1 Awu ndo ujumbi ulii Mtuwa Mlungu kampananiti Yoweli mwana gwa Petueli.

2 Mwenga wakulu wa Israeli, mpikaniri ujumbi awu, mwenga mwawoseri yamulikala muisi ayi mpikaniri weri!

Mpikaniri wantu woseri wa Yuda!

Hashi, shitwatira shilawiriti mumakaliru genu,

ama shaka sha wazewi wenu?

3 Muwatambiri wana wenu ujumbi awu,

nawomberi wawatambiri wana wawu,

na wana wawu washitambiri shiyuwuku shashiza.

4 Waving'ongolu, vipinga kwa vipinga waliyiti vimeru vyoseri,

su shashilekituwi na wanjombi, shiliyituwi na tunutu,

shashashilekituwi na tunutu, shiliyituwi parare,

shashilekituwi na parare shiliyituwi na matapa. 5 Mwenga yamlowela, mwimuki!

Na mwenga yamlanda divayi mlili,

toziya zyabibu zyoseri ziharabisiwa na hapeni mpati divayi ya syayi kayi. 6 Shonta lya wanjombi liliingilira isi yangu,

liwera na likakala likulu na hapeni liwalanguwi,

malinu gawu gawera gambira ga simba,

na malinu makulu gakuwi gawera gambira simba gwa shidala.

7 Liharabisiya mizyabibu yatwenga,

na kuiliya mitera yetu ya tini.

Likobola mabaku gakuwi,

na mitambi yakuwi ilekuwa hera.

8 Mliri gambira kamwali yakavaliti malobota,

pakadaya kuhowa kwa muheta gwakuwi.

9 Malaviwu ga viboga na malaviwu ga vilandiru kwahera mnumba mwa Mtuwa Mlungu.

Watambika yawatenda lihengu kulongolu kwa Mtuwa Mlungu, wankudaya.

10 Malambu gasigala lupala hera,

isi yankudaya,

toziya viboga ziharabisiwa,

divayi yasyai iyuma,

lipaki lya mizyetuni kwahera nakamu.

11 Mdayi mwenga walimi,

mbotangi mwenga yamlolera mizyabibu.

Nganu pamuhera na mpunga ziharabika,

toziya mabenu goseri ga mumalambu gahagamira.

12 Mizyabibu inyala na mitera ya tini iyuma,

mitera ya komamanga na mitendi na mitera ya tini inyala,

mitera yoseri ya mabwajubwaju iyuma.

Nemeleru ya wantu iwuka.

13 Mwenga watambika, mvali malobota na mdayi,

mliri mwenga yamtenda lihengu pahala pa kutambikira.

Mwingiri Mnumba nkulu mwakadayi pashiru poseri!

Tambiku zya viboga pamuhera na vyakulanda kwahera mnumba ya Mlungu.

14 Muwalagaliri wantu woyi kuliya,

muwashemeri wantu wizi mumikutanu.

Muwashemi wazewi pamuhera na wantu woseri muisi ya Yuda,

Mnumba nkulu ya Mtuwa Mlungu gwenu,

amu mwakamliliri.

15 Shondi twenga kwa lishaka lya Mtuwa Mlungu,

lishaka ali lya Mtuwa Mlungu lyapakwegera,

lyankwiza pamuhera na maagamiziwu,

kulawa kwa Mlungu yakawera na makakala.

16 Viboga vyetu viharabisiwa uganu patulola.

Nemeleru na kuseka viwusiwa ukaya kwa Mlungu gwetu.

17 Mbeyu zyankuwola mulitapaka,

hanja zya viboga ushiwa hera,

hanja ziharabisiwa

kwa kukosa viboga vya kutulira.

18 Wankanyama ntambu yawalila nentu kwa hinginiku!

Vipinga vya wang'ombi vyankuyerayera,

toziya kwahera mahamba ga kuliya,

ata vipinga vya wakondolu vyankutabika.

19 Nukulilira gwenga, gwee Mtuwa Mlungu,

moto gumalira mahamba ga kuntundu,

mimbamba ya motu ilunguziya mitera mumalambu.

20 Ata wankanyama wa kuntundu wankukulilira gwenga,

toziya nshemba zya mashi ziyuma,

motu gumalira mahamba ga kuntundu.