1 I na nyakpɛ nɔ́ agbo kpa ko ngɛ hiɔwe nɛ tsɔɔ níhi nɛ maa ba. I na bɔfohi kpaago nɛ a ngɔ aja kpaago nɛ piɛ ɔ kɛ ha mɛ kaa a wo kɛ ba zugba a nɔ. Nɛ lɔ ɔ ji nɔ́ nɛ a ma kɛ tsu Mawu mi mi fumi ɔ he ni kɛ gbe nya.

2 Jehanɛ ɔ, i na nɔ́ ko kaa wo nɛ ngɛ kaa ahuhuɛ nɛ la ngɛ mi. Nɛ nihi kulaa nɛ ye musu Lohwe ɔ kɛ e amaga kɛ e okadi kɛ yi bɔ ɔ nɔ kunimi ɔ daa si ngɛ wo nɛ ngɛ kaa ahuhuɛ ɔ nɔ. Mɛ tsuo a hɛɛ Mawu saku ɔmɛ 3 nɛ a ngɛ Tobi ɔ la, kɛ Mawu tsɔlɔ Mose la lae ke: "Nutsɔ Mawu Ope, o ni tsumi ɔmɛ kle, nɛ a ngɛ nyakpɛ! Oo Neneene Matsɛ, o blɔ ɔmɛ da, nɛ a ji anɔkuale.

4 Mɛnɔ po nɛ be mo gbeye yee, oo Nutsɔ, nɛ e be o biɛ ɔ hɛ mi nyami woe? Ejakaa mo pɛ nɛ o ngɛ klɔuklɔu. Je mi ma amɛ kulaa maa ba nɛ a ba ja ngɛ o hɛ mi. Ejakaa o dami ní ɔmɛ ɔ, a je mɛ kpo paa."

5 Jehanɛ se ɔ, i hyɛ nɛ i na nɛ a bli Hiɔwe sɔlemi tsu ɔ He Klɔuklɔu ɔ nya gbajaa!

6 Nɛ bɔfohi kpaago nɛ hɛɛ aja kpaago ɔmɛ je kpo kɛ je Sɔlemi tsu ɔ mi kɛ a he tade futafuta kɛ a mlɛmi fimi nɔ nɛ a kɛ sika tsu pee. 7 Nɛ hɛ kali eywiɛ ɔmɛ a ti nɔ kake ha a kpɛti nɔ tsuaa nɔ sika tsu kpluu nɛ hyi tɔtɔɔtɔ kɛ Mawu Hɛ Kalɔ nɛ ngɛ daa a mi mi fumi nɛ he ngɛ gbeye ɔ. 8 Sɔlemi tsu ɔ hyi kɛ la su ku nɛ je Mawu anunyami kɛ e he wami ɔ mi. Nɛ nɔ ko be sɔlemi tsu ɔ mi nyɛe maa sɛ, ja bɔfohi kpaago ɔmɛ ngɔ aja kpaago ɔmɛ kɛ pue si gbe nya.