1 सुरुवात मे बोल हतो, अने बोल भगवान ह़ाते हतो, अने बोलेत भगवान हतो। 2 सुरु गेथोत आहयो बोल भगवान ह़ाते हतो। 3 तीना लारे भगवान आखी चीज बणायो; अने जे चीज बण्‌ली से तीहयी तीना वगर एक बी नी बणी। 4 बोल जीवाय नु वीजाळु हतो, अने तीहयी जीवाय माणहु नु वीजाळु हतु। 5 अने वीजाळु अंदारला मे भबळ्‌यु, पण अंदारलु तीने आवर्‌यु नी।

6 ✝भगवान वगे गेथो एक खबर्‌यो, तीनु नाम युहन्‌नो हतो। 7 युहन्‌नो आहयी गवा देवा आयो, के वीजाळु नी गवाय देय, काहाके आखा तीनी लारे भरहो करे। 8 तीहयो युहन्‌नो आह़फो तीहयु वीजाळु नी हतो पण तीहया वीजाळा ना बारा मे गवाय देवा आवलो हतो। 9 खरलु वीजाळु आखा माणहु ने वीजाळा मे करे, कळ मे आव्‌वा वाळु हतु।

10 तीहयो बोल कळी मे हतो, अने भगवान तीनी लारे कळी बणायो, ते बी आहयी कळी ना माणहु तीने नी ओळख्‌या। 11 तीहयो आपणा घोर मे आयो, पण तीनात माणहु तीने आह़फाम ना जीव मे नी मान्‌या। 12 पण जेतरा बी माणहु तीने आपणा जीव मे मानीन तीना नाम पोर भरहो करे, तीहयो तीहया आखा ने भगवान ना सोरा-सोरी बणवा नो हक आपे। 13 तीहया नी ते लोय सी, नी ते डील नी हेर नी लारे, नी ते माणहु नी हेर नी लारे, पण भगवान सी पयदा हयला से।

14 अने बोल माणेह बण्‌यो, अने दया अने सच्‌चाय सी पुरो भराय्‌न अमारी वच मे डेरो कर्‌यो, अने आमु तीनी आवी बड़ाय देख्‌या, जीसम बाह ना एक-खोळ्‌या नी बड़ाय।

15 युहन्‌नोत तीना बारा मे गवाय देदो, अने आड़ी-आड़ीन केदो "आहयो तीहयोत से" जीना बारा मे आहयु केतो हतो, के एक जणो आव्‌वा वाळो से, तीहयो मार गेथो घण मोटो से, काहाके तीहयो मारी सी पेले हतो।

16 काहाके तीनी भरपुरी सी आमु आखात हात कर्‌या मतलब दया पोर दया। 17 कायदा ते भगवान, मुसा ना लारे आपलो हतो, बाखीन दया अने सच्‌चाय ईसु मसी नी लारे आपणीन तां पुगली से। 18 भगवान ने आज लग कोय नी देख्‌यु; एक-खोळ्‌यो बेटो जे बाह ना खोळा मे से, तीहयोत तीने उजन्‌तो कर्‌यो।

19 युहन्‌ना नी गवाय आहयी से, के जत्‌यार युहद्‌या यरुसलेम गेथा पुंजारा ने अने लेवी जाती ना माणहु ने युहन्‌ना ने आहयु पुछवा ना लेदे मोकल्‌या, के "तु कोय से?"

20 ता युहन्‌नो आहयु मान लेदो, अने मना नी कर्‌यो, पण मान लेदो के "मे मसी नी हय?"

21 तत्‌यार तीहया युहन्‌ना ने पुछ्‌या, ता तु कोय से?

ता तु एलीयो से ह़ुं?

ता युहन्‌नो केदो, "मे एलीयो नी हय?" ता तीहया अळी पुछ्‌या, "ता तु भगवान वगे गेथी वात केण्‌यो से ह़ु?" तीहयो युहन्‌नो जपाप आप्‌यो, "नी।"

22 ता तीहया तीने केदा, "ता तु कोय से? जे आमने मोकल्‌या, तीमने आमु ह़ु जपाप आपया? तु तारा बारा मे ह़ु केय?"

23 युहन्‌नो केदो, "जीसम यसायो भगवान वगे गेथी वात केण्‌यो माणेह केदलो से, मे बड़ा मे एक आड़वा वाळा नी अवाज से के तमु मालीक ईसु नी वाट ह़ुदी करो।"

24 आहया यरुसलेम गेथा मोकल्‌ला माणहु मे गेथा थोड़ाक फरीसी पंथवाळा बी हता।

25 तीहया माणहु युहन्‌ना ने अळी पुछ्‌या, "तु नी ते मसी अने नी ते तु एलीयो हय, अने भगवान वगे गेथी वात केण्‌यो बी नी हय, ता तु माणहु ने बपतीस्‌मा काहा आपे?"

26 युहन्‌नो तीमने जपाप आप्‌यो, "मे ते पाणी सी बपतीस्‌मा आप र्‌यो, बाखीन तमारा वच मे एक माणेह उबो हय र्‌यो, जीने तमु नी ओळखो। 27 मतलब जे मार गेथो अळतेण आव्‌वा वाळो से, मे ते जीना खाहड़ा ना बोंदु सोड़वा लायक बी नी हय।"

28 आहयु आखु बेतन्‌या गाम मे हयु जे यरदन नंदी ना ह़ेली धेड़े से, तां युहन्‌नो बपतीस्‌मा आपतो हतो।

29 बीजा दाड़े युहन्‌नो ईसु ने आह़फा भणी आवत्‌लो देखीन केदो, "आहयु भगवान नु गाडरु से, जे आखी कळी ना मनख्‌या ना पाप ने उचलीन लीत्‌ती रेय। 30 आहयो तीहयो से, जीना बारा मे, मे तमने केतो हतो, के एक जणो आव्‌वा वाळो से, तीहयो मार गेथो घण मोटो से, काहाके तीहयो मार गेथो पेलो हतो। 31 अने मे ते तीने ओळखतो नी हतो, एतरे मे पाणी सी बपतीस्‌मा आपतो आयो, के तीहयो ईस्‌रायल पोर उजन्‌तो हय जाय।"

32 अने युहन्‌नो आहयी गवाय देदो, के मे चोखली आत्‌मा ने पारवान वेह मे ह़रगे गेथी उतरत्‌ली, अने ईसु पोर थांगत्‌ली देखलो से। 33 अने मे तीने ओळखतो नी हतो, पण जे मने बपतीस्‌मा आपवा मोकल्‌यो, तीहयोत मने केदो, जीनी पोर तु चोखली आत्‌मा ने उतरते अने थांगते देख्‌यो, तीहयोत चोखली आत्‌मा सी बपतीस्‌मा आपवा वाळो से। 34 अने मेत देख्‌यो, अने गवाय देदो के "आहयोत भगवान नो बेटो से।"

35 बीजा दाड़े अळी युहन्‌नो अने आह़फा ना चेला मे गेथा बे जणा उबा हय र्‌या हता। 36 तीहयो युहन्‌नो ईसु ने तां माय्‌न जत्‌लो देख्‌यो, अने आह़फा ना चेला ने केदो, "देखो, हीय्‌युत भगवान नु गाडरु से।"

37 तत्‌यार तीहया बे चेला युहन्‌ना नी वात ह़मळीन ईसु पसळ चाल पड़्‌या। 38 ईसु पासो फीरीन भाळ्‌यो, अने तीमने आह़फा पसळ आवत्‌ला देख्‌यो, अने तीमने केदो, "तमु कोयने ह़ोद र्‌या?" तीहया ईसु ने केदा, "ए गुरु! तु कां रेय?"

39 ईसु तीमने केदो, "आवीन देख लेवो" तीहयी टेमे ह़ांती टेमे नी च्‌यार बज रेली, अने तीहया जाय्‌न देख्‌या के तीहयो कां रेय, अने ते दाड़े तीहया तीनी ह़ाते र्‌या।

40 युहन्‌ना नी वात ह़मळीन ईसु पसळ जवा वाळा मे एक जणा नु नाम अंदर्‌यास हतु, जे सीमोन पतरस नो भाय हतो। 41 अने अंदर्‌यास पेलो आह़फा ना सग्‌गा भाय सीमोन ने केदो, "आमने ते मसी जड़ जेलो से।" 42 अने अंदर्‌यास ते सीमोन ने ईसुन्‌तां ली ज्‌यो।

ईसु सीमोन भणी भाळीन केदो, के तु युहन्‌ना नो बेटो सीमोन से, पण तु केफा मतलब पतरस केवाही।

43 बीजा दाड़े ईसु गलील मे जवा कर्‌यो। अने फीलीपुस ने भेटीन तीने केदो, "मार पसळ आव।" 44 अने आहयो फीलीपुस अंदर्‌यास अने पतरस ना बेतसेदा ह़ेर मे रेण्‌यो हतो। 45 अने फीलीपुस, नतनेल ने भेटीन तीने केदो, "जे मसी ना बारा मे मुसा ना कायदा मे अने भगवान वगे गेथी खबर लावण्‌या माणहु लीखला से, तीहयो आमने जड़ जेलो से, तीहयो नासरत मे रेवा वाळा युसुफ नो बेटो ईसु से।"

46 नतनेल फीलीपुस ने केदो, "नासरत मे गेथी कानी बी वारली चीज उबजी सके ह़ु?" ता फीलीपुस तीने केदो, "चाल आवीन देख ले।"

47 ईसु नतनेल ने आवत्‌लो देख्‌यो, अने तीना बारा मे केदो, "देखो, आहयो ईस्‌रायली जाती नो खरलो माणेह से आनी मे कंय बी दगो नी हय।"

48 नतनेल ईसु ने पुछ्‌यो, "तु मने कीसम ओळखे?"

ईसु जपाप आप्‌यो, "मे तने केम, फीलीपुस तने नी बोलायो अने पेले गेथोत मे तने जाणु। मे तने गुलर ना झाड़ तळे देखलो।"

49 नतनेल ईसु ने केदो, "ए गुरु! तु भगवान नो बेटो से, अने ईस्‌रायल नो राजा से।"

50 ईसु नतनेल ने केदो, "मे तने केदो, के मे तने गुलर ना झाड़ तळे देखलो एतरे तु मार पोर भरहो कर र्‌यो। तु आनी गेथा बी मोटा काम देखही।"

51 अळी ईसु तीमने केदो, "मे तमने ह़ाचली केम, एक दाड़े तमु ह़रग ने उगड़लु अने भगवान ह़रगदुतु ने माणहु ना बेटा नी पोर उतरत्‌ला अने तां गेथा उपर चड़त्‌ला देखहु।"