1 अळी ईसु अने तीना चेला अराम ना दाड़े गम ना खेतर माय्‌न जवा बाज र्‌या हता। अने तीना चेला उंब्‌या तोड़ी-तोड़ीन हात मे चोळी-चोळीन खाता हता। 2 तत्‌यार थोड़ाक फरीसी पंथवाळा केवा बाज ज्‌या के "जे काम अराम ना दाड़े नी करवा जोवे तीहयु काम काहा करत्‌ला?"

3 ईसु तीमने केदो, "तमु आहयु नी भण्‌या ह़ु? के जत्‌यार राजा दावुद अने तीना ह़ाती ने भुक लागी, ता दावुद ह़ु कर्‌यो? 4 तीहयो भगवान ना मंदीर मे जाय्‌न भेट ना रोट्‌ला चुटीन खादो, तीहया रोट्‌ला ते भगवान ना पुंजारा ने एतरात खावा जोवे, पण दावुद आह़फो बी खादो अने तीना ह़ाती ने बी खावा करीन आप्‌यो।"

5 अने ईसु तीमने केदो, "मे मनख्‌या नो बेटो अराम ना दाड़ा नो बी मालीक से।"

6 अने ईसम हयु के काना बीजा अराम ना दाड़े, भगवान ना भक्‌ती ना घोर मे जाय्‌न ईसु ह़ीकाड़वा बाज र्‌यो हतो अने तां ह़ारीक एक माणेह हतु, तीनो जमणो हात लखवु लागीन ह़ुक जेलो हतो। 7 युहदी-धरम ह़ीकाड़न्‌या अने फरीसी पंथवाळा ईसु पोर गुनो लगाड़वा करीन तकाय र्‌या हता, के ईसु अराम ना दाड़े कोयने आरगो करे के नी करे। 8 पण तीहयो तीमनो वीच्‌यार जाणतो हतो; एतरे ईसु ह़ुकला हात वाळा माणेह ने केदो, "उठ अने वच मे उबो हय जा।" तीहयो उठीन उबो हय ज्‌यो। 9 ईसु तीहया माणहु ने केदो, "मे तमने आहयु पुछु के अराम ना दाड़े ह़ु करवा वारु से, भलु करवा वारु से के बुरु करवा वारु से, अने जीव बचाड़वा वारु से के मारवा वारु से?" 10 ता तीहया माणहु पोर नींगा नाखीन ईसु तीहयु माणेह ने केदो, "तारो हात नाम्‌बो कर।" अने तीहयो नाम्‌बो हात कर्‌यो अने तीनो हात वारु हय ज्‌यो।

11 अने फरीसी माणहु घणा जबर रीहवाय ज्‌या, अने आह़फात वीच्‌यार काडीन केदा, के आपणु ईसु ना वीरोद मे ह़ु करया?

12 तीहया दाड़ा मे एक दाड़े ईसु वीन्‌ती करवा करीन एक बड़ा पोर चड़्‌यो अने तीहयो आखी रात भगवान सी वीन्‌ती करतो र्‌यो। 13 जत्‌यार दाहड़ु उग्‌यु तत्‌यार तीहयो आह़फा ना चेला ने ह़ाते बोलायो अने तीमनी मे गेथा बारे जणा ने टाळीन तीमने खुस-खबर ना नेवताळा केदो। 14 सीमोन ने; जीनु नाम तीहयो पतरस बी पाड़्‌यो; अने तीना भाय ने; अने अंदर्‌यास याकुब अने युहन्‌ना ने; अने फीलीपुस ने; अने बरतुलमय ने; 15 अने मत्‌ती ने; अने थोमस ने; अने हलफाय ना बेटा याकुब ने; अने सीमोन ने, जे देस भक्‌त केवायतो हतो, 16 अने याकुब नो बेटो यहुदा अने यहुदा ईस्‌करीयोती; जे ईसु ने धरावण्‌यो बण ज्‌यो।

17 ईसु तीना चेलाम नी ह़ाते बड़े गेथो उतरीन एक बराबर जागा मे उबो री ज्‌यो। तां तीना ढेरेत बीजा चेला बी हता। हेतरुत नी, पण तां माणहु नो एक घणो मोटो मेळो बी हतो; तीहया मेळा मे आखा युहद्‌या ना अने यरुसलेम ना अने दर्‌या धेड़े वाळा सुर अने सेदा ह़ेर ना माणहु बी हता। 18 तीहया तीनी ह़ीकापण ह़मळवा अने आह़फा मंदवाड़ मे गेथा वारु हयवा करीन आय रेला, तीमने ईसु वारु कर्‌यो। वीटळ्‌ळा भुत ना हक मे गेथा सोड़ावीन आरगा करतो हतो। 19 आखा माणहु ईसु ने छीमवा नी हेर करीन आय र्‌या हता, काहाके ईसु मे गेथी ताखत नीकळीन आखा ने वारु करती हती।

20 ईसु आह़फा ना चेला भणी भाळीन केदो, "जुगाळा से तमु, जे हमणे गरीब से; काहाके भगवान नु राज तमारुत से!"

21 "जुगाळा से तमु, जे हमणे भुकला से; तमु आफरी जहु जुगाळा से तमु, जे हमणे रड़ो; तमु अळतेण ह़ाहु!"

22 ✝"जुगाळा से तमु, जत्‌यार माणहु तमारी सी ह़ीगी करे, अने तमारो वाक काडे अने तमने टाळ देय; अने तमने वीटळ्‌ळा कीन, तमने जात बारा कर देय, काहाके तमु मनख्‌या ना बेटा ईसु ने मानो!" 23 ✝जत्‌यार आसम हय ता, तमु खुस हय्‌न नाच्‌जो, काहाके ह़रग मे तमने घण मोटु ईलाम जड़हे। तमने वेला पाड़न्‌या ना आड़ा-बुड़ा बी भगवान वगे गेथा केवा वाळा माणेह ने हेमेत वेला पाड़्‌या करता हता। 24 गरा तमारी पोर: जे हमणे मालदार से; काहाके तमु पेले गेथा मजा ली लेदा! 25 गरा तमारी पोर जे हमणे आफरला से; तमु अळतेण भुकला रेहु! गरा तमारी पोर जे हमणे हाह़वा बाज र्‌या; काहाके तमु अळतेण कलपहु अने फुकु-फुकु रड़हु!

26 गरा तमारी पोर जत्‌यार आखा माणहु, जलम तमने वारु केय, काहाके हीमना आड़ा-बुड़ा बी भगवान नु नाम लीन झुट मेकण्‌या माणहु ने तमु घणा वारु कीन उदड़ेत वेहवार करला हता।

27 पण मे मारी वात ह़मळन्‌या ने केम: "आपणा वेरी ने मोंग कर; जे तमारी कुहराय करे, तीमनु भलु कर, 28 जे तमने सराप आपे, तीमने तमु बरकत आपो। जे तमारो वाक काडीन तमारु आबरु लेय तीमनी जुगु वीन्‌ती करो। 29 जे तमारा एक गाल्‌या पोर थापड़ देय, तीनी भणी आपणु बीजु गाल्‌यु बी ह़ाम्‌बु कर देवो। जे तमारो कोट हापकीन डगलु बी हापकवा हीन्‌डे, तीने मारु डगलु ना हापके करीन नी केजो। 30 जे तमारी पांह कंय मांगे, तां तमु तीने आप देवो अने जे तमारी पांह तारी चीज हापकी लेय, तीनी पांह पासु मांगवा नु हेर नी करजो। 31 ✝अने जे वेहवार नी हेर तमु बीजा सी कर र्‌या; तीहयो वेहवार तमु बीजा ह़ाते बी कर्‌या करो।"

32 कदीम तमु तीमने मोंग करो, जे तमने मोंग करे, तत्‌यार तमने बरकत जड़हे ह़ु? काहाके पापी बी तीमने मोंग करे जे तीमने मोंग कर्‌या करे। 33 कदीम तमु तीमनीत भलाय करो, जे तमारी भलाय करे तां तमने बरकत जड़हे ह़ु? काहाके पापी माणहु बी, जे तीमनी भलाय करे, तीमनुत भलु करे। 34 कदीम तमु तीमने उदार आपो जीमनी पांह पासु लेवा नी आह राखो, ता तमारो ह़ु फायदो? काहाके पापी बी पापी माणहु ने उदार आपे के आपलु तीहयु पासु लेय। 35 पण आपणा वेरी ने मोंग करो, अने तीमनी भलाय करो: अने मे कोयने एमेत आपही तां तीहयु पासु लेवा नी आह करीन नी आपु। अने ता तमने घणु मोटु ईलाम जड़हे; अने तमु आखान डायला भगवान ना सोरा-सोरी बण जहु, काहाके भगवान तीमनी पोर गीण करे जे भगवान पांह गेथु हात करीन बी भगवान ने घणो वारु से नी केय, अने तीमनी पोर बी गीण करे, जे कुहराय कर्‌या करे। 36 जीसम तमारो ह़रग वाळो बाह गीणाळ्‌ळो से तेमेत तमु बी गीणाळ्‌ळा बणो।

37 "अने कोयनो नीयाव ना करो, ता तमारो बी नीयाव नी हये; तमु कोय पोर गुनो ना लगाड़ो ता तमारी पोर बी गुनो नी लगाड़े। बीजा ने माफी आपो ता तमने बी माफी जड़ जहे। 38 आपो ता तमने बी भगवान आपहे: माणहु डाबी-डाबीन, अने हीलाय-हीलाय्‌न ह़ीग लगाड़ीन तमारा खोळा मे पोखड़हे; काहाके जे माप सी तमु मापहु तीहयात माप सी तमारी वाटु बी मपायहे।"

39 ✝ईसु तीमने एक अळी दाखलो ह़मळायो, "आंदळु, आंदळा ने वाट देखाड़ सके ह़ु? बेम जणा खाडा मे नी पड़े ह़ु?" 40 ✝चेलो मास्‌तर गेथो मोटो नी हये, पण पुरी-पुरी ह़ीकापण लीन तीहयो आह़फा ना मास्‌तर ने तेम बण जहे।

41 तु ह़ुका तारा भाय ना डोळा मे वाळु कचरु देखे, अने तारा डोळा मे वाळु खटकु तने नी देखातु? 42 जत्‌यार तमने आह़फाम ना डोळा अगळ देवायलु कचरु नी देखायतु, ता आपणा भाय ने कीसम केहु के, भाय! मने तारा डोळा मे भरायलु कचरु नीकाळवा दे? ए ढोंगड़ा करन्‌या! पेले आह़फा ना डोळा मे वाळु खटकु नीकाळ ले, तात तने आपणा भाय ना डोळा मे भरायलु कचरु काडवा नी टेमे वारु देखायहे।

43 "कानु बी वारलु झाड़ आसवु नी हय, जीनी मे रीकामा फोळ लागे, अने कानु बी रीकामु झाड़ आसवु नी हय, जे वारला फोळ लावे। 44 ✝आखा झाड़ नी ओळखाण तीमना फोळ नी लारे हये। काहाके माणहु कटाळस्‌या झाटवा मे गेथा, गुलर ना फोळ नी तोड़े; अने कटाळस्‌या झाड़ मे गेथा अंगुर नु फोळ नी तोड़े। 45 ✝भलाय करवा वाळो माणेह आह़फा ना मन मे गेथी भलाय नी वात नीकाळे; अने कुहर्‌यो माणेह आह़फा ना मन मे गेथी कुहराय नी वात नीकाळे; काहाके जे मन मे भरायलु रेय तीहयु तीना मन मे गेथु नीकळे।

46 "मे जे केम तीहयु ते तमु मान्‌ता नी, अने मने ‘ए मालीक, ए मालीक, काहा की र्‌या?’ 47 जे मारी ह़ाते आवीन मारी वात ह़मळे अने तीहयी वात ने मानीन जीवे, तीना बारा मे, मे केम के तीहयो कोय ह़रको से? 48 तीहयो तीहया माणेह ह़रको से, जे घोर बणावती वखत उंडोत नीव खोद्‌यो अने तीहया घोर नो नीव वातड़ला ढाटड़ा पोर गेथो उठाड़ीन घोर बणायो। अळतेण जत्‌यार नंदी आयी अने पाणी नी झलक नी ठोकर तीहया घोर ने अफठायी, पण तीहयी पाणी नी झलक सी ते घोर ओदर्‌यु नी; काहाके तीहयु घोर घणु पक्‌कु बणलु हतु। 49 पण जे मारी वात ह़मळे अने ते वात मानीन नी जीवे, तीहयो ते माणेह ह़रको से, जे धोळा मे नीव खोदीन नीव बांद्‌या वगर घोर बणायो अने पाणी नी झलक नी ठोकर ते घोर ने अफठायी ता तीहयु घोर तत्‌यारुत ओदरीन पड़ ज्‌यु, अने रीवण्‌या-तीवण्‌या हय ज्‌यु।"