खोवायलु गाडरुन दाखलो
1 15:1 लुका 5:29,30 आखा फाळो उगरावण्या अने पापी माणहु बी ईसु नी वात ह़मळवा तीनीन्तां आवता हता। 2 अने आहयु देखीन फरीसी पंथवाळा अने युहदी-धरम ह़ीकाड़न्या वाक काडीन केवा बाज ज्या, "आहयो माणेह पापी ह़ाते भेटे बी अने तीमनी ह़ाते खाणु बी खाय।" 3 तत्यार ईसु तीमने आहयो एक दाखलो ह़मळायो:
4 "मान लेवो तमारी माय्न कोय नी पांह ह़ोव गाडरा हय, अने तीमनी मे गेथु एक खोवाय जाय, ता तीहयो ह़ु करहे? तीहयो बीजा एक कम ह़ोव गाडरा ने बड़े चरतला रेवा दीन, तीहयु खोवायलु गाडरु ने जत्यार तक ह़ोदह़े, के तीहयु जड़ नी जाय। 5 अने जत्यार तीहयु जड़ जाय, ता तीहयो तीने खांदा पोर बहाड़ीन घोर लावहे, 6 अने घोर आवीन आह़फा ना दोस्तीदार्या ने अने ह़ाते वाळा ने एकठा करीन केय के मार ह़ाते खुस रेवा काहाके मारु खोवायलु गाडरु जड़ जेलु से! 7 मे तमने केम; के आहयीत रीते एक पाप सोड़वा वाळा ना बारा मे बी ह़रग मे एतरा खुस हयहे, जेतरा एक कम ह़ोव धरमी माणहु नी लेदे नी हये, जीमने मन फीराव्वा नी जरवत नी हय।"