1 एक दाड़ो ईसु आह़फा ना चेला ने केदो, "हय नी सकतु के गरा नी आवे, पण तीहया माणेह पोर गरा आय पड़े, तीनी लारे पाप करवा नी पारख आवे! 2 जे कोय आहया नान्‌ला माय्‌न एक ने बी पाप करवा नी पारख मे पाड़े, तीनी वाटु आहयुत वारु से के तीना गळा मे घट्‌टी नु पोड़ बांदीन तीने दर्‌या मे नाख देवा जोवे।" 3 ✝एतरे तमु आनी वात मे चेतीन रेवो, "कदीम तारो भाय कानो बी गुनो करे, ता तीने एवो गुनो नी करवा करीन ह़मजाड़ देवो, अने कदीम तीहयो गुना गेथो भगवान भणी वळे, ता तीने माफी आप देवो। 4 कदीम तीहयो एक दाड़ा मे ह़ात कावा तारा वीरोद मे पाप करे, अने तीहयो ह़ातोव कावा आवीन तने केय भाय मे तारा वीरोद मे पाप करलो से मने माफी आप दे, ता तमु तीने माफी आप्‌ता रेवो।"

5 अने ईसु ना नेवताळा मालीक ईसु ने केदा, "तु अमारा भरहा ने वदाड़।"

6 मालीक ईसु तीमने केदो, "कदीम तमारो भरहो राय ना दाणा बराबर बी हतो, तत्‌यार तमु आहया बारमास्‌या ना झाड़ ने केता, के ‘तु आह़फोत मुळ्‌या भेळ उखड़ीन दर्‌या मे जीन थंणाय जा’ ता तीहयु तमारी वात मान लेतु।

7 "तमारी माय्‌न एवो कोय से, जीनो गुलाम पावोर होळ जोपतो हहे, नी ते गाडरा चारतो हहे, अने जत्‌यार खेतर मे गेथो पासो आवे, ता तीहयो तीने केय के ‘आव, छोटोत खाणु खावा बह जा?’ 8 कदी नी, अने तीने आहयु केवा रेवा दीन आहयु केय, मार वाटु खाणु रांद: अने जत्‌यार लगण मे खाय नी लेम तत्‌यार लग होगो हय रे, अळतेण तु बी खाय पी लेजे। 9 जरीक वीच्‌यार करो! मारो गुलाम पावोर मारो हुकम मानीन मारी घण-जबर चाकरी कर्‌यो करीन मालीक तीने तु घणो वारु से केहे के? नी केय। 10 आनीत रीते तमु बी, जत्‌यार आहया आखा कामु ने कर देवो तीनो हुकम तमने आप देदलो से, ता केवो, आमु पावर्‌या एतरात से के, जे काम आमने करवा जोवे तीहयु काम करला से।"

11 अने एक कावा जत्‌यार ईसु यरुसलेम जवा बाज रेलो ता तीहयो गलील जीलान सामर्‌या जीलान काकड़ पोर माय्‌न ज्‌यो। 12 अने काना एक गाम मे जत्‌लो तीनी टेम पोर दह़ कुड़ावा माणहु भेट्‌या, अने तीहया सेटा उबा हय र्‌या हता। 13 अने तीहया कुड़ावा सेटा उबा रीन ज्‌योरेत आड़ीन केदा, "ए ईसु, ए मालीक, अमारी पोर गीण कर।"

14 अने ईसु तीमने देखीन केदो, "जावो अने आह़फान पुंजारा ने देखाड़ो।" अने जता-जता तीहया चोखा हय ज्‌या। 15 तत्‌यार तीमनी मे गेथो एक अदमी आहयु देख्‌यो के मे वारु हय जेलो से, ज्‌योरेत भगवान नी बड़ाय करतो जाय्‌न पासो आयो। 16 अने ईसु ना पोगु पोर मोडा ने भरहे पड़ीन ईसु ने घणो वारु से करीन केवा बाज ज्‌यो; अने तीहयो सामरी जीला नो एक माणेह हतो। 17 ईसु तीना माणेह ने केदो, "दह़ माणहु आरगा हयला से! ता बीजा नव कां से? 18 के आहया बीजा देस वाळा ने सोड़ीन कोय अळी नी नीकळ्‌यो अने जे भगवान नी बड़ाय करे?" 19 अळतेण ईसु ते अदमी ने केदो, "उठ अने तार घोर जत रे। तु मार पोर भरहो कर्‌यो करीन भगवान तने वारु करलो से।"

20 अळतेण फरीसी माणहु ईसु ने पुछ्‌या के भगवान नु राज कत्‌यार आवह़े, तत्‌यार ईसु तीमने जपाप आप्‌यो, "भगवान नु राज उजन्‌तु नी आवे। 21 अने माणहु आहयु नी केय, के आञे से, अने ह़ेले से, काहाके देखो, भगवान नु राज तमारी वच मे से।"

22 अळी ईसु आह़फा ना चेला ने केदो, "तीहयी टेम बी आवह़े, जत्‌यार तमु मनख्‌यान सोरान दाड़ा माय्‌न एक दाड़ा ने देखवा नी हेर करहु, पण तीहयो दाड़ो तमने नी देखवा जड़े।" 23 माणहु तमने केहे, "देख तीहयो आञे से, अने ह़ेले से, पण तमु जती नी रेजो अने नी तीन पसळ जती रेजो" 24 काहाके जेम वीजळी ह़रग ना एक धेड़े गेथी बीजे धेड़े लगण भबळीन देखाव पड़े, तेमेत मे माणहु नो सोरो आवह़े तीहया दाड़े देखाव पड़हे। 25 पण पेले वारु से के तीने घणा दुख उचलवा पड़हे, अने आहयी पीड़ी ना माणहु तीनो नीकारो करहे। 26 जेम पेल्‌ना वारा मे नुहा ना दाड़ा मे हयलु हतु, तेमेत माणहु ना सोरा ना दाड़ा मे बी हयहे। 27 जीने दाड़े लग नुहा मोट्‌ला ढुंड्‌यु मे नी बह्‌यो तां लग माणहु खाता-पीता हता, अने तीमनी मे वेवा करता र्‌या। अने उचकाहलोत मुसळधार्‌यो पाणी आयो अने तीमने आखा ने खुटाड़ देदो। 28 अने एमेत लुत ना दाड़ा मे हयलु हतु। अने माणहु खाता-पीता र्‌या, लेणु-देणु करता र्‌या, रोपा लगाड़ता र्‌या, अने घोरु बणावता र्‌या; 29 पण जे दाड़े लुत सदोम ह़ेर मे गेथो नकळी ज्‌यो, ते दाड़े आक्‌ठु अने बगड़ला पाणीन तेवु ह़रगे गेथु पड़्‌यु, अने आखा खुट ज्‌या। 30 जत्‌यार माणहु नो सोरो अगळ हयवान दाड़े बी एमेत हयहे।

31 ✝"तीहया दाड़े जे बी घोर ना छत पोर हय, अने तीनु ह़मान घोर मे हय, तीहयो तीना ह़मान ने लेवा करीन ना उतरे, अने कोय बी खेतर मे हय तीहयो पासो नी आवे। 32 तमु लुत नी घोरवाळी ने फोम राखो के तीनी ह़ाते ह़ु हयु। 33 ✝जे कोय आह़फा नो जीव ने बचाड़वा हींडे तीहयो तीना जीव ने खोय देय, अने जे कोय आह़फा ना जीव ने खोय देय, तीहयो तीना जीव ने बचाड़ लेहे। 34 मे तमने केम, एक खाटला पोर बे जणा ह़ुय र्‌या हहे, एक ने उचलीन जत रेहे, अने बीजा ने सोड़ देहे। 35 बे बयरा भेळात घट्‌ये बहीन दळती हहे ता तीनी माय्‌न एक ने उचलीन जत रेहे, अने बीजी ने सोड़ीन जत रेहे। 36 बे माणहु खेतर मे हहे, एक ने उचलीन जत रेहे; अने बीजा ने सोड़ीन जत रेहे।"

37 आहयी आखी वात ह़मळीन ईसुन चेला ईसु ने पुछ्‌या, "मालीक! आहयु कां हयहे?" ईसु तीमने केदो, "जां मरलु धोड़ से, तांत मोट्‌ला घुवड़ा बी भेळा हयहे।"