1 Neni hangoloki mushindwalingu, handoli moni shakafira kung'ambira na lyankulu gaa lyanandaviyi kuusu kulalama kwaneni.

2 "Shakapanu Mtuwa Mlungu kanankula hangu, gulembi galii ganfira kukulanguziya na gugatendi mwaziwu pampindi pa vibawu, su yakapita panu kapati kugasoma." 3 Gulembi galii ganikulangaziyiti, toziya shaka shakuyi badu shakwiza. Kumbiti shaka shakuyi shankwiza kalongola na ganikulanguziyiti hagaweri nakaka. Na paguwona gakawalira gwenga guwuheperi, nakaka hagizi na hapeni gakawaliri. 4 Gwandiki, yoseri yakana mtiti hakagamiri, kumbiti yakana haki hakalikali kwa njimiru yakuyi.

5 "Pamuhera na aga, divayi ipotiziya, muntu yakana mtiti kalikalandiri mnumba mwakuyi, kongera matamata gakuyi handa kwawahowiti, yomberi kawera handa mawuti, kawezandiri kwikutuziwa, ila kalijojonira maisi goseri, kalitulira makabila goseri vipinga vipinga." 6 Kira muntu hakawajongeri wantu wa ntambu ayi na kuwimbira nyimbu za kuwashinigira. "Shondi mwenga yamulimamatira vintu vyaviwitwi na kulimamatira vintu kwa makakala. Hagwendeleyi kutenda hangu mpakandii?"

7 Hashi yawakushonga hapawakwiziri vumu? Hashi hapawakutendi gulendemeri? Shakapanu hawakubati guweri mlopola gwawu. 8 Toziya gwenga gupoka lunda za wantu wa maisi gamonga, kumbiti woseri yawaponeka hawakupoki gwenga, toziya ya malaga na madoda yagugatendiriti isi na miji na wenikaya wakuyi woseri.

9 Hagushiwoni gwenga yagulimatila lunda kwa kumtenda yumonga na yagunyawa numba yaku pampindi pa migongu, pagulihola kuwera gwa ponga. 10 Kumbiti kwa mipangu yaku yiwagamiziya wantu wavuwa, guyisoniziya kaya yaku na gugaagamiziya makaliru gaku gamweni. 11 Kwa kutenda hangu ata mabuhi ga mushibambaza hagakulalamikiri na boriti hazitendi ntambuiraayi.

12 Hagushiwoni gwenga yagunyawa mji kwa kulaga wantu na kwanjisha mji mkulu kwa makontola. 13 Ntambugaa, Mtuwa Mlungu Yakana Makakala katenda mahengu ga wantu gagamiri mumotu na maisi gamonga galishenyiyi hera? 14 Kumbiti pasipanu hapamemiziwi mahala ga uweru wa Mtuwa Mlungu, handa mashi ntambu yageneya mubahari.

15 Hagushiwoni gwenga yaguwalowiziya wapakwegera waku na kuminta kulawa mushiliba chawatula simika mudivayi yawu su gupati kuwawona pawawera shivula. 16 Haguweri na soni pota hapagupananwi ligoya. Hagulandi gamweni na kukwakatika. Mtuwa Mlungu hakakulewiziyi, soni hayiyigibikili ligoya lyaku. 17 Makontola gaguwatendiriti wantu wa Lebanoni hagakuwuyiri gamweni na matendu gaku ga kuwalaga wankanyama hagakutiriziyi. Goseri aga hagakukankali gwenga, toziya ya malaga yagugatenditi muisi, miji na wenikaya wakuyi woseri.

18 Shinyagu shakanyawiti muntu shana mana gaa, shinyagu ndo mabuhi hera yagayeyushitwi, ndo shintu sha kupalasiya upotuziya. Toziya mnyawa shinyagu kalidumbira shakanyawiti mweni, ashi ndo shinyagu shashiyowerandiri. 19 Hakashiwoni muntu yakalugambira lugogu. "Gwimuki!" Ama kuligambira libuhi "Gwimuki!" Hashi shinyagu shiweza kumfunda Muntu? Guloli shinyagu shityeremeziwa zahabu na feza, kumbiti shahera ata ukomu.

20 "Kumbiti Mtuwa Mlungu Kamunumba yakuyi nanagala na wantu woseri wanyamali jii kulongolu kwakuyi."