1 Nɛ i na bɔfo ko nɛ je Hiɔwe kɛ ba zugba. E hɛɛ muɔ voo nɛ a nɛ e sisi ɔ nya safie kɛ kɔsɔkɔsɔ agbo ngɛ e dɛ mi. 2 Kɛkɛ nɛ e nu Gbeye Lohwe ɔ nɛ ji blema sinɔ ɔ loo Abosiami ɔ nɛ e wo lɛ kɔsɔkɔsɔ ɔ, nɛ e maa hi kɔsɔkɔsɔ ɔ mi kɛ ya si jeha akpe kake. 3 Nɛ e tsitsiɛ lɛ kɛ wo muɔ voo nɛ a nɛ e sisi ɔ mi. E nga muɔ ɔ nya nɛ e ngmɛ mi bɔ nɛ pee nɛ e ko sisi ma amɛ hu kɛ ya si jeha akpe ɔ nya ma ta. Nɛ jamɛ a be ɔ se ɔ, a maa ngmɛɛ e he bɔɔ.

4 Jehanɛ ɔ i na matsɛ sɛhi, nɛ nihi nɛ a ha mɛ he blɔ kaa a kojo ɔ hii si ngɛ a nɔ. Nɛ i na nihi nɛ a gbe mɛ ngɛ Yesu he odase yemi kɛ Mawu Munyu ɔ fiɛmi he ɔ a susumahi; kɛ nihi nɛ kua Lohwe ɔ loo e amaga a jami, aloo a pee we e okadi ɔ ngɛ a hɛ nya loo a kɔni nɔ ɔ. A kpale kɛ ba wami mi ekohu nɛ a kɛ Kristo ngɛ matsɛ yee kɛ yaa jeha akpe.

5 Gbogboehi a si temi kekle nɔ ɔ ji enɛ ɔ nɛ. Gbogboe ɔmɛ nɛ piɛ ɔ be si tee kɛ ba wami mi kɛ ya si jeha akpe ɔ nyagbe. 6 Nihi nɛ ngɛ klɔuklɔu nɛ a jɔɔ mɛ ɔ piɛɛ kekle nihi nɛ a tle mɛ si ɔ a he. Jamɛatsɛ ɔmɛ ɔ, gbenɔ nɛ ji enyɔne ɔ be a nɔ he wami. Ejakaa a maa pee Mawu kɛ Kristo osɔfohi, nɛ a kɛ lɛ maa ye matsɛ jeha akpe.

7 Jeha akpe ɔ nyagbe mi ɔ, a ma je Abosiami kpo kɛ je e tsu ɔ mi. 8 E ma ya sisi jemi ma amɛ nɛ ji Gog kɛ Magog, nɛ e ma bua a nya kɛ ha ta hwumi. Nɛ e ma na ta hwuli babauu kaa bɔ nɛ wo nya kewu ngɛ ɔ. 9 A maa nyɛɛ kɛ ya bɔle Mawu nimli ɔmɛ kɛ Yerusalem, ma nɛ a suɔ lɛ ɔ. Se la maa je Mawu ngɔ ngɛ hiɔwe nɛ e ma kpata a hɛ mi.

10 Nɛ Abosiami nɛ sisi mɛ ɔ, a maa ngɔ lɛ kɛ wo La Taku nɛ ngɛ tsoe glegleegle ɔ mi, he nɛ Lohwe ɔ kɛ Lakpa Gbalɔ ɔ ngɛ ɔ, nɛ a ma pi mɛ nyɔ kɛ pia kɛ ya neneene.

11 I na matsɛ sɛ hiɔ agbo ko kɛ nɔ nɛ hii si ngɛ nɔ ɔ. Nɛ zugba kɛ hiɔwe tu fo kɛ je e hɛ mi, se a nɛ laami he. 12 Nɛ i na ni gbogboe ɔmɛ, nimli nguahi kɛ nimli guhi nɛ daa si ngɛ Mawu hɛ mi. A bli Womi ɔmɛ kɛ Wami Womi ɔ a nya. Nɛ a kojo gbogboe ɔmɛ ngɛ níhi nɛ a ngma ngɛ Womi ɔmɛ a mi ɔ kɛ níhi nɛ nɔ fɛɛ nɔ pee ɔ nya. 13 Wo ɔmɛ ngɔ ni gbogboehi nɛ ngɛ a mi ɔ kɛ ha. Nɛ zugba a kɛ gbeje hu je gbogboehi nɛ ngɛ a mi ɔ kɛ ha. Nɛ a kojo nɔ tsuaa nɔ ngɛ e ni tsumi ɔmɛ a nya. 14 Nɛ a sake Gbenɔ kɛ Gbeje kɛ wo La Taku ɔ mi. La Taku ɔ ji gbenɔ nɛ ji enyɔne ɔ. 15 Nɛ nɔ nɛ a nɛ e biɛ ngɛ Wami Womi ɔ mi ɔ, a sake lɛ kɛ wo La Taku ɔ mi.