1 Kɛkɛ nɛ bɔfo nɛ ji enuɔ ɔ kpa e bliigo ɔ, nɛ i na dodoe nɛ tsɔ kɛ je hiɔwe kɛ ba nɔ zugba. Nɛ a ngɔ muɔ voo nɛ a nɛ e sisi ɔ nya safie ɔ kɛ ha lɛ.

2 Benɛ dodoe ɔ bli muɔ ɔ nya a, la su ku kpii nɛ ngɛ kaa flɔɔnɔɔ ngua mi la su ku je mi kɛ je kpo. Nɛ la su ku ɔ wo diblii bɔ nɛ a nɛ pu kɛ kɔɔhiɔ fiami.

3 Kɛkɛ nɛ baalɛhi je la su ku ɔ mi kɛ ba hyi zugba a nɔ, nɛ a ha mɛ he wami nɛ a kɛ tsiɛ nɔ kaa nyingmogblakoto. 4 A de mɛ kaa a ko kpata nga loo tsohi a hɛ mi. Se mohu a ya ye nimli nɛ Mawu okadi ɔ be a hɛ nya a awi. 5 A ko gbe mɛ, se a pi mɛ hlami enuɔ, nɛ a na nɔ́ kaa bɔ nɛ ke nyingmogblakoto tsiɛ nɔ nɛ e peeɔ lɛ ɔ. 6 Jamɛ a be ɔmɛ a mi ɔ,nimli ma hla kaa a gbe a he, se a be gbenɔ nae nɛ a gbo. A maa suɔ nɛ a gbo se gbenɔ maa ma a nya fo!

7 Baalɛ ɔmɛ ngɛ kaa okpɔngɔhi nɛ a wlua mɛ kɛ ha ta. A bu ní komɛ nɛ ngɛ kaa sika tsu akekleehi ngɛ a yi. Nɛ a hɛ mi je nimli a hɛ mi. 8 A he bwɔmi ka kaa yo yi bwɔmi, nɛ a lungu ngɛ kaa jata lungu. 9 A he toto ngɛ kaa dade dama, nɛ a pɛlihi a mi ngɛ pɛe kaa trɔkehi nɛ a ngɛ gblae kɛ yaa ta.

10 A ngɛ kpi nɛ a tsiɛɛ nɔ kaa nyingmogblakoto. He wami ngɛ a kpi ɔ mi nɛ ke a tsiɛ nɔ ko ɔ, e yee lɛ hlami enuɔ. 11 A matsɛ ji muɔ voo ɔ bɔfo. E biɛ ngɛ Hebri gbi mi ji Abadon, nɛ Hela gbi mi ɔ, a tsɛɛ lɛ ke Apolion. E sisi ji hɛ mi kpatalɔ.

12 Kekle haomi ɔ ba be, nɛ e piɛ enyɔ nɛ maa ba.

13 Bɔfo nɛ ji ekpa a kpa e bliigo ɔ, nɛ i nu gbi ko kɛ je sika tsu afɔle sami la tɛ ɔ koli eywiɛ ɔmɛ nɛ ngɛ Mawu matsɛ yemi sɛ ɔ hɛ mi ɔ mi. 14 Nɛ e ngɛ bɔfo nɛ ji ekpa nɛ hɛɛ bliigo ɔ dee ke, "Moo ngmɛɛ bɔfohi eywiɛ ɔmɛ nɛ a fi mɛ ngɛ Yufrate pa ngua a nya a a he." 15 Lɔ ɔ he je ɔ, a pine bɔfohi eywiɛ ɔmɛ nɛ a dla kɛ to ngmlɛfia a, kɛ ligbi ɔ, kɛ hlami kɛ jeha a, konɛ a gbe nimli tsuo a mi dlami etɛ mi kake. 16 Nɛ a hɛɛ ta hwuli kpanakuhi akpeakpe lafa enyɔ. I nu nɛ a tsɔɔ a hiɛmi.

17 I na a okpɔngɔ ɔmɛ ngɛ ye nina a mi. A nɔ hili ɔmɛ wo damahi nɛ a su ngɛ kaa la kɛ bluu kɛ kungwɔ zɔ. Nɛ okpɔngɔ ɔmɛ a yi ngɛ kaa jata yi, nɛ la kɛ la su ku kɛ nɔ́ ko nɛ a tsɛɛ ke sɔlfa a ngɛ a nya mi jee. 18 Hɛ mi kpatami nihi etɛ, nɛ ji la kɛ la su ku kɛ sɔlfa nɛ ngɛ a nya mi jee ɔ gbe nimli a mi gbami etɛ mi kake. 19 Ejakaa okpɔngɔ ɔmɛ a he wami ngɛ a nya mi kɛ a hlemi ɔmɛ a mi. Yi ngɛ a hlemi ɔmɛ a nya kaa sinɔhi a ní, nɛ a kɛ yeɔ nɔ awi.

20 Se nihi nɛ gbo we ngɛ hɛ mi kpatami nɛ ɔmɛ a se ɔ, a kua Mawu sɔmɔmi kɛ sa! A ngmɛɛ we a wɔ ɔmɛ a jami he, aloo a amaga amɛ nɛ a pee kɛ sika tsu kɛ sika hiɔ, akɔblee kɛ tɛ, kɛ tso, nɛ ji níhi nɛ hyɛ we ní, nɛ a nui ní, nɛ a nyɛɛ we hulɔ ɔ. 21 Nɛ a tsakee we a tsui kɛ a je mi bami ngɛ a nɔ gbemi kɛ aze ni tsumi ɔmɛ kɛ ajuama bɔmi kɛ jumi he.