1 Timóteo 2

भक्‌ती ना बारा मे ह़ला

1 अने मे आखा सी पेले आहयी अगवाय करु, के रावण्‌या, वीन्‌ती अने आखा ने केम के आखा माणहु नी करते भगवान ने घणो वारु से केवा जोवे। 2 राजा अने आखा उचा पद वाळा अदीकार्‌या ह़ाते आनीन करते के आपणु सांती अने अराम भेळ भगवान नी ईज्‌जत करता जाय्‌न चोखलापण नी जीवाय जीवया। 3 आहयु वारु बी से अने आपणा छुटकारो आपवा वाळा भगवान ने खुस करे। 4 तीनी आहयी मरजी से, के आखा माणहु नो छुटकारो हये; अने तीहया सच्‌चाय ने आखा भाते जाण लेय। 5 काहाके भगवान एकीत से: अने भगवान अने माणहु नी वच मे बी एकीत वचा-वच से, अने आहयो मसी ईसु जे माणेह से। 6 तीहयो आह़फोत आह़फा ने आखा ना छुटकारा जुगु दाम मे आह़फा ने चड़ाय देदो; अने तीनी गवाय वारु टेमे देदा। 7 ✝2:7 2 तीमुथीयुस 1:11अने भगवान मने आहयी सच्‌चाय ना बारा मे, होव ईसु नी गवा देवा करीनेत ईसु नो नेवताळो अने परच्‌यार करन्‌यो; अने आड़जात्‌या माणहु ने आहयी सच्‌चाय नी अनसारे भरहो करवा ना बारा मे ह़ीकाड़न्‌यो बणावलो से।

8 मारी मरजी से के, मंडळी मे माणहु वीन्‌ती नी टेमे वीन्‌ती करे अने आह़फाम ना हात उचा करीन वाक काडीन नी पण मन लगाड़ीन वीन्‌ती करे। 9 ✝2:9 1 पतरस 3:3मारी मरजी आहयी बी से के बयरा आपणा लुगड़ा ह़ोबे एवा पेरे। अने नीम्‌बाळा ने छुट्‌ला नी राखे अने ह़ोना, मोती, अने घणा मोगा लुगड़ा सी नी। 10 पण भला कामु सी, काहाके भगवान नी भक्‌ती करवा वाळा बयरा जुगु आहयुत वारु से 11 बयरा ने सांती सी अने हक मे रीन ह़मळवा अने ह़ीकवा जोवे। 12 मे केम, के बयरा नी ह़ीकाड़वा जोवे, अने नी अदमड़ा पोर हक जमाड़वा जोवे, पण होगा हय रेवा जोवे। 13 काहाके भगवान पेले आदम ने बणायो, अने अळतेण हवा ने बणायो। 14 अने आदम नी ठगायो, पण बयर हवा ठगाय जी अने गुनाळ्‌ळी हयी, अने भगवान ना कायदा ने तोड़ी। 15 ते बी बयर सोरा पयदा करवा नी लारे छुटकारो हात करहे, कदीम तीहयी गम सी भरहा, मोंग, अने चोखलापणा मे टेकली रेय।