1 Yesu kiwukiti mumji gwa Betirehemu, muliboma lya Yudeya, shaka Herodi pakaweriti mfalumi. Kamkamu hera pakiwukiti kala, wantu wana malifa ga ntondu wiziti kulawa kwagulawa mshenji kwa kutali wasokiti Yerusalemu, 2 wakosiyiti, "Kakoshi mwana, Mfalumi gwa Wayawudi yakiwukiti? Tuyiwona ntondu yakuyi kulawa kwagulawa mshenji, na twiza kumguwira yomberi."

3 Mfalumi Herodi pakapikaniriti aga, kalisheriti, yomberi pamuhera na woseri yawalikala Yerusalemu. 4 Su kawashemiti watambika wakulu woseri pamuhera na wafunda wa Malagaliru na kuwakosiya, "Kristu Mlopola kiwuka koshi?"

5 Womberi wamwankula, "Kiwuka mumji gwa Betirehemu, muliboma lya Yudeya. Hangu ndo ntambu yawalembiti wambuyi wa Mlungu,

6 ‘Gwee Betirehemu isi ya Yuda,

Gwenga gwa mdidini ndiri mulushi lumanikana lwa Yudeya,

Toziya kwa gwenga hakalawili mlongoziya njira,

Yakawalongoziya wantu wangu Israeli.’ "

7 Su Herodi kawashemiti kwa bada wahenga yawalawiti kwagulawa mshenji, kawakosiyiti shaka sheni ntondu payiwalawiriti. 8 Shakapanu kawagambiriti wagendi Betirehemu pakalonga, "Mgendi mwakaloli weri visoweru vya mwana ayu, pamvimana kala munjegeli visoweru su naneni hang'endi kumguwira."

9 Pawampikaniriti kala mfalumi, wamana ntondu walii wagenditi. Su ntondu ilii yawayiwoniti kwagulawa mshenji iwalonguleliti mpaka igenda kugoloka pahala palii pakaweriti mwana. 10 Pawayiwoniti ntondi ilii wanemeleriti nentu. 11 Su, wingiriti mnumba, wamwoniti mwana ulii pamuhera na Mariya mawu gwakuyi, wasuntama pasi na wamguwira. Shakapanu wavugula na kumupanana mafupu gawu ga zahabu na ubani na manemane.

12 Mlungu kawabeliziyiti mumpota nawamwuyira Herodi, su wawuyiti kuisi kwawu kwa njira yamonga.

13 Pawawukiti kala wahenga walii, malayika kamlawiriti Yosefu mukulota, kamgambiriti, "Gwimuki! Gumtoli mwana pamuhera na mawu gwakuyi, mtugili Misri. Mulikali kulii mpaka panikugambira, toziya Herodi kafira kumlaga mwana ayu."

14 Su, Yosefu kimukiti, kamtola mwana pamuhera na mawu gwakuyi, kawukiti pashiru kugenda Misri. 15 Kalikaliti kulii mpaka pakahowiti Herodi. Mlandu agu gutendikiti su shisoweru shakatakuliti Mtuwa kwa njira ya mbuyi gwa Mlungu shitendeki, "Nimshemiti mwana gwangu kulawa Misri."

16 Shakapanu Herodi pakavimaniti wahenga walii yawalawiti kwagulawa mshenji wamzyanga, kakalariti nentu. Kalagaliriti wanonu woseri wapalu mumji gwa Betirehemu na mumpeku mwakuyi yawawera na umuli wa vinja viwili na pasi pawu walagwi. Katenditi hangu kulawirana na shilii shakamaniti kulawa kwa wahenga walii wamana ntondu.

17 Hangu ndo ntambu ya vitimiyiti visoweru vya umbuyi wa Mlungu kwa njira ya Yeremiya mbuyi gwa Mlungu,

18 "Liziwu lipikanika aku Rama,

Shiwembu na kudaya kuvuwa.

Raheri kankuwalilira wana wakuyi,

Na kafira ndiri kunyamala,

Toziya woseri wahowa."

19 Herodi pakahowiti kala, malayika kamlawiriti Yosefu mukulota Misri kulii, 20 kamgambira, "Gwimuki! Gumtoli mwana pamuhera na mawu gwakuyi muwuyi muisi ya Israeli toziya woseri yawafiriti kumlaga mwana, wahowa kala." 21 Su Yosefu kimuka, kamtola mwana pamuhera na mawu gwa mwana na wawuya Israeli.

22 Kumbiti Yosefu pakapikaniriti handa Arikerawu, mwana gwa Herodi kaweriti mfalumi gwa Yudeya pahala pakakolitimlima Herodi tati gwakuyi, katiliti kugenda kulii. Nayomberi, pawambereziyiti mukulota, su kagenditi wega zya Galilaya 23 na kalikaliti mlushi lwawalushema Nazareti. Hangu ndo ntambu yavitimiyiti visoweru vyakalongiti mbuyi gwa Mlungu, "Hawamshemi Mnazareti."