18 युहदी ने भरहो नी हयो के आहयो पेले आंदळो हतो अने हाव देखवा बाज र्यो, एतरे तीहया तीना आह्य-बाहा ने बोलाया। 19 अने तीमने पुछ्या, "आहयो तमारो बेटो से ह़ु? आहयो जणायो तार नो आंदळो हतो ह़ु? आंदळो की र्या ता हाव कीसम देखवा बाज ज्यो?"
20 तीना आह्य-बाहा जपाप आप्या, "आमु जाणये के आहयो अमारो बेटो से, अने आहयो आंदळोत पयदा हयलो। 21 पण आमु नी जाणता के हीय्यो हाव कीसम देखे; अने आहयु बी नी जाणता के आना डोळा कोय वारु कर्यो, हीनेत पुछ लेवो; हीय्यो नान्लो नी हय हीना बारा मे देखाड़ देहे।" 22 आहयी वात तीना आह्य-बाहा आनीन करते केदला काहाके तीहया युहदी सी बीहता हता; काहाके युहदी माणहु एको कर र्या हता, के ईसु ने कोय बी मसी करीन मान लेहे, ता आपणु आपणा भक्ती ना घोर मे गेथो बारो कर देह़ु। 23 एतरे तीना आह्य-बाहा केदला, के हीय्यो नान्लो नी हय; हीनेत पुछ लेवो।