɔ, Mawu nɛ tsɔ lɛ nɛ e ba ye kɛ bua mo. Se ke o ngɛ yayami pee ɔ, lɛɛ e sa nɛ o ye gbeye, ejakaa e ma ha nɛ a gbla o tue. Ejakaa enɛ ɔ he je nɛ Mawu to lɛ ngɛ. 5 Lɔ ɔ he je ɔ, e sa kaa o ye mlaa amɛ a nɔ, tsa pi ngɛ tue gblami ɔ kɛkɛ he, se mohu e ji nɔ́ ko nɛ sa kaa o pee.

6 Nɛ e sa kaa o wo lapoo hulɔ, ejakaa e sa nɛ a wo ma ni tsuli ɔmɛ hiɔ bɔ nɛ pee nɛ a nyɛ nɛ a tsu Mawu ni tsumi ɔ nɛ a sɔmɔ nyɛ. 7 Nyɛ ha nɔ tsuaa nɔ hiɔwo bɔ nɛ sa lɛ; nyɛɛ wo lapoo ngɛ bua jɔmi mi. Nyɛɛ bu nihi nɛ ngɛ nyɛ nɔ yee ɔ. Nɛ nihi nɛ sa hɛ mi nyami ɔ, nyɛɛ wo a hɛ mi nyami nɛ nyɛɛ bu mɛ. 8 Nyɛɛ wo nyɛ he hiɔhi tsuo, nɛ nyɛ ko hɛɛ nɔ ko hiɔ. Nɛ nyɛ kpɛti suɔmi ɔ se nɛ ko po. Ejakaa nɔ nɛ suɔ e nyɛmi ɔ, e yeɔ Mawu mlaa amɛ tsuo a nɔ. 9 Ejakaa ke o suɔ o nyɛmi kaa bɔ nɛ o suɔ mo nitsɛ o he ɔ, o be suɔe nɛ o ye lɛ awi aloo nɛ o sisi lɛ, aloo o gbe lɛ aloo o ju e nɔ́ ko. Nɛ o be suɔe nɛ o kɛ e yo nɛ bɔ ajuama aloo o hɛ nɛ kɔ e nɔ́ ko nɔ, aloo nɛ o pee nɔ́ kpa ko nɛ Mlaa Nyɔngma amɛ tsɔɔ kaa e hí ɔ. Nɛ Mlaa Nyɔngma amɛ tsuo hɔɔ si ngɛ kake nɛ ɔ mi, kaa o suɔ o nyɛmi kaa bɔ nɛ o suɔ mo nitsɛ o he ɔ. 10 Suɔmi pee we nɔ ko yayami, nɛ lɔ ɔ he je nɛ suɔmi ye Mawu Mlaa amɛ tsuo a nɔ ɔ nɛ. Lɔ ɔ pɛ ji mlaa nɛ he hia mo.

11 Nɔ́ nɛ he je hu nɛ e sa kaa nyɛɛ ba nyɛ je mi nɛ hi ngɛ ji, Nutsɔ ɔ bami be ɔ na wɔ ta. Nyɛɛ te si kɛ je mahe mi, ejakaa wa yi wami hemi be ɔ na wɔ pe kekle be nɛ wa he ye ɔ. 12,13 Nyɔ ɔ be ta, nɛ wa yi wami hemi be ɔ su ta. Lɔ ɔ he je ɔ, nyɛɛ ngmɛɛ diblii mi ni yayahi a tsumi ɔmɛ a he nɛ nyɛɛ wo si himi kpakpa tade ɔ kaa piani bimɛ. Nyɛɛ ba nyɛ je mi bɔ nɛ sa, nɛ nyɛɛ ye anɔkuale ngɛ nɔ́ fɛɛ nɔ mi. Nyɛ ko puɛ nyɛ be ngɛ yakayaka fiɛmi kɛ da demi mi, aloo ngɛ ajuama bɔmi kɛ hɛ kɔmi, aloo pɛ kɛ hunga jemi mi. 14 Se mohu nyɛ bi Nutsɔ Yesu Kristo nɛ e ye kɛ bua nyɛ nɛ nyɛɛ ba nyɛ je mi bɔ nɛ sa, nɛ nyɛ ko di yayami peemi se.