1 Awu ndo ulagilagi wa Mtuwa Mlungu wakankiti Habakuki yakaweriti mbuyi gwa Mlungu.

2 Gwee Mtuwa Mlungu, hanikuliliri mpakandii na gwenga gumpikanirandiri na kuntanga? Tutenderwa madoda! Kumbiti gutulopolandiri. 3 Hashi guntenda moni mirandu midoda na ntabiku? Ndewi na uhalibisiya vinzyengeta na masinganu galawira. 4 Hangu lagiru lyahera makakala na haki itendwandiri. Wakontola wawakanka wana haki, hangu haki ipotuziwa.

5 Mtuwa Mlungu katakula. Guloli wantu wa isi zimonga na guwoni, hagutili na kulikangasha. Toziya mumashaka gaku gakulikala nankutenda shintu sheni mewakugambiri megwaminindiri. 6 Mana haniwongeleri makakala Wababeli, wantu awa wakalipa na yawatenda kalongola, weni wapita muisi yoseri irii su kulopola pahala pamonga. 7 Womberi ndo wantu kukalaziya na wakuliziya, wajimirandiri lagiru loseri ila wajimira lagiru lyawu weni hera.

8 Farasi wawu wayewuka kutuga kuliku duma, wamashonta wawu wakalipa kuliku wang'ang'a wa kuntundu yawana njala. Wakwena farasi wawu walawa kutali na wayewuka kuwakomanga wankondu wawu handa kapungu ntambu yakagulukira mawinga.

9 Woseri wankwiza kutenda unkesera pawawera na vyeni vyavitiliziya, wagenda kulongolu na wajojonira lopola zivuwa handa mhanga. 10 Wawajongera wafalumi na kuwaseka wakolamlima. Kila liboma walibeziya na walimamatira litapaka na kulilopola. 11 Shakapanu wagenda kulongolu handa lyega, watenda vidoda na kuwera na madoda, toziya mlungu kawatenda waweri na makakala.

12 Hashi, gwenga gwa Mtuwa Mlungu ndiri, kwanjira makashu? Gwenga ndo Mlungu gwangu, mnanagala gwangu, yaguhowa ndiri, Mtuwa Mlungu guwasyagula Wababeli watutozi, gwenga litalawu lyangu, guwagangamaziya su watukomangi. 13 Nakaka gwenga gwa mnanagala, hapaguwezi kulola ukontola na guwezandiri kunyamalira kuwona madoda. Iwerahashi guwawona wankutenda makontola na kunyamala? Iwerahashi vinu gulikalajii shaka wantu wadoda pawawamira wantu yawana haki kuliku womberi?

14 Guwatenda wantu handa wasomba mubahari na handa viwumbi vyavikwawakwawa na vyavyahera na mkolamlima? 15 Wababeli wawalowa wantu kwa ndowanu na wawajojonira woseri mushombu shawu, shakapanu wanemelera na kufyapilira. 16 Hangu wazitambikira nyavu zyawu na kuzitumizilira ubani, toziya nyavu zawu azi ziwapanana shiboga shiherepa.

17 Hashi hawendeleyi kulikomanga nkondu? Na hawendereyi kuwabata wantu na kuwagamiza wantu wa isi zimonga pota lusungu?