1 Mamimɛ nɛ a suɔ, nyɛ nitsɛmɛ nyɛ le se nami nɛ ngɛ wa slaami ɔ he. 2 Nyɛ le bɔ nɛ a wa wɔ yi mi, kɛ bɔ nɛ wa na nɔ ngɛ Filipi loko ji wa kɛ ba nyɛ ngɔ ɔ. Se kɛ ɔ, Mawu wo wɔ kã nɛ wa kɛ Manye Munyu ɔ ba nyɛ ngɔ, tse be ɔ, he nyɛli bɔle wɔ kɛ kpe. 3 Nɛ nyɛ na hu kaa tsa pi lakpa fiɛmi nɛ wa ngɛ fiɛe aloo yi mi tomi yaya ko nɛ wa hɛɛ, se mohu e ji anɔkuale fiɛmi nɛ mu ko be he.

4 Ejakaa wa tu munyu kaa Mawu tsɔli nɛ a to anɔkuale ɔ fiɛmi kɛ wo wa dɛ; nɛ wa tsakee we munyu ɔ hɛ mi bɔ nɛ maa sa e nuli ɔmɛ, ejakaa Mawu, nɔ nɛ le wa tsui mi ni susumi ɔmɛ ɔ nɛ wa ngɛ sɔmɔe. 5 Nɛ kaa bɔ nɛ nyɛ le ɔ, waa kɛ nya mi dɔkɔdɔkɔ munyu ko ba sisi we nyɛ, nɛ Mawu ji wa odase kaa wa yi nyɛ lakpa, bɔ nɛ pee nɛ waa kɛ nyɛ nɛ pee huɛ nɛ nyɛɛ ke wɔ sika. 6 Akɛnɛ Kristo bɔfohi ji wɔ he je ɔ, wa ngɛ he blɔ nɛ waa kɛ wa hɛ fɔɔ nyɛ nɔ, se wa hla we yi jemi ko kɛ ji nyɛ loo nɔ kpa ko dɛ. 7 Se mohu wa hi nyɛ kpɛti kɛ mi mi jɔmi kaa bɔ nɛ binyɛ hɛɛ e bimɛ nɛ e lɛɛ mɛ ɔ. 8 Akɛnɛ wa suɔ nyɛ saminya he je ɔ, tsa pi Mawu Manye Munyu ɔ kɛkɛ nɛ wa kɛ ba ha nyɛ, se mohu wa kɛ wa wami tete piɛ he.

9 Mamimɛ, anɛ nyɛ kai we wa pɔ tɔtɔɛ kɛ dengme gbomi ɔ be nɛ wa ngɛ Manye Munyu ɔ fiɛe ngɛ nyɛ kpɛti ɔ? Kaa wa tsu ni nyɔ kɛ pia bɔ nɛ pee nɛ waa kɛ wa hɛ nɛ ko fɔ nyɛ ti nɔ ko nɔ. 10 Nyɛ nitsɛmɛ kɛ Mawu ji wa he odase yeli kaa wa ye nyɛ anɔkuale nɛ waa kɛ nyɛ hi si ngɛ klɔuklɔu peemi mi nɛ piami ko be wa he. 11 Nyɛ kai we bɔ nɛ waa kɛ nyɛ tuɔ munyu ha kaa tsɛ kɛ e bimɛ, nɛ wa kpaa pɛɛ kɛ haa nyɛ, nɛ wa woɔ nyɛ he wami, 12 bɔ nɛ pee nɛ nyɛ je mi bami nɛ sa Mawu hɛ mi, nɔ́ nɛ tsɛ nyɛ kɛ ba e matsɛ yemi kɛ e hɛ mi nyami ɔ mi ɔ.

13 Nɛ wa maa na Mawu si daa ngɛ enɛ ɔ he, kaa benɛ wa fiɛ kɛ tsɔɔ nyɛ ɔ, nyɛ he we fiɛmi ɔ kaa wɔ nitsɛmɛ wa yi mi tomi munyu, se mohu nyɛ he ye kaa e ji Mawu Munyu niinɛ, nɛ e tsake nyɛ je mi bami benɛ nyɛ he ye ɔ.

14 Jehanɛ ɔ, mamimɛ, kaa bɔ nɛ Yuda bi ɔmɛ wa Yudea asafo ɔmɛ yi mi ɔ, ja a nɔuu a wa nyɛ hu yi mi ngɛ nyɛ nitsɛmɛ nyɛ ma a mi. 15 Nɛ benɛ a gbe mɛ nitsɛmɛ a gbali ɔmɛ se ɔ, a gbe Nutsɔ Yesu hulɔ. Jehanɛ ɔ, a wa wɔ yi mi saminya nɛ a fie wɔ. A te si kɛ wo Mawu kɛ nɔmlɔ adesa tsuo, 16 nɛ a ngɛ wɔ blɔ tsie bɔ nɛ pee nɛ wa ko ya fiɛ kɛ tsɔɔ ma je li ɔmɛ nɛ a he a yi wami. Enɛ ɔ ha nɛ a ngɛ nɔ yae kɛ yayami peemi. Se nyagbe mi ɔ, Mawu mi mi fumi ba a nɔ.

17 Mamimɛ nɛ a suɔ, benɛ wa mi gba nɛ wa si nyɛ be kpiti ko, se wa tsui ji nyɛ he ɔ, wa bɔ mɔde kaa wa ma ba na nyɛ hɛ mi ekohu. 18 Wa suɔ kaa waa ba nyɛ ngɔ, nɛ imi Paulo i ka si abɔ nɛ ma ba nyɛ ngɔ, se Abosiami tsi wɔ blɔ. 19 Ejakaa mɛni ji wa ni tsumi, nɔ́ nɛ haa wɔ hɛ nɔ kami kɛ bua jɔmi nɛ peeɔ wa hiɔwo kɛ wa jlasi. Nyɛ i. Nyɛ nɛ nyɛ ma ha wa ma na bua jɔmi babauu be nɛ wɔ tsuo wa ma pue ngɛ Nutsɔ Yesu Kristo hɛ mi, be mi nɛ e maa ba ekohu ɔ. 20 Ejakaa nyɛ ji wa hɛ mi nyami kɛ wa bua jɔmi.