1 Mtuwa Mlungu kalongiti, nakaka mumashaka galii,

panuitenda weri ntambu ya Yuda na Yerusalemu, 2 hanuzijojoniri isi zoseri mulilaranda lyalishemuwa,

Mtuwa Mlungu katozi.

Kulii hanuwatozi womberi

kwa woseri vyawawatendiriti kwa wantu wangu,

toziya wapalanganyiki pakati pa isi zya shihenga

na wabagulaniti Israeli isi yaneni 3 na kubagulana wantu waneni yawakamulituwi mungondu kwa kuzigalambula simbi.

Wawashuwuziti wantemba kupata mpiya zya kulipila undiyandiya,

wawashuwuziti wahinga su kupata mpiya zya kuhemera ujimbi.

4 Hashi, mfira kuntenda shishi mwenga Tiru na Sidoni na mwenga woseri mikowa ya Filistia? Hashi, mwenga mfira kuwuzilira neni kwa shilii shantenditi? Handa mwenga mwankumbuzilira, neni hanuwawuziliri kwa shilii shamtenditi. 5 Mwenga mtola madini gangu ga mpiya na zahabu, na kuvitola vintu vya neni vya beyi nkulu na kuvijega mpaka kunumba zyenu za kuwaguwira milungu wenu. 6 Mwenga muwashuwuza wantu wa Yuda na Yerusalemu kwa Wagiriki, muwajega kutali na isi zyawu. 7 Vinu, neni nankugenda kuwawuziya wantu wangu kulawa aku kwamshuwuzirituwi, hanuwawuzilili vyoseri vyamuwatendiriti. 8 Hanuwatendi wana wapalu wenu na wahinga wawashuwuzi kwa wantu wa Yuda, womberi hawawashuwuzi kwa wantu wa Sheba na wantu wa isi zya kutali nentu. Neni Mtuwa Mlungu ntakula aga.

9 Muwabweleri wantu wa isi shitwatira ashi.

Mulitandi kwa ngondu,

muwashemi wavikambaku wenu,

wanjagira woseri wajojoniki wagendi kulongolu.

10 Magembi genu mgapondi gaweri magumba,

hengu zyenu zya kubenela ziweri migoha.

Ata yakawera legilegi su kalongi,

neni viraa nashikambaku. 11 Mwizi kalongola, mwenga isi zoseri kulawa kila wega,

mjojoniki aku kulilalanda.

Gwee Mtuwa Mlungu, gujegi wamashonta waku wawakomangi ngondu.

12 "Isi zilitandi kala,

waizi mulilalanda lyalishemuwa,

Mtuwa Mlungu katozi.

Aku neni Mtuwa Mlungu,

hanulivagi kuzitoza isi zyoseri zya pakwegera.

13 Su mtoli hengu zya kubenela,

toziya vinu ndo shaka sha mabenu.

Mwingili! Muwakamiri gambira zyabibu

zyazimema pahala pa kukamira,

toziya ukondola awu uwera mkulu

gambira vulu vyavimemiti nduu."

14 Wankusoka vipinga vikulu nentu kwa vipinga vikulu nentu

kulilalanda lya utoza,

toziya shaka sha Mtuwa Mlungu sha kutoza shapakwegera. 15 Mshenji na lyezi havituluwi luwindu,

ntondu hazileki kulangala.

16 Mtuwa Mlungu hakagugumi aku Sayuni,

na liziwu lyakuwi gambira lupanda kulawa Yerusalemu,

kumpindi na pasipanu vyankulendemera.

Kumbiti Mtuwa Mlungu ndo tugiru ya wantu wakuwi,

kawera liboma lya kuwalolera wantu wakuwi Israeli.

17 Shakapanu mwenga wantu wa Israeli hamuvimani kuwera neni Mtuwa Mlungu, Mlungu gwaku

nankulikala Sayuni, mulugongu lwangu lunanagala.

Yerusalemu haluweri lushi lunanagala,

na wahenga hapeni walulingilili kayi amu.

18 Shaka ashi, migongu haimemi mizyabibu,

na muvigongu hakuweri na wankanyama yawalaviya maweri.

Nshemba zyoseri zya Yuda hazimemi mashi,

na mbwiru hazilawili kunumba nkulu ya Mtuwa Mlungu,

na kulitilira lulalanda lwa Shitimu.

19 Misri haiweri ushiwa,

na Edomu haiweri shiwala,

toziya ya ungondu yaitendituwi na wantu wa Yuda,

na kuwalaga wantu wavuwa yawatendi ndiri shintu shidoda.

20 Kumbiti isi ya Yuda haikaliluwi na wantu mashaka goseri,

na Yerusalemu hailikali shiyuwuku mpaka shiyuwuku. 21 "Hanuwazibu yawalagiti wantu wa Yuda

hapeni nuwaleki yawawera na likosa.

Neni Mtuwa Mlungu, nilikala Sayuni."