1 Jehanɛ ɔ, i na Tobi ɔ nɛ daa si ngɛ Zion Yoku ɔ nɔ ngɛ Yerusalem, nɛ nimli akpe lafa kɛ nyingmi eywiɛ kɛ eywiɛ nɛ a ngma a biɛ kɛ E Tsɛ biɛ ngɛ a hɛ nya a ngɛ e ngɔ. 2 Nɛ i nu pɛmi ko he kɛ je hiɔwe kaa nyu babauu nɛ ngɛ si puee aloo kaa hiɔwe simi ngua ko. Sɔlemi lali nɛ ngɛ lae, nɛ a ngɛ saku hu fiae ɔ a gbi nɛ i nu ɔ nɛ.

3 Lali babauu akpe kɛ lafa nyingmi eywiɛ kɛ eywiɛ ɔmɛ ngɛ nyakpɛ la he ko lae ngɛ Mawu matsɛ sɛ ɔ kɛ hɛ kali eywiɛ ɔmɛ kɛ nikɔtɔmahi nyingmi enyɔ kɛ eywiɛ ɔmɛ a hɛ mi. Nɔ ko be nɛ ma nyɛ la nɛ ɔ ma la, ja nihi akpe kɛ lafa eywiɛ kɛ eywiɛ ɔmɛ nɛ a kpɔ mɛ kɛ je zugba a nɔ ɔ pɛ. 4 Ejakaa a hɛɛ a he klɔuklɔu nɛ a kɛ yihi bɔe. A ngɛ kaa yo nɛ li nyumu; nɛ a nyɛɛ Tobi ɔ se kɛ yaa he fɛɛ he nɛ e yaa. A he mɛ kɛ je zugba a nɔ nimli ɔmɛ a kpɛti kaa afɔlehi nɛ a tsu he kɛ ha Mawu kɛ Tobi ɔ. 5 Lakpa yemi be a mi, nɛ piami ko hu be a he.

6 Nɛ i na bɔfo kpa ko hu nɛ e ngɛ tee kɛ nyɛɛ hiɔwe, nɛ e hɛɛ neneene Manye Munyu ɔ nɛ e yaa fiɛ kɛ ha nihi nɛ ngɛ zugba a nɔ, nɛ ji ma tsuaa ma, wɛtso fɛɛ wɛtso, gbi fɛɛ gbi kɛ nimli kulaa.

7 E kpa ngmlaa nɛ e de ke, "Nyɛɛ ye Mawu gbeye nɛ nyɛɛ wo e hɛ mi nyami. Ejakaa be ɔ su nɛ e maa kojo. Nyɛ sɔmɔ lɛ, nɔ nɛ bɔ hiɔwe kɛ zugba kɛ wo kɛ nyu hɛ ngmɛhi ɔ!"

8 Kɛkɛ nɛ bɔfo kpa ko hu nyɛɛ e se kɛ gu kɔɔhiɔ mi, nɛ e ngɛ dee ke, "Babilon butu, e butu, jamɛ a ma ngua a, ejakaa e kɛ majemaje ɔ bɔ ajuama nɛ e ha a nu e mu kɛ e yayami wai ɔ eko."

9 Jehanɛ ɔ, bɔfo etɛne nyɛɛ a se nɛ e ngɛ ngmlaa kpae ke, "Nɔ fɛɛ nɔ nɛ ngɛ wo mi Lohwe ɔ kɛ e amaga a jae, nɛ e ngɛ e okadi ɔ ngɛ e hɛ nya loo e nine nɔ ɔ, 10 e maa nu Mawu mi mi fumi wai ɔ. A plɛ wai ɔ kɛ wo Mawu mi mi fumi kɔɔpoo ɔ mi, nɛ a futuu we mi. A ma ha nɛ e na nɔ́ ngɛ la glegleegle ɔ mi ngɛ bɔfo klɔuklɔu ɔmɛ kɛ Tobi ɔ hɛ mi. 11 A nɔ nami la su ku ɔ se be poe, nɛ a be he jɔmi nae nyɔ kɛ pia. Ejakaa a ja Lohwe ɔ kɛ e amaga a, nɛ a kɛ e biɛ he okadi wo a he so. 12 Enɛ ɔ nɛ wo Mawu nimli ɔmɛ he wami nɛ a na tsui si tomi ngɛ a haomi ɔmɛ a mi, ejakaa mɛ ji e klɔuklɔu bi ɔmɛ nɛ daa si kpɛii kɛ yaa nyagbe, nɛ a yeɔ e mlaa amɛ a nɔ, nɛ a ngɛ hemi kɛ yemi ngɛ Yesu mi."

13 Nɛ i nu gbi ko kɛ je Hiɔwe de mi ke, "Moo ngma nɔ́ nɛ ɔ: A gbaa nihi nɛ gboɔ ngɛ Nutsɔ ɔ mi kɛ je mwɔnɛ ɔ kɛ yaa nɛ ɔ." Mumi ɔ ke, "Ee, niinɛ a nɔ́ ji gbaami, konɛ a jɔɔ a he kɛ je a haomi ɔmɛ a mi; se a ni tsumi ɔmɛ maa nyɛɛ a se!" 14 Kɛkɛ nɛ nina a tsake, nɛ i na bɔ kuu futa kɛ nɔ ko kaa Yesu, nɔ nɛ a tsɛɛ lɛ ke "Nɔmlɔ Bi ɔ" hii si ngɛ nɔ. Nɛ sika tsu akeklee ngɛ e yi kpɛti, nɛ ngma kpami ha nɛ nya ba ngɛ e dɛ mi.

15 Nɛ bɔfo ko je sɔlemi tsu ɔ mi kɛ ba tsɛ lɛ nɛ e de ke; "Moo ngɔ ha a nɛ o kɛ bɔni ni tsumi, ejakaa ni kpami be ɔ su ha mo. Ni ɔmɛ tsu ngɛ zugba a nɔ." 16 Lɔ ɔ he je ɔ, nɔ nɛ hii si ngɛ bɔ kuu ɔ nɔ ɔ fɔ e ngma kpami ha a kɛ fɔ zugba a nɔ, nɛ a bua ngma a nya. 17 Lɔ ɔ se ɔ, bɔfo kpa ko hu je hiɔwe Sɔlemi tsu ɔ mi, nɛ lɛ hu e hɛɛ ngma kpami ha nya babɛ ko.

18 Jamɛ a be ɔ mi nɔuu ɔ, bɔfo ɔ nɛ hɛɛ he wami nɛ e ma kɛ kpata je ɔ hɛ mi kɛ la a, e kpa ngmlaa nɛ e de bɔfo ɔ nɛ hɛɛ ngma kpami ha a ke, "Moo ngɔ o ha a jehanɛ ɔ nɛ o poo wai yiblii sawu ɔmɛ ngɛ wai tso ɔmɛ a he ngɛ zugba a nɔ, ejakaa wai yiblii ɔmɛ tsu." 19 Lɔ ɔ he je ɔ, bɔfo ɔ fɔ e ngma kpami ha a kɛ mane zugba a nɔ, nɛ e bua wai yiblii ɔmɛ a nya kɛ wo Mawu mi mi fumi wai ngami nɔ́ agbo ɔ mi. 20 Nɛ a naa wai yiblii ɔmɛ a nɔ ngɛ wai ngami nɔ́ ɔ mi ngɛ ma a se. Kɛkɛ nɛ muɔ ke nɛ e be kaa dɔ, nɛ e kami ji si tomi he lafa enyɔ, nɛ e nɔ kuɔmi maa pee okpɔngɔ nya mi dade nɔ kuɔmi.