1 Nɛ bɔfohi kpaago ɔmɛ nɛ plɛ a kpluu ɔmɛ a mi ni ɔmɛ pue si ɔ a ti nɔ kake ba nɛ e kɛ mi ba tu munyu ke, "Moo ba nɛ waa ho nɛ ma ya tsɔɔ mo nɔ nɛ maa ba jamɛ a yo ajuama kpanaku ɔ nɔ, nɔ nɛ hii si ngɛ nyu babauu nɔ ngɛ je ɔ mi ɔ. 2 Je mi matsɛ ɔmɛ kɛ lɛ bɔ ajuama, nɛ e ajuama bɔmi wai ɔ ha zugba a nɔ bimɛ de da."

3 Kɛkɛ nɛ bɔfo ɔ wo mi ngɛ mumi mi kɛ ho nga a nɔ ya. Nɛ i na yo ko nɛ hii si ngɛ lohwe nɛ tsuɔ kaa muɔ nɔ. Lohwe ɔ ngɛ yihi kpaago kɛ kolihi nyɔngma nɛ a ngma Mawu he musu bɔmi munyu kɛ bɔle a he. 4 Yo ɔ wo tade nɛ tsuɔ nɛ hɛɛ alamua su hulɔ. Nɛ e wo sika tsu june nɛ ngɛ fɛu kɛ adiagba kɛ muɛhi nɛ a he jua wa, nɛ e hɛɛ sika tsu kpluu nɛ hyi tɔtɔɔtɔ kɛ yakayaka kɛ mu níhi ngɛ e dɛ mi.

5 Nɛ a ngma nyakpɛ biɛ ko nɛ ji laami munyu ngɛ e hɛ nya ke, "Babilon ngua a, ajuama bɔli kɛ je ɔ mi wɔ jali tsuo a nyɛ."

6 I na kaa klɔuklɔu bi ɔmɛ kɛ Yesu he odase yeli ɔmɛ nɛ e gbe ɔ a muɔ ha nɛ e de da. Benɛ i na lɛ ɔ ye nya kpɛ ye he.

7 Nɛ bɔfo ɔ bi mi ke, "Mɛni ba nɛ o nya kpɛ o he kikɛ ɔ? I ma tsɔɔ mo nɔmlɔ nɛ e ji, kɛ nɔ́ nɛ lohwe ɔ nɛ e kuɔ ɔ ji. 8 Jinɛ lohwe ɔ hi wami mi hyɛ, se piɔ ɔ e gbo. Se kɛ ɔ, e be kɛe nɛ e maa te si kɛ je muɔ voo nɛ a nɛ e sisi ɔ mi kɛ ho neneene hɛ mi kpatami mi ya. Nɛ zugba a nɔ nimli nɛ a ngmɛ a biɛ ngɛ Wami Womi ɔ mi loko ji je ɔ bɔ ade ɔ, a nya maa kpɛ a he kaa lohwe ɔ ba je kpo ekohu ngɛ e gbenɔ se.

9 Jehanɛ ɔ, mo susu he saminya, e yihi kpaago ɔmɛ daa si kɛ ha ma ko nɛ a ma lɛ ngɛ yokuhi kpaago a nɔ, he nɛ yo nɛ ɔ we ngɛ. 10 Nɛ a daa si kɛ ha niatsɛhi kpaago hulɔ. A kpɛti nihi enuɔ gbo momo, nɛ ekpane ɔ ngɛ matsɛ yee amlɔ nɛ ɔ. E piɛ kpaagone ɔ nɛ maa ba, se lɛɛ e matsɛ yemi ɔ se be kɛe. 11 Lohwe tsutsu ɔ nɛ gbo ɔ ji matsɛ kpaanyɔne ɔ. E ye matsɛ momo kaa matsɛ kpaago ɔmɛ a ti nɔ kake. Nɛ ngɛ e matsɛ yemi enyɔne ɔ se ɔ, lɛ hu e maa ya hɛ mi kpatami mi. 12 E kolihi nyɔngma amɛ daa si kɛ ha tsɛ yeli nyɔngma nɛ a wui mɛ matsɛ lolo. A maa wo mɛ matsɛ be kpiti kɛkɛ, nɛ a kɛ lɛ maa ye matsɛ. 13 Mɛ tsuo a maa wo si kaa a maa ngɔ a matsɛ yemi kɛ he wami ɔ kɛ ha lɛ. 14 Mɛ tsuo a ma je ta kɛ wo Tobi ɔ, se Tobi ɔ maa ye a nɔ. Ejakaa nutsɔhi a Nutsɔ kɛ matsɛhi a Matsɛ ji lɛ, nɛ e nimli ɔmɛ ji nihi nɛ a hla nɛ a tsɛ, nɛ a ji anɔkuale yeli.

15 Wo ɔmɛ kɛ pa amɛ kɛ dɔbo ɔmɛ nɛ yo ɔ hii si ngɛ nɔ ɔ daa si kɛ ha nimli abɔ ngɛ je ɔ mi tsuo.

16 Lohwe tsutsu kɛ e kolihi nyɔngma a nɛ daa si kɛ ha matsɛhi nyɔngma a nɛ a kɛ lɛ maa ye matsɛ ɔ, mɛ tsuo a sume yo ɔ. Lɔ ɔ he je ɔ, a kɛ lɛ maa kpe. A ma kpɔ e níhi kulaa ngɛ e dɛ nɛ a ma si lɛ kɛ e he gu nɛ la ma kpata e hɛ mi. 17 Ejakaa Mawu ma wo juɛmi ko kɛ wo a yi mi, juɛmi nɛ ma tsu e yi mi tomi he ni. Lɔ ɔ ji kaa mɛ tsuo a maa kplɛɛ kaa a maa ngɔ a matsɛ yemi he wami ɔ kɛ ha lohwe tsutsu ɔ, bɔ nɛ pee nɛ Mawu munyu ɔmɛ nɛ ba mi. 18 Nɛ yo nɛ ɔ nɛ o na ngɛ o nina mi ɔ daa si kɛ ha ma agbo ɔ nɛ ngɛ zugba a nɔ matsɛ ɔmɛ a nɔ yee ɔ."