1 मालीक ईसु नी तेवा बणवा करीन आमने एतरु मोटु बड़ाय भर्‌यु काम भगवान नी दया नी लारेत जड़लु से; एतरे आमु हीम्‌मत नी सोड़या। 2 पण आमु लाजे पाड़े एवा काम सोड़ देदला से, अने ढोंगड़ा करीन नी जीवया, अने आमु आह़फात ना नफा जुगु भगवान नी खुस-खबर मे रीकामी वात भेसकीन नी कीया; पण जेम से तेम ने तेम ह़ाची वात ने उजन्‌ती कीया। एतरे जे भगवान अगळ अमारो नीयाव करवा हींडे तीहया माणहु अगळ अमारा कामु उजन्‌ता से, अने आहया काम नी सच्‌चाय ना बारा मे तीहया माणहु नु मन लग गवा देय। 3 पण ते बी तीहया जे जलमका खुटवा वाळा से तीमना मन ना डोळा अगळ झीमरु आडु देवाय र्‌यु एतरे ईसु नी खुस-खबर ह़मजीन तीहया भरहो नी करता। 4 ईसु पोर भरहो नी करन्‌या आहया माणहु ना मन मे, भगवान ईसु मसी नी बड़ाय भरी खुस-खबर नी भबळवा जोवे, करीन भुतड़ो आहया भगवान ना वीरोद मे आह़फोत भगवान बणीन आहयी कळी मे राज कर र्‌यो, तीहयो तीमना अक्‌कल ना डोळा ने आंदळा कर देदलो से। 5 काहाके आमु अमारी खुस-खबर नी ह़मळावया, पण ईसु मसी नी खुस-खबर ह़मळावया; आहयो ईसु मसीत मालीक से; अने अमारा बारा मे आहयुत कीया के आमु ईसु नी लेदे तमारा पावर्‌या से। 6 भगवान केदलो हतो के "अंदारला मे वीजाळु हय जाय।" हीयोत भगवान अमारा मन मे भबळीन वीजाळु कर देदलो से, आनीन करते के आमु तीना बड़ाय ने जाण जीया, जे ईसु मसी ना मुख मे गेथु भबळे।

7 पण भगवान नु खजानु आपणा आहया कादा ना बण्‌ला डील मे मेल मेल्‌यु जे कादा ना बणला डोसरा ह़रका से, जीनी सी आपणु ने आहयु अकनाय जाय के आहयी बड़ाय नी घणी जुदी ताखत आपणी नी, पण भगवान नी से। 8 आमु वेला मे घेरवायला रीया, बाखीन आफत मे नी पड़या। आमु घंगवाय रीया, पण कदी आह नी सोड़या। 9 आमु ने वेला ते पाड़े; पण आमने भगवान सोड़े नी; आमु ने पाड़ देय पण आमु जलमकात खुटया नी। 10 ईसु नु जीवणु बी अमारा डील मे उजन्‌तु हय जवा जोवे करीन आमु दाड़ीक अमारा डील मे ईसु नी मोत नो दुख भुगतीन अकन्‌या। 11 ईसु नी जीवाय बी अमारा डील मे उजन्‌ती हय जवा जोवे करीन आमु जीवतेन ईसु नी करते दुख झेलीन मरे एवा हय जीया। 12 मोत ते आमु झेलया पण सुक नी जीवाय तमु जीवे।

13 अमारी पांह तीहयीत भरहा नी आत्‌मा से, जीना बारा मे सास्‌तर केय, मे भरहो कर्‌यो एतरे बोल्‌यो। एतरे आमु भरहो करया, भरहो करीनेत बोलया। 14 काहाके आमु जाणया के जे भगवान, मालीक ईसु ने मर्‌या-ह़र्‌या मे गेथो पासो जीवाड़लो से। तीहयोत भगवान आमु ने बी मर्‌या-ह़र्‌या मे गेथा पासा जीवाड़ देहे, अने आह़फा अगळ हजुर करहे। 15 काहाके आहयु आखु तमारीत करते हय र्‌यु, के जे रीते भगवान नी दया अने बड़ाय जुगु भगवान ने घणो वारु से केवा वाळा नी गीनती बी वदती जवा जोवे।

16 एतरुत नी करते आमु हीम्‌मत नी सोड़या। भले अमारा डील मे नो जोर कमतो हयतो जाय र्‌यो हय ते बी अमारी आत्‌मा दाड़ी-दाड़ीक नवली हयतीत जाय री। 17 काहाके अमारी थोड़ीक वार नी हळकली वेला अमारी जुगु घण-जबर फायदा वाळी से अने आहयी आमु ने जलमकी बड़ाय मे जवा करीन मदत आपती जाय। 18 एतरे आमु देखली चीज ने नी; पण वण-देख्‌याण चीज ने भरहा नी लारे एकडीट्‌या भाळ रीया; काहाके देखाये तीहयी चीज थोड़ाक दाड़ा तक टेकहे; पण वण-देख्‌याण चीज अमरकाय नी जलमकी बण्‌ली रेय अने रेहे।