1 ✝ 8:1 रोमीयो 15:26 हाव ए ईसु पोर भरहो करन्‌या भाय अने बेन्‌या, आमु तमने भगवान नी तीहयी संयबरकत ना बारा मे खबर आपया, जे भगवान मकीदुनीया ना मंडळ्‌या पोर देखाड़्‌यो। 2 ईसु पोर भरहो करन्‌या ने वेला पाड़्‌या, ते बी आहया मकीदुनीया वाळा घण-जबर गरबाय मे बी मदत करवा नी वचक्‌या पण घण-जबर खुस हय्‌न भेट करवा मे मदत कर्‌या। 3 मे आहयी वात नो गवा से के तीहया जेतरु अपाये हेतरु आप्‌या, अने ईन गेथु बी जादा खुस हय्‌न आप्‌या। 4 तीहया आह़फात वळ-वळीन रावण्‌या करीन केदा के भगवान ना माणहु जुगु दान आपीन तीमनी चाकरी करवा करीन आमने वारलो मोखो आपो। 5 तीहया ते पेले आह़फाम नेत मालीक ईसु ना हात मे ह़ोप देदा, अने अळतेण भगवान नी मरजी नी अनसारे आह़फा ने अमारा हात मे ह़ोप देदा। एतरो वारु वीच्‌यार करीन तीहया दान आपहे एवी आह आमु नी कर्‌या। 6 एतरे आमु तीतुस ने वीन्‌ती कर्‌या के जेम पेले दान नु काम तीहयो सुरु करलो तेमेत तमारी वच मे दान आपवा नु संयबरकत नु आहयु काम पुरु करे। 7 पण जेम एक-एक वात मे मतलब भरहा मे, भगवान ना बोलु मे, अक्‌कल मे अने आखी भाती नी कोसीत करवा मे, अने तीहया मोंग मे जे अमारी ह़ाते राखे, वदता जाय, तेमेत आहया दान ना काम मे बी वदता जावो।

8 मे तमने आना बारा मे हुकम नी आपतो, पण बीजा माणहु हेर करीन दान आप र्‌या तीहयी वात ने देखाड़ीन मे तमने आहयु देखाड़वा हींड र्‌यो के तमु बी तीमनीन तेम दान करीन आह़फाम ना मोंग ने उजन्‌तो करो। 9 तमु ते आपणा मालीक ईसु मसी नी दया ने जाणो ते खरा; तीहयो मालदार हतो पण तमारीन करते आनीन करते गरीब बण्‌यो के तमु तीनी गरबाय नी लारे मालदार बण जावो।

10 आहयी वात मे मारी ह़ला आहयी से: आहयु तमारी जुगु वारु से: ज्‌या साल भेट आप्‌या अने दान आपवा नी हेर मे तमु अगळ हता। 11 एतरे जे काम सुरु करला हता, तीने पुरु करो के जेम हेर करवा मे तीयार बी हता, तेमेत आपणी-आपणी कमाय नी अनसारे पुरु बी करो। 12 एम ना वीच्‌यार करो के तमारी पांह जे से तीनी गेथु जादा आपवा पड़हे। पण दान आपवा नी मन मे हेर हय ता भगवान बी आपणा दान ने जे आपणी पांह से तीहयु अवरी लेहे। तीहयो एवो भगवान नी हय जे, आपणी पांह नी हय, तीहयु मांगे। 13 आहयी दान नी वात मे तमने आनीन करते नी केतो, के बीजा मजा करवा जोवे अने तमने वेला करवा पड़े। 14 आहयी टेमे तमारी पांह जादा से ता, जीमनी जरवत से तीमनी मदत करवा जोवे, जीनी सी काना दाड़े तीमनी पांह जादा रेहे अने तमने जरवत पड़हे ता तमारी मदत कर देहे। अने आहयी रीते आपणु आखा मेळीन आंबा-सांबा साजल्‌या बण जीया, 15 जेम भगवान ना कीताप्‌या मे बी लीखलु से, "जे जादा ह़ेमटी लेदलो तीनी पांह वदु नी नीकळ्‌यु, अने जे कम ह़ेमट्‌लो हतो तीनी पांह कम नी नीकळ्‌यु।"

16 भगवान ने मे घणो वारु से केम जे तीतुस ना मन मे तमारी मदत करवा नी हेर पयदा कर देदो जेम तमारी मदत करवा करीन अमारा मन मे हेर हती। 17 आमु ह़मजाड़्‌या ता तीहयो मान ज्‌यो अने घण हेर सी आह़फा नी मरजी सी तमारीन्‌तां आव्‌वा नी हेर कर्‌यो। 18 अने आमु तीनी ह़ाते तीहया भाय ने बी मोकल्‌ला से जे खुस-खबर ह़मळावीन ह़ीकाड़वा मे आखी मंडळी मे नामह़ाद्‌यो से। 19 अने एतरुत नी पण मंडळी ना माणहु तीने आहया दान ना काम नी करते टाळ बी लेदला से के तीहयो आहया काम नी करते अमारी ह़ाते जवा जोवे अने आमु आहयी सेवा आनीन करते करया के मालीक ईसु नी बड़ाय अने दान आपवा मे अमारा मन नी तीयारी बी उजन्‌ती हय जवा जोवे।

20 आमु आहयी वात मे चेतीन रीया के आहया दान ना काम ना बारा मे जीनी सेवा आमु कर र्‌या, कोय अमारी पोर गुनो नी लगाड़वा जोवे। 21 मालीक ईसु अने माणहु नी नींगा मे आहयी वात वारली से तीहयीत वात ना बारा मे आमु फीकर करया।

22 आमु तीतुस ह़ाते एक जणा ने अळी मोकल्‌ला से, जे ईसु पोर भरहो करे, तीने आमु आखी वात मे पारख्‌या, तीहयो आखी वात मे काम करवा नी हेर करे; पण तीहयो आहयी वात मे तमारी पोर जादा भरहो करे, एतरे तीहयो अळी बी जादा दान भेळु करवा नु काम मे घण-जबर हेर सी भराय र्‌यो। 23 कदीम कोय मने तीतुस ना बारा मे पुछे, ता मे तीना बारा मे केही, के तीहयो मारो ह़ाती से, अने तमारी जुगु मारा काम मे मारो सात देण्‌यो से, अने कदीम कोय तीनी ह़ाते आवला भाय ना बारा मे पुछे, ता मे केही के तीहया मंडळी नी लारे मोकल्‌ला से अने ईसु मसी नी बड़ाय से। 24 एतरे तमु मंडळी मे आहया दान ना काम ने करीन आह़फा नो मोंग देखाड़ो अने आहयु बी देखाड़ो के आमु तमारी पोर आहया दान नु काम ना बारा मे घण-जबर मोटाय करया।