1 Ni nɛ ɔmɛ kulaa a se ɔ, i na bɔfo kpa ko nɛ kple si kɛ je hiɔwe kɛ nɔ yemi he wami agbo. Kɛkɛ nɛ e anunyami ɔ ha nɛ zugba a nɔ tsuo tsɔ heii.

2 E kpa ngmlaa wawɛɛ ke, "Babilon Agbo ɔ ywia, e ywia! E plɛ mumi yayamihi a sihi he kɛ mumi yayamihi kulaa a tsu, kɛ lohwe pɛlitsɛhi nɛ a he tsɔ we, nɛ a he ngɛ tai ɔ a tsu. 3 Ejakaa ma amɛ tsuo nu e ajuama bɔmi ɔ he hɛ mi kpatami wai ɔ eko. Zugba a nɔ matsɛ ɔmɛ kɛ lɛ bɔ ajuama, nɛ jua yeli ngɛ je ɔ mi tsuo na ní kɛ gu e si himi ɔ nɔ."

4 Jehanɛ ɔ, i nu gbi kpa ko nɛ ngɛ ngmlaa kpae ke, "Ye we bimɛ, nyɛɛ je yo ɔ ngɔ kɛ ba! Nyɛɛ kɛ nyɛ he nɛ ko wo e yayami peemi ɔ mi, nɛ nyɛ ko na e tue gblami ɔ eko. 5 Ejakaa e he yayami ɔmɛ hiɛ nɛ a su hiɔwe, nɛ Mawu pee klaalo nɛ e maa kojo lɛ ngɛ e tɔmi ɔmɛ a he. 6 Nyɛɛ pee lɛ kaa bɔ nɛ e pee nyɛ ɔ, nɛ nyɛɛ wo lɛ e ni peemi ni ɔmɛ a he hiɔ ngwɔ he enyɔ. E hao nihi, nyɛ ha nɛ lɛ hu e na haomi ja a ngwɔ he enyɔ. 7 E hi si ngɛ ni nami kɛ bua jɔmi mi. Se jehanɛ ɔ, nyɛ ha nɛ e na haomi kɛ aywilɛho. E fĩaa ke, ‘Manyɛ ji mi ngɛ ye sɛ ɔ nɔ. Tsa pi ahoyo nɛ ni ngɛ mɔbɔ ji mi. I be aywilɛho yee.’ 8 Lɔ ɔ he je ɔ, gbenɔ he aywilɛho kɛ mɔbɔ yemi kɛ hwɔ nɛ nya wa maa ba e nɔ ngɛ ligbi kake too mi, nɛ la ma kpata e hɛ mi butuu. Ejakaa Nutsɔ ɔ nɛ ngɛ lɛ kojoe ɔ e kle."

9 Nɛ benɛ la su ku ɔ ngɛ si tee ngɛ he nɛ e ngla ngɛ ɔ, zugba a nɔ matsɛ ɔmɛ nɛ a kɛ lɛ bɔ ajuama, nɛ a na níhi kɛ je e dɛ ɔ, a maa ye aywilɛho nɛ a ma fo ya kɛ ha lɛ. 10 A maa da si ngɛ se tsitsaa kɛ he kpokpomi kɛ gbeye yemi nɛ a ma kpa ngmlaa ke, "Ao, Babilon, jamɛ a ma ngua a! Ngmlɛfia kake mi pɛ nɛ o hɛ mi kpata."

11 Zugba a nɔ jua yeli ɔmɛ ma fo ya nɛ a maa ye kɔmɔ kɛ ha lɛ, ejakaa nɔ ko be hu nɛ ma he a tlomi ɔmɛ. 12 Lɛ ji a jua yelɔ ngua pe kulaa nɛ heɔ a sika tsu kɛ sika hiɔ, tɛhi kɛ muɛhi nɛ a he jua wa, klala kpakpahi, sliiki yumuhi kɛ níhi nɛ hɛɛ alamua su, tso fɛɛ tso nɛ jee via, suɔ wu níhi kɛ níhi kulaa nɛ a kɛ tso nɛ he jua wa pee, ayawa kɛ dade kɛ tɛ kpa komɛ. 13 Ekomɛ hu ji mimɛhi kɛ nu je viahi, la su ku womi tsopahi, nu kpakpa kɛ ohɛ, wai kɛ sikisia kpakpa, ngma, nahi kɛ tohi, okpɔngɔhi kɛ trɔkehi, nyɔguɛhi kɛ nimli a susumahi tete.

14 Nɛ a kpa ngmlaa ke, "O tsui suɔmi nya ni ɔmɛ kulaa laa mo. Afɛu níhi nɛ kpɛɔ nɛ o suɔ saminya a, o be nae hu. A laa kulaa."

15 Nɛ jua yeli ɔmɛ nɛ plɛ niatsɛmɛ ngɛ ní nɛ ɔmɛ nɛ a juaa kɛ haa lɛ ɔ he je ɔ, a ma ya da si ngɛ se lokoo, ngɛ gbeye yemi nya, nɛ a ma fo ya nɛ a ma de ke, 16 "Ao, jamɛ a ma ngua a! E ngɛ fɛu kaa yo nɛ bu bo tsutsu nɛ he jua wa nɛ hɛɛ alamua su hulɔ. Nɛ e wlua kɛ sika tsu gahi kɛ kuɛ níhi kɛ muɛhi nɛ he jua wa. 17 Ngɛ ngmlɛfia mi ɔ, a kpata e ni kpakpa amɛ kulaa hɛ mi!" Nɛ jua yemi lɛtsɛ ɔmɛ, kɛ kudɔli ɔmɛ kɛ lɛ mi bi ɔmɛ ma ya da si ngɛ se lokoo, 18 nɛ a maa hyɛ la su ku ɔ nɛ ngɛ jee ɔ, nɛ a ma kpa ngmlaa ke, "Je ɔ mi kulaa jije a maa na ma nɛ ngɛ kaa enɛ ɔ ngɛ?" 19 Nɛ a maa muɔ zu kɛ pue a yi kpɛti benɛ a ngɛ ya foe ɔ, nɛ a ma de ke, "Ao, ao, jamɛ a ma ngua a! E ha nɛ wɔ tsuo wa plɛ niatsɛmɛ kɛ je e ni nami babauu ɔ mi. Nɛ jehanɛ ɔ, kulaa laa ngɛ ngmlɛfia mi!"

20 Oo hiɔwe, mo nya ngɛ e hɛ mi kpatami ɔ he. Nyɛ nya, oo Mawu bimɛ kɛ gbali ɔmɛ kɛ bɔfo ɔmɛ. Ejakaa Mawu kojo lɛ kɛ ha nyɛ.

21 Kɛkɛ nɛ bɔfo ngua ko wo tɛ nɛ ngɛ kaa wɛɛmi tɛ, nɛ e fia lɛ kɛ mane wo ɔ mi nɛ e kpa ngmlaa ke, "Babilon, jamɛ a ma ngua a! A ma sake lɛ kɛ fɔ he kaa bɔ nɛ i fia tɛ nɛ ɔ kɛ mane ɔ, nɛ e maa laa kulaa. 22 Nɛ a be la he nue ngɛ lejɛ ɔ hu. A be saku kɛ kpa saku kɛ bliigo he nue hu. A be jua yemi ni tsumi ko nae ngɛ lejɛ ɔ hu, nɛ a be blɛfo gblɛe hu. 23 E nyɔ mi ɔmɛ maa wo diblii, nɛ a be kane tete nae ngɛ saflɛ mi hu. A be yo kpeemi ngmlɛ ɔmɛ kɛ ayɛflo kɛ ayɛflo huno ɔ a gbi ngɔngɔɛ ɔmɛ a he nue hu. A lɛɛ jua yeli ɔmɛ ngɛ je ɔ mi, nɛ e ngɔ kunya kɛ sisi ma amɛ kulaa. 24 Nɛ a ma bi gbali ɔmɛ kɛ he tsɔli ɔmɛ kulaa nɛ a gbe ɔ a muɔ si ngɛ e dɛ."