1 एतरे मे मारा मन मे आहयु ठान लेदो के मे तमने वडीन वेला पाड़वा करीन अळी पासो तमारीन्‌तां नी आवु। 2 काहाके कदीम मे तमने वडीन वेला पाड़ु ता मने सुक कोय आपहे? तीहयोत सुक आपहे जीने मे वडीन वेला पाड़लो हतो। 3 मे आहयीत वात ने पेले आनीन करते लीखलो के जत्‌यार मे तमारीन्‌तां आवु तत्‌यार जीनी पांह गेथो मने सुक जड़वा जोवे तीनी पांह गेथो दुख नी जड़वा जोवे। पण मने तमारी आखा पोर भरहो से के जे सुक मारो से तीहयोत सुक तमारो बी से। 4 मे घण-जबर वेला करतो जाय्‌न, अने मन मे बी घणो फीकर मे पड़ीन, अने गीरी-गीरी आहवा पाड़तो जाय्‌न आहयी चीट्‌ठी मे तमारी जुगु लीखलो से। आनीन करते नी लीख्‌यो के तमु दुखी हय्‌न फीकर मे पड़ जावो, पण आनीन करते लीखलो से के तमु आहयु जाण जावो के मे तमने घण-जबर मोंग करु।

5 पण कदीम कोय मने वेला पाड़्‌यु ता तीहयु मने एतरुत वेला नी पाड़्‌यु, पण थोड़ुक तमने बी वेला पाड़्‌यु। 6 आसम वेला पाड़न्‌या ने ते आखा भायु मेळीन डंड आप्‌या एतरुत घणु से। 7 पण हाव तीने माफी आपो, अने सांती आपो, काहाके तमु माफी नी आपे ता तीहयो फीकर मे पड़ीन हहटाय जहे। 8 एतरे मे तमने रावण्‌या करीन केम के तीने आह़फाम नो मोंग देखाड़ो। 9 तमु मारी वात मानो के नी मानो ईसम पारखवा करीन बी मे तीहयी वात लीखलो हतो। 10 जीने तमु माफी आपला से तीने मे बी माफी आपु, काहाके तीने एतरोत नी पण बीजा ने बी तमारी भलाय नी करतेत ईसु मसी वगो हय्‌न माफी आप देदलो से, 11 के भुतड़ा ने अमारी वच मे मोखो नी जड़वा जोवे, काहाके भुतड़ो घण कदर्‌यो से अने तीनी कदर आमु घण वारु जाणया।

12 ✝जत्‌यार मे मसी नी खुस-खबर ह़मळाव्‌वा करीन त्‌रोवास ह़ेर आयो, तत्‌यार मालीक ईसु मने खुस-खबर ह़मळाव्‌वा करीन तां ह़ारीक मोखो आप देदो। 13 पण तां ह़ारीक आपणो भाय तीतुस नी हतो करीन मे घण-जबर घबराय्‌न फीकर मे पड़ ज्‌यो; अने मे तीमने आवजे अने आवही कीदीन तां गेथो मकीदुनीया परगणा मे जत र्‌यो।

14 पण मे भगवान ने घणो वारु केम, जे मसी मे आमने जलम जीक मे रेवा करीन मदत करे; जेम गंदायण्‌या तेल नो गंद आखी दुर फेल जाय तेमेत भगवान अमारी लारे आमु जां जीया तां ह़ारीक ईसु ना बारा मे खुस-खबर पुगाड़ देय। 15 काहाके आमु भगवान अगळ छुटकारो हात करन्‌या अने छुटकारो हात नी करन्‌या तीहया बेम जणा जुगु मसी नी गंद से। 16 काना जुगु ते मरवा करीन मरवा वाळी गंद अने काना जुगु, जीवाय करते जीवाय नी गंद से। अने एतरु मोटु काम करे एवु कोय से? 17 आमु से, काहाके भगवान आमु ने मोकल्‌यो; आमु तीमनीन तेवा नी हय, जे आह़फाम ना नफा नी करते भगवान ना बोल मे रीकामी वात भेसकीन केय; पण आमु ते खरला मन सी भगवान वगा हय्‌न भगवान नी हजरी मे, ईसु मसी मे खरला रीन खुस-खबर ह़मळावया।