1 Aga ndo maluwa ga mtambika Habakuki.

2 Gwe Mtuwa Mlungu, Mpikanira zyuma zyaku

na matendu gaku na neni ntira.

Guyitendi kayi mirandu ayi shaka shetu, guyitendi imaniki shaka ashi,

pagukalala tukuluwa gutuwoneri lusungu.

3 Mlungu kiza kulawa Temani

Mlungu Mnanagala kiza kulawa lugongu Parani

Uweru wakuyi umema poseri kumpindi

na wantu woseri wamzyumi yomberi.

4 Ung'eleng'eta wakuyi handa wa mshenji yagulawa

miyali imulikiti kulawa mumawoku mwakuyi

peni makakala gakuyi gafifitwi.

5 Kagalagaliriti malweri kulongolu kwakuyi,

na kuhowa kwiza kumberi kwakuyi.

6 Pakagoloka isi itikinyika;

kaloliti na kutenda wantu walendemeli.

Migongu migona imegwamegwa na

vigongu vyavimanika viguwa,

njira zakuyi ndo zamashaka goseri.

7 Niwawoniti wantu wa Kushani wamuntabiku

na wantu wa Midiani pawalendemera

8 Gwee Mtuwa Mlungu, hashi guyikalaliriti mishemba?

Hashi gugakalaliriti mashi ga bahali

shaka pagwendeshiti farasi

na mbutuka zyaku kugenda kukanka?

9 Guwutuliti kala upindi waku

kala kwa kuguma

na kuyipanta isi kwa nshemba.

10 Migongu ikuwoniti ilendemera

mashi yagalawiti kumpindi gapita amu.

Matiwa ga bahari galaviyiti liziwu

na kugulusiya makupala gakuyi.

11 Kumpindi mshenji na lyezi vinyamaliti jii

paviwoniti langala ya misali yaku payigenda kalongola,

yina muwung'eleng'etu wa mgoha gwaku.

12 Kwa maya gupititi paisi

guwatimbangiti wantu wa isi zoseri kwa maya gaku.

13 Gwiziti kuwalopola wantu waku

kumlopola ulii yagumsyaguti kwa kumswaga lipaki.

Gumlemiti mlonguziya gwa isi ya ukontola

na guwaagamiziya nakamu yawamfata.

14 Gumsomiti kwa misali mlonguziya gwa lishonta

shaka lishonta paliziti gambira lipuga kutupalasiya,

pawalitumba kwa kuwalaga wantu wahushu mwawalififiti.

15 Gutimbiti bahali kwa farasi waku,

makupala yagagolokandiri.

16 Pampikaniriti aga moyu gwangu guweriti na lyoga

milomu yangu itetemekiti kwa lyoga, pampikaniriti liziwu,

nanja kulwala mumihonju yangu

na magulu gangu gasinditi kugendagenda.

Hangu hahepeleri lishaka lirii lya ntambiku,

lyaliwizira walii yawatukomanga.

17 Payiwera tini ilaviyandiri uluwa

ama mizabibu kulerandiri zabibu,

na mizeytuni payilerandiri zeituni

na malambu pagalaviyandiri shiboga

ata kondolu woseri pawafuwa

ama mifugu meyifuwi mulizizi,

18 neni hanendeleyi kumfyapilira Mtuwa Mlungu,

hanimnemeleri Mlungu mlopola gwangu.

19 Mtuwa Mlungu ndo makakala gangu.

Kagagangamaziya magulu gangu gambira ga mbawala

kantenda weri poneka pampindi pa migongu.