Lucas 15

उजाड़्या सोरा नो दाखलो

11 अळतेण ईसु केदो, "काना माणेह ना बे सोरा हता। 12 तीमनी मे गेथो नान्‌लो सोरो आह़फा ना बाह ने आवीन केदो, ‘ए बाह! माल-धन मे गेथो जे वाटो मारो से, तीहयो वाटो मने आप दे’ एतरे बाह बे सोरा ने तीमनो वाटो वाट देदो।" 13 अने ढेरेत दाड़ा नी हया अने नान्‌लो सोरो आखु कंय भेळु करीन एक-बीजा देस मे जत र्‌यो, अने तां तीहयो आह़फा नो वाटा मे आवलु माल-धन फालतु काम मे वापर देदो। 14 जत्‌यार तीहयो आखु कंय वापर देदो, ता तीना देस मे घणो मोटो काळ पड़्‌यो, अने तीहयो; गरीब हय ज्‌यो। 15 एतरे तीहयो तीहया देस मे काम ह़ोदवा ज्‌यो, अने एक मालदार कीरसाण्‌यान तां जत र्‌यो। तीहयो तीने आह़फा ना खेतर मे ह़ुवर्‌या चारवा करीन मोकली देदो। 16 तीहयो एतरो भुकलो हय ज्‌यो के, जे फोळ ह़ुवर्‌या खाता हता, तीहयो फोळ खावा हींडतो हतो पण तीहयो फोळ बी तीने खावा करीन नी आप्‌ता हता। 17 जत्‌यार तीहयो वीच्‌यार कर्‌यो अने आह़फात केदो, मारा बाह ना घोर मे आखा दाड़क्‌या ने पेट भरीन खाणु जड़े, अने मे आञे ह़ारीक भुकलो मर र्‌यो। 18 मे मारा बाह ने तां पासो जही अने केही के, "बाह मे तारा वीरोद मे अने भगवान ना वीरोद मे पाप करलो से। 19 मे तारो सोरो केवाय्‌वा नो हकदार्‌यो नी हय। पण गीण करीन मने एक तारा दाड़क्‌या नी तेम राख ले।" 20 ता तीहयो उठीन आह़फा ना बाह ने तां चाल पड़्‌यो: अने तीहयो आह़फा ना घोर गेथो थोड़ोक सेटो हतो, के तीनो बाह तीने देख लेदो, अने तीनी पोर गीण कर्‌यो, अने आह़फा ना सोरा ने भेटवा करीन दवड़ीन ज्‌यो अने गळे लगाड़्‌यो अने तीने गोळा देदो। 21 ता सोरो तीने केदो, "बाह, भगवान ना वीरोद मे अने तारा वीरोद मे पाप करलो से; मे तारो सोरो केवाय्‌वा नो हकदार्‌यो नी हय।" 22 पण बाह आह़फा ना सोरा ने बोलायो, अने पावर्‌याम ने केदो, "सोटात जीन आखा मे गेथा वारु लुगड़ा लावीन मारा सोरा ने पेरावो, अने एक हात नी वीटी आंगळी मे पेरावो अने पोगु मे खाहड़ा पेरावो, 23 अने अळतेण आपणु आखाम वारलु वाछड़ु लावीन मारो, के आपणु खाया अने खुसी मनावहु। 24 काहाके मारो आहयो सोरो मर जेलो हतो, पण हाव जीवतो हय जेलो से। तीहयो खोवाय जेलो हतो, पण हाव जड़ जेलो से। अने तीहया खुसी मनाव्‌वा बाज ज्‌या।"

25 तीहयी टेमे तीनो मोट्‌लो सोरो खेतर मे हतो। अने जत्‌यार तीहयो मोट्‌लो भाय खेतर मे गेथो आवीन घोर ह़ाते पुग्‌यो, ता तीहयो वाजा-गाजा ह़मळीन अने माणहु ने नाचत्‌ला देखीन वहराय ज्‌यो। 26 अने तीहयो एक पावर्‌या ने बोलायो, अने तीने पुछ्‌यो के आहयु ह़ु हय र्‌यु। 27 तीहयो पावर्‌यो जपाप आप्‌यो, "तारो नान्‌लो भाय आरगलो पासो घोर आवती र्‌यो, करीन तारो बाह आमने वाछड़ु मंगाड़ीन मरावलो से।"

28 आहयी वात ह़मळीन तीहयो मोट्‌लो भाय घणो रीहवाय ज्‌यो, अने घोर मे लगण नी ज्‌यो: पण तीनो बाह बारथो आयो अने तीने घोर मे लीजवा करीन रावण्‌या करवा बाज ज्‌यो। 29 पण तीहयो आह़फा ना बाह ने केदो, "देख, मे एतरा साल लगण तारी सेवा करतो आय र्‌यो, अने कदी तारी वात नी टाळ्‌यो। पण तु मने मारा दोस्‌तीदार्‌या ह़ाते मारीन खावा अने खुसी मनाव्‌वा करीन तु मने एक बोकड़ा नु गीदल्‌यु लग नी आप्‌यो!" 30 पण तारो आहयो नान्‌लो सोरो घोर सोड़ीन जत रेलो, अने तारा आखा पय्‌हा ने रांड ने तां जीन वापर देदो, अने हमणे तीहयो पासो घोर आयो, ता तु तीनी वाटु वाछड़ु मंगाड़ीन मरायो। 31 मोट्‌ला सोरा नी वात ह़मळीन तीनो बाह तीने केदो, "मारा सोरा, तु आञे जलम मार ह़ाते रेही। अने मारु जेतरु से तीहयु तारुत से। 32 पण हमणे खुस हय्‌न खाणु खावा वारु से काहाके तारो भाय मर जेलो हतो, पण जीवतो हय जेलो से। तीहयो खोवाय जेलो हतो, पण हमणे जड़ जेलो से।"