अड़तीस साल ना मांदला नु आरगु करनु
1 अळतेण युहदी माणहु नो तीवार आयो, एतरे ईसु यरुसलेम ह़ेर अळी ज्यो। 2 यरुसलेम मे गाडरा नु झापलु हतु, ते झापला धेड़े एक हळाव हतो, जे ईब्रानी भासा मे बेतसेदा केवात्लो, अने तीनी धेड़े पांच मांडवा हता। 3 तीहया मांडवा मे घणा ढेरका मांदला, आंदळा, लंगड़ा, पांगळा पड़ रेता हता अने तीहया वारु हयवा नी आह करीन पाणी हीलवा नी वाट जोय रेता हता। 4 काहाके टेम-टेम पोर भगवान ना ह़रगदुत हळावा मे उतरीन पाणी ने हीलाया करता हता, पाणी हीलावतेत जे बी मांदलु माणेह पाणी मे पेले उतर जतु हतु तीहयु आरगु हय जतु हतु, चाहे तीनी कानी बी मंदवाड़ काहा नी हय। 5 तां एक माणेह हतो, जे तीस ने आंठ साल नो मंदवाड़ मे पड़लो हतो। 6 ईसु तीने तां पड़ रेलो देख्यो, अने आहयु जाणीन के आहयो, घणा दाड़ा सी आसमेत पड़ र्यो, तीने पुछ्यो, "तु वारु हयवा हींड र्यो ह़ुं?"
7 तीहयो मांदलो तीने केदो, "ए मालीक, मारी ह़ाते कोय माणेह नी हय, जत्यार पाणी हीलावे, ता मने हळावा मे उतारे। पण मने पुगते-पुगते पेले हळाव मे बीजो उतरी पड़े।"
8 ईसु तीने केदो, "उठ, अने तारी खाटली उचलीन चाल-फीर।" 9 तीहयो माणेह तत्यारुत आरगो हय ज्यो, अने आह़फा नी खाटली उचलीन चालवा-फीरवा लाग्यो। तीहयो आरगो हयो ते दाड़ो अराम नो हतो। 10 तीहयो दाड़ो अराम नो हतो, एतरे युहदी माणहु जे आरगो हयो हतो तीने केवा बाज ज्या के आज तने खाटली उचलवा ताले नी हय।
11 तीहयो तीमने केदो, "जे मने आरगो करलो से, तीहयो मने केदलो से, तारी खाटली उचलीन चाल-फीर।"
12 तीहया तीने पुछ्या, "तीहयो कोय से, जे तने आहयु केदो, खाटली उचलीन चाल-फीर?"
13 पण जे आरगो हयलो हतो तीहयो नी जाणतो हतो के तीहयो कोय से, काहाके तीहया जागा मे भीड़ हयवा सी ईसु तां गेथो जत रेलो हतो।
14 अळतेण ईसु जे आरगो हयलो हतो तीने मंदीर मे भेट्यो, ता ईसु तीने केदो, "देख तु आरगो हय जेलो से, अळी पाप नी करजे। नीता आनी गेथी बी वदु गरा तार पोर आय पड़े।"
15 तीहयो माणेह जाय्न युहदी माणहु ने की देदो, के "जे मने आरगो करलो तीहयो ईसु से।" 16 ईसु अराम ना दाड़े एवा-एवा काम करतो हतो, करीन युहदी माणहु ईसु ने वेला पाड़वा बाज ज्या। 17 पण ईसु तीमने आहयु केदो, "मारो बाह हजु लग काम कर र्यो, एतरे मे बी काम कर र्यो।"
18 ईसु अराम ना दाड़ा नो कायदो तोड़े, अने भगवान ने मारो बाह कीन खुद ने भगवान बराबर देखाड़े, करीन युहदी माणहु हीने मार नाक्खु करीन वदु कोसीत करवा बाज ज्या अने मोखो ह़ोदवा लाग्या।
बेटा नो हक
19 ईसु तीमने केदो, मे तमने ह़ाचली केम, बेटो आह़फा ना मन सी कंय बी नी कर सके, पण तीहयुत कर सके, तीना बाह ने करत्ले देख्यो हय; काहाके जे-जे काम तीनो बाह करे तीहयु काम तीनो बेटो बी तीहयीत रीते करे। 20 काहाके बाह बेटा सी मोंग करे, अने जे-जे काम तीहयो करे, तीहया आखा काम तीने देखाड़े; अने तीहयो आनी सी बी मोटा काम देखाड़हे, काहाके तमु काम देखीन वहराया करो। 21 काहाके जेम बाह मर्या-ह़र्या मे गेथा जीवाड़े, अने उठाड़े, तेमेत बेटा पांह बी जीवता अने बठा करवा नो हक से। 22 अने बाह हाव कोयनो बी नीयाव नी करे, पण हाव माणहु नो नीयाव करवा नो आखो हक तीना बेटा ने ह़ोप देदलो से। 23 एतरे के जीसम बाह नी ईज्जत करे तेमेत आखा माणहु तीना बेटा नी बी ईज्जत करे, जे बेटा नी ईज्जत नी करे, तीहयो बेटा ने मोकलन्या बाह नी बी ईज्जत नी करे।
24 मे तमने ह़ाचली आहयु केम जे मारा बोलु ह़मळीन मने मोकलन्या बाह पोर भरहो करे, ता अमर जीवाय तीनी से, अने तीनी पोर डंड नो हुकम नी हय पण तीहयो मोत ने सेकीन अमर जीवाय हात कर लेदलो से। 25 मे तमने ह़ाची-ह़ाची केम, तीहयी टेम आव्वा बाज री, अने हमणे से, जे टेम मे मरला भगवान ना बेटा नो बोल ह़मळहे, अने जे ह़मळहे तीहया जीवहे। 26 काहाके जे रीते बाह आह़फा मे जीवाय राखे, तीहयीत रीते तीना बेटा ने बी आहयो हक आपलो से के आह़फा मे जीवाय राखे, 27 मतलब तीने नीयाव करवा नो बी हक आपलो से, एतरे के तीहयो माणेह नो बेटो से। 28 आनी सी ना वहराय, काहाके तीहयी टेम आव्वा बाज री, के जेतरा बी मड़ाट्या मे डाट्ला से तीहया आखा तीनो बोल ह़मळीन जीवता हय जहे अने नीकळी आवहे। 29 जे भलाय करला से, तीहया अमर जीवाय जुगु मरला मे गेथा जीवता हयहे अने जे कुहराय करला से, तीहया नीयाव ना दाड़े डंड भुगतवा करीन मरला मे गेथा जीवता हय जहे।
ईसु ना बारा मे गवाय
30 मे खुद कंय नी कर सकतो, जीसम मे ह़मळु, तीसम नीयाव करु, अने मारो नीयाव खरलो से, काहाके मे मारी मरजी नी, पण मने मोकलवा वाळा नी मरजी चाहत्लो।
31 कदी मे मारा बारा मे एतरोत गवाय देम ता मारी गवाय खरली नी हय। 32 पण मारी वगे गवा देण्यो एक अळी से, तीहयो मारो ह़रगे वाळो बाह से अने तीनी गवाय खरली से। 33 5:33 युहन्ना 1:19-27; 3:27-30तमु युहन्ना बपतीस्मा आपण्या सी पुसाड़्या अने तीहयो मारा बारा मे खरली गवाय देदो। 34 पण मे मारा बारा मे माणहु नी गवाय नी चाहतो, अळी बी मे आहयी वात आनी लेदे केदो, के तमु बी बचे। 35 युहन्नो ते धपतलो अने भबळन्यो दीवो हतो, अने तमने थोड़ीक वार लग तीना वीजाळा मे, खुसी मनाव्वा वारु लाग्यु। 36 पण युहन्नो मारा बारा मे जे गवाय देदलो, तीनी गेथी मोटी गवाय मारी पांह से, काहाके जे काम बाह मने करवा करीन मोकल्लो से, तीहया काम मे करवा बाज र्यो अने तीहया काम मारा गवा से, के मारो बाह मने मोकल्लो से। 37 5:37 मत्ती 3:17; मरकुस 1:11; लुका 3:22अने बाह जे मने मोकल्लो से, तीहयो मारी गवाय दी र्यो, तमु तीनी वात नी ह़मळ्या, अने तीनो वेह नी देख्या। 38 अने तीना बोल आपणा मन मे जापते नी मेल्या, काहाके जीने तीहयो मोकल्लो तीनी पोर भरहो नी करता। 39 तमु खरला सास्तर मे ह़ोदवा बाज र्या, काहाके तमु ह़मजी र्या के सास्तर मे गेथी अमर जीवाय जड़त्ली से, अने आहयी सास्तर मारा बारा मे गवाय दी री। 40 ते बी तमु जीवाय ने लेवा करीन मारीन्तां आव्वा नी हंडता।
41 मने माणहु पांह गेथी ईज्जत नी जोवती। 42 पण मने मालम से के तमारी मे भगवान नो मोंग नी हय। 43 मे मारा भगवान बाह ना नाम सी आवलो से, अने तमु मने नी मान्ता पण कोय बीजो आह़फा ना नाम सी आवतो, ता तमु तीने मान लेता। 44 तमु जे एक-बीजा सी ईज्जत ह़ोद र्या अने आहयी ईज्जत जे एक जणा भगवान भणी गेथी से, नी ह़ोद्ता, के कीसम भरहो करहे? 45 आहयु ना ह़मजो के मे बाह अगळ तमारी पोर गुनो लगाड़ही, तमारी पोर गुनो लगाड़न्यो मे नी हय पण मुसो से जीनी पोर तमु आह राख र्या। 46 काहाके कदी तमु मुसा पोर भरहो करता, ता मार पोर बी भरहो करता काहाके तीहयो मारा बारा मे लीखलो से। 47 पण तमु मुसा नी लारे लीखला सास्तर पोर बी भरहो नी करता, ता मारी वात पोर कीसम भरहो करहु?