1 Shakapanu Rohu Mnanagala kamlonguziyiti Yesu kushiwala su kajerwi na Shetani. 2 Kaliyitindiri kwa mashaka alubayini pashiru na paluwala, shakapanu Yesu kaweriti na njala. 3 Su Shetani kamwiziriti, kamgambira, "Handa gwenga nakaka gwa Mwana gwa Mlungu, gugagalambuli mabuwi aga gaweri mabumunda."

4 Yesu kamwankuliti, "Malembu galonga, ‘Muntu hapeni kalikali kwa kuliya libunda hera, kumbiti kwa kila shisoweru shakatakula Mlungu.’ "

5 Shakapanu Shetani kamtoliti mpaka Yerusalemu, Mji Mnanagala na kamtuliti pashitwiku sha Numba nkulu ya Mlungu Nananagala, 6 kamgambiriti, "Handa gwenga nakaka gwa Mwana gwa Mlungu, gulyasi pasi, toziya malembu galonga,

‘Mlungu hakawagambiri malayika wakuyi kuusu gwenga,

Hawakutoli mumawoku mwawu,

Nagulikwala mumabuwi’ "

7 Yesu kamgambiriti, "Kumbiti Malembu galonga viraa, ‘Nagumjera Mtuwa, Mlungu gwaku.’ "

8 Shakapanu Shetani kamtoliti mpaka pampindi nentu palugongu na kamlanguziyiti falumi zoseri zya pasipanu na ulunda wakuyi. 9 Kamgambiriti, "Hanikupanani gwenga goseri aga, handa pagusuntamala pasi na kunguwira neni."

10 Palii Yesu kamgambiriti, "Gugendi zyaku Shetani! Malembu galonga, ‘Hagumguwiri Mtuwa Mlungu gwaku na kumtendera yomberi gweka yakuyi!’ " 11 Shakapanu, Shetani kamleka Yesu na wantumintumi wa kumpindi wa Mlungu wiziti kumtanga.

12 Yesu pakapikaniriti handa Yohani wamtula muligeleza, kagenditi mpaka Galilaya. 13 Kawukiti Nazareti, kagenditi Kafarinaumu, mji yaguweliti mump'eku mwa bahali ya genisareti, mumpaka mwa Zebuluni na Nafutari kalikala aku. 14 Hangu ndo ntambu yashitimiyiti shisoweru sha Mlungu shakatakuliti kwa njira ya Isaya mbuyi gwa Mlungu,

15 "Isi ya Zebuluni na isi ya Nafutari,

Kuyigendera bahali, kumwambu kulushemba Yoridani,

Galilaya, isi ya wantu yawawera ndiri Wayawudi!

16 Wantu yawakaliti muntiti

Wawona kulangala kukulu.

Na woseri yawalikaliti muisi ya ntiti na shivinyiru sha kuhowa

Kulangala Kuwalangalira."

17 Kwanjira shaka shilii Yesu kanjiti kubwera pakalonga, "Mleki vidoda, toziya Ufalumi wa kumpindi wapakwegera!"

18 Yesu pakaweriti kankugendagenda kumbeku kulitanda lya Galilaya, kawawoniti walongu wawili yawaweriti walowasomba, Simoni yawamshema Peteru na mlongu gwakuyi Andereya, waweriti wankulowa wasomba mulitanda kwa wavu. 19 Yesu kawagambiriti, "Munfati, naneni haniwatendi mwenga muweri walowa wa wantu." 20 Kamukamu hera wazilekiti navu zyawu, wamfatiti.

21 Pakagenditi kulongolu kidogu, kawawoniti walongu wamonga wawili, Yakobu na Yohani, wana wa Zebedayu. Waweriti wa muuwatu pamuhera na tati gwawu Zebedayu wankuzinyawa navu zawu. Yesu kawashemiti, 22 palaa palii waguleka uwatu pamuhera na tati gwawu na wamfatiti.

23 Yesu kagenditi mu Galilaya yoseri, kafunditi mnumba za Mlungu na kabweriti Shisoweru Shiwagira sha Ufalumi na Kaponiziyiti wantu yawawera na malweli ga ntambu zoseri. 24 Visoweru kuusu Yesu vyeniyiti muisi yoseri ya Siriya, su wantu woseri yawawera na malweli na yawalwala malweli ga ntambu zoseri na ntabiku, wantu yawawera na washamshera na wantu yawawera na visirika na wantu yawaweriti wahushu, wawajegiti kwa Yesu na kawaponiziyiti woseri. 25 Lipinga likulu lya wantu limfatiti kulawa Galilaya, isi zya miji kumi, Yerusalemu na Yudeya na kumwambu kulushemba Yoridani.