1 Ami nɛ a wo mi tsu mi ngɛ Nutsɔ ɔ sɔmɔmi he ɔ, i ngɛ nyɛ pɛɛ kpae kaa nyɛɛ ba nyɛ je mi bɔ nɛ sa tsɛmi nɛ a tsɛ nyɛ ɔ. 2 Nyɛɛ ba nyɛ he si nɛ nyɛ ko pee gidigidi. Nyɛɛ to tsui si kɛ ha nyɛ bi, nɛ nyɛ na tsui kɛ ha nyɛ bi a tɔmihi ngɛ suɔmi nɛ nyɛ ngɛ ɔ he je. 3 Nyɛɛ bɔ mɔde be fɛɛ be nɛ Mumi Klɔuklɔu ɔ nɛ kudɔ nyɛ tsuo bɔ nɛ pee nɛ tue mi jɔmi nɛ hi nyɛ kpɛti.

4 Nɔmlɔ tso kake he níhi ji wɔ tsuo, nɛ wa ngɛ Mumi kake; nɛ a tsɛ wɔ tsuo kɛ ha hwɔɔ se si himi kpakpa kake too. 5 Ejakaa wɔɔ lɛɛ wa ngɛ Nutsɔ kake kɛ hemi kɛ yemi kake kɛ baptisimi kake, 6 nɛ wɔ tsuo wa ngɛ Mawu kɛ Tsɛ kake nɛ ngɛ wɔ kulaa wa nɔ, nɛ e ngɛ wɔ tsuo wa mi, nɛ e ngɛ wa he tsuaa he. 7 Se wa ti nɔ tsuaa nɔ ɔ, Kristo ngɔ dloomi nɔ́ ke nɔ titli ko ngɔ ha lɛ kɛ je e nike ni babauu ɔmɛ a mi.

8 Enɛ ɔ nɛ Latsɛ ɔ yo nɛ e de ke, benɛ Kristo kuɔ kɛ ho hiɔwe ya ngɛ e si temi ɔ se benɛ e ye Abosiami nɔ ɔ, e ngɔ nike níhi fuu kɛ ke nimli. 9 Nɔ́ nɛ e de ji e kpale kɛ ho hiɔwe ya. Nɛ e sisi tsɔɔmi ji e kple si kɛ ba zugba a nɔ kekle. 10 Nɛ nɔ́ nɛ kple si ɔ, lɛ nɔuu ji nɔ nɛ kpale kuɔ kɛ ho hiɔwe ya a nɛ, konɛ lɛ nitsɛ e hi nɔ tsuaa nɔ mi ngɛ he fɛɛ he.

11 Wɔ nihi nɛ wa ji bɔfo ɔmɛ ɔ, a ha wɔ he wami slɔɔto komɛ; nɛ ni komɛ hu e pee mɛ Manye Munyu ɔ fiɛli; ni komɛ hu e ha mɛ dloomi nike ni bɔ nɛ a ma nyɛ gbla nihi kɛ ba Kristo ngɔ, nɛ a ye kɛ bua mɛ konɛ a he e nɔ nɛ a ye kaa a Yiwamihelɔ; nɛ ni komɛ hu e wo mɛ osɔfohi nɛ a hyɛ e we bi ɔmɛ a nɔ kaa bɔ nɛ to kpakalɔ hyɛɔ e tohi a nɔ ɔ, nɛ a kpaka mɛ nɛ a tsɔɔ mɛ ni ngɛ Mawu blɔ nya tomi ɔ nya.

12 Mɛni he je nɛ e ha wɔ dloomi nike ni slɔɔtohi nɛ wa nyɛ wa kɛ pee ni pɔtɛɛ komɛ saminya ngɛ? Ejakaa e sa nɛ a wo Mawu we bimɛ he wami konɛ a nyɛ nɛ a tsu e ni tsumi ɔ saminya. A hyɛ asafo ɔ nɛ ji Kristo nɔmlɔ tso ɔ nɔ, nɛ e ma si kpɛii nɛ e wa, 13 kɛ ya si nyagbe mi nɛ wɔ tsuo wa ma na hemi kɛ yemi kake ngɛ wa yi wami hemi kɛ wa Yiwamihelɔ ɔ mi, nɔ́ nɛ ji Mawu Bi ɔ. Nɛ wɔ tsuo wa maa wa kɛ pi si ngɛ Nutsɔ ɔ mi, kɛ ya si he nɛ wa ma hyi banebane kɛ Kristo ngɛ.

14 Enɛ ɔ ma ha nɛ wa be wa ni pee kaa jokuɛwi hu, nɛ wa juɛmi maa hi tsakee be fɛɛ be ngɛ nɔ nɛ wa he ye ɔ he, ejakaa nɔ ko de wɔ nɔ kpa ko, aloo nɔ ko mlɔɔ wɔ kɛ munyu kpa ko nɛ ngɛ kaa anɔkuale ɔ. 15,16 Se mohu wa maa nyɛɛ anɔkuale ɔ se be fɛɛ be, nɛ waa pee wa nɔ́ tsuaa nɔ ngɛ anɔkuale blɔ nɔ, bɔ nɛ pee nɛ waa pee kaa Kristo, nɔ́ nɛ ji Nɔmlɔ tso ɔ Yi, nɛ ji asafo ɔ. Ngɛ e blɔ tsɔɔmi nya a, a to Nɔmlɔ tso ɔ tsuo blɔ nɔ pɛpɛɛpɛ kɛ pee kake, nɛ e he tsuaa he yeɔ kɛ buaa he kpa amɛ, nɛ lɔ ɔ haa nɔmlɔ tso ɔ tsuo he wami nɛ e waa nɛ e naa suɔmi babauu.

17 Nɛ i ngɛ enɛ ɔ dee ngɛ Nutsɔ ɔ biɛ mi ke, nyɛ ko ba nyɛ je mi kaa bɔ nɛ nihi nɛ a he we a yi wami ngɛ ɔ. 18 Ejakaa mɛɛ lɛɛ a juɛmi mi wo diblii kpii nɛ a lu. A tsui nɛ a nga nya a mi wo diblii. A kɛ Mawu si himi kpɛti kɛ, ejakaa a nga a juɛmi nya kɛ wo lɛ, nɛ lɔ ɔ he je ɔ, a nui e blɔ nya tomi ɔmɛ a sisi. 19 Kaa a maa pee kpakpa loo yayami pi a kɔmɔ hu, nɛ a ngɔ a he kɛ ha mu ni tsumihi. Nɔ́ ko nɔ́ ko pui a tsui nɔ, ejakaa a yayami juɛmi kɛ basabasa níhi a se dimi ɔ ji nihi nɛ ngɛ mɛ gblae.

20 Se nyɛɛ lɛɛ Kristo tsɔɔ we nyɛ kikɛmɛ a je mi bami nɛ ɔ. 21 Ke e ngɛ mi kaa nyɛ nu e gbi, nɛ nyɛ kase e he anɔkuale sane ɔ, 22 lɛɛ nyɛ sake nyɛ sa je mi bami su yaya a nɛ puɛ kɛ he lo se dimi kɛ sisimi ɔ kɛ fɔ he.

23 Jehanɛ ɔ, e sa nɛ nyɛ subai kɛ je mi bami nɛ bɔni tsakemi bɔ nɛ maa hi. 24 Nyɛ tsake nyɛ je mi bami nɛ nyɛɛ pee nimli hehi nɛ ngɛ klɔuklɔu, nɛ nyɛ ha nɛ a na nyɛ kaa nyɛ tsake niinɛ.

25 Nyɛ ti nɔ tsuaa nɔ nɛ kpa lakpa yemi, nɛ e kɛ e nyɛmi nɛ tu anɔkuale, ejakaa nɔmlɔ tso kake he níhi ji wɔ tsuo, nɛ ke wa ngɛ wa bi lakpa yee ɔ, wa ngɛ wa he awi yee. 26 Nɛ ke nyɛ na abofu ɔ, nyɛ ko pee yayami; nɛ nyɛ ko ha nɛ pu nɛ nɔ si ngɛ nyɛ abofu ɔ nɔ, se mohu nyɛɛ ngmɛɛ he nɔuu. 27 Ke pi ja a, Abosiami ma na nyɛ he blɔ.

28 Nɛ jehanɛ ɔ hu, ke julɔ ko ngɛ nyɛ kpɛti ɔ, e ko ju hu, nɛ e kɛ e nine nɛ tsu ni tsumi kpakpa konɛ e kɛ ye kɛ bua nihi nɛ ngɛ fimi mi ɔ. 29 Nyɛ ko ha nɛ munyu yaya ko nɛ je nyɛ nya, se mohu nyɛɛ sɛɛ ni kpakpa nɛ he maa ba se nami kɛ ha nyɛ bi, konɛ e pee dloomi nɔ́ kɛ ha mɛ.

30 Nyɛ ko ha nɛ nyɛ je mi bami nɛ pee nɔ́ nɛ maa dɔ Mumi Klɔuklɔu ɔ. Ejakaa lɛ nɛ e yeɔ nyɛ he odase kaa Mawu bimɛ ji nyɛ. Nɛ e ji nɔ mi mami nɔ́ kaa nyɛ maa ye nyɛ he ngɛ Kojomi Ligbi ɔ nɔ.

31 Nyɛ ha nɛ mi mi doomi tsuo kɛ mi mi la kɛ abofu kɛ pɛ kɛ ninyɛ kɛ munyu yaya tumi kulaa se nɛ po ngɛ nyɛ kpɛti. 32 Se mohu, nyɛ mi mi nɛ jɔ, nɛ nyɛ na nyɛ si bi a he tsui, nɛ nyɛɛ ngɔ nyɛ si bi a tɔmihi kɛ ke mɛ, kaa bɔ nɛ Mawu hu ngɔ ke nyɛ benɛ nyɛ plɛ Kristo nihi ɔ.