1 Mgombi mbalapi aku Sayuni,

mgombi ng'oma ya ngondu kulugongu lunanagala!

Mlendemeri mwenga wenikaya wa isi ya Yuda,

toziya lishaka lya Mtuwa Mlungu lyankwiza,

lishaka ali lyapakwegera!

2 Ali ndo lishaka lya luwindu na hinginiku,

lishaka lya mawundi na ntiti totolu.

Shonta likulu la wanjombi lyapakwegera

gambira luwindu lyaligubika mumigongu.

Ntambu ayi hayenipati kuwera nakamu

na hapeni liwoneki kayi

muviyuwuku vyaviza. 3 Gambira motu ntambu yagulunguziya nakamu

shonta ali lyankuharabisiya kila shintu kulongolu kwakuwi

na kuleka kumberi kila shintu shankuharabisiwa.

Pamberi hawenipiti, isi iwera gambira shiwunga sha Edeni,

kumbiti pawapita kala, isi iwera shiwala hera.

Kwahera shashiweza kuwashapira!

4 Wawoneka gambira nkanyama falasi,

wankutuga gambira falasi gwa ngondu.

5 Pawagulukaguluka pavigongu,

liziwu lyawalaviya liwera gambira mbutuka zyakukeguwa na falasi,

wankupikanika gambira miberegi iyuma yaipambiruwa mumotu.

Walitula weri gambira shonta likulu

wawera kala kulikomanga ngondu.

6 Wantu pawona pawawiza,

su wawera na lyoga nentu na kulendemela.

7 Wankulikomanga ngondu gambira wakanka wa ngondu,

wankukwena muvibambaza gambira wanjagira.

Woseri wankugenda kulongolu pota kuwuya kumberi,

pota na yumu gwawu kugalambula njira.

8 Kwahera yakamsukumiza muyaguwi,

kila yumu kasakula munjira yakuwi nakaka.

Wankupita pakati pa vidiwiru vya vikomaniru,

kwahera shashiweza kuwapingila.

9 Wankululingilira lushi,

wankutuga mbiru muvibambaza.

Wankwingira mnumba zyoseri gambira wapoka ntambu yawingira mumadirisha.

10 Isi yankulendemera kulongolu kwawu,

kumpindi kwankutikinyika.

Mshenji na lyezi viwera na luwindu,

na ntondu zankuleka kulangala.

11 Mtuwa Mlungu kankugalagalira mashonta gakuwi kwa liziwu,

wanjagira wakuwi wavuwa nentu yawamjimira na wawera na makakala.

Lishaka lya Mtuwa Mlungu, nakaka ndo likulu na lya kutiriziya nentu!

Gaa hakawezi kupona?

12 "Mtuwa Mlungu kalonga hangu, muwuyiri neni kwa moyu gwenu gwoseri

kwa kwoya kuliya, kulira na kudaya."

13 Nampapula nguwu zyenu hera,

kumbiti mpapuli myoyu yenu viraa.

Mumuwuyiri Mtuwa Mlungu, Mlungu gwenu,

toziya mweni kamema manemu pamuhera na lusungu,

yomberi kakalala ndiri kalongola, mweni kamema ufiru,

mashaka goseri kakala kulegeziya na hapeni kazibu.

14 Pamonga gaa yakavimana kuwera Mtuwa Mlungu, Mlungu gwetu, hakagalambuli nfiru

na kuwapanana matekeleru ga viboga,

su hamuwezi kumlaviliri tambiku za viboga pamuhera na virandilu.

15 Mgombi mbalapi aku Sayuni!

Mlagaliri wantu woyi kuliya,

muwashemi wantu mumkutanu.

16 Muwajojonili wantu woseri,

muwatuli wantu kwajili ya lihengu lya Mtuwa.

Muwajegi pamuhera wakulu na wana na ata wanonu.

Mpalu gwa ndowa pamuhera na mdala gwa ndowa walawi muviwogu vyawu.

17 Watambika yawatenda lihengu kulongolu kwa Mtuwa Mlungu, walili pakati pa ligomi lya Numba nkulu ya Mlungu na pahala pa kutambikira.

Womberi waluwi, guwawoneri lusungu wantu waku, gwee Mtuwa Mlungu.

Naguzileka isi zimonga wawasoniziyi,

nagutenda isi zimonga wawakolimlima wantu waku

na kuwatendera lidufiya pawalonga,

hashi, kakoshi Mlungu gwawu?

18 Shakapanu Mtuwa Mlungu kaifiriti isi yakuwi

kawawonera lusungu wantu wakuwi.

19 Yomberi kapikaniriti na kawankuliti maluwa gawu pakalonga,

"Vinu hanuwapanani kayi viboga na divayi ya syayi na lipaki lya mizyetuni,

vyoseri vyakuwatosha mwenga,

hapeni nuwatendi mwenga wawatenderi lidufiya kayi kulawa kwa isi zyamonga.

20 Hanuwawusi wankondu awa yawalawa kushana,

hanuwatendi watugi mpaka kushiwala,

wanjagira wa kulongolu hanuwasili kubahali ifuwa,

na walii wanjagira yawawera kumberi hanuwawasili mubahali ya mediteraneya.

Hawalaviyi shivundu na kununka,

awa yawatenditi ukondola mkulu."

21 Nagutira, gwee isi,

su gusekeleri na kunemelera.

Nakaka Mtuwa Mlungu katenditi vitwatira vikulu.

22 Namtira, mwenga wakanyama wakuntundu,

mahamba ga kuliya ga kuntundu gawera gaherepa,

mitera yankulera mabwajubwaju gakuwi,

mizyabibu pamuhera na mitera ya tini yankulera nentu.

23 Mnemeleri mwenga wantu wa Sayuni,

mnemuki toziya ya Mtuwa Mlungu, Mlungu gwenu,

toziya kawapanana mvula ya masika,

kawapanana mvula ivuwa.

Mvula za masika na mvula za vuli gambira kwanja.

24 Pahala pa kupetera hapamemi viboga

pahala pa kukamira hagamemi divayi na lipaki lya mizyetuni. 25 Hanuwawuziliri mivinja ilii yailiwituwi na wanjombi,

na kila shintu shashiliwituwi na tunutu na parare na matapa,

shonta ali likulu lyanilijegiti kwa mwenga. 26 Hamliyi viboga mpaka mwikuti na kuleka,

hamlikwisuwi litawu lya Mtuwa Mlungu, Mlungu gwenu,

yakawatenderiti vitwatira vya kulikangasha.

Wantu wangu, nakaka hapeni wasoniziwi.

27 Shakapanu hamuvimani kuwera neni napamuhera na Israeli,

kuwera Namtuwa Mlungu, Mlungu ngwaku, kwahera gwingi,

kayi hapeni wantu wangu wasoniziwi.

28 Shakapanu pa aga,

neni hamiminili Rohu gwangu kwa wantu woseri.

Wana wenu wapalu pamuhera wahinga wenu hawatungi,

wagogolu wenu hawaloti ndotu kulawa kwaneni,

na wantemba wenu hawawoni mawonu.

29 Ata kwa wantumintumi wangu wapalu na wadala,

hanuwamiminiri Rohu gwangu mumashaka aga.

30 Hananguziyi makangashu kumpindi na pasipanu,

hakuweri na mwazi na motu na minara ya lyosi.

31 Mshenji hagutuluwi ntiti,

na lyezi haliweri lisheri gambira mwazi,

pamberi pa kusoka lishaka lya Mtuwa Mlungu,

lishaka lilii lyaliwera likulu na lya kutiliziya. 32 "Panu wantu woseri yawaluwa kwa litawu lya Mtuwa Mlungu, hakalopoziwi.

Toziya kulugongu lwa Sayuni na Yerusalemu,

hakuweri na wantu yawashapira,

ntambu yanongiti neni Mtuwa Mlungu."