22 जत्‌यार तीहया खावा बाज रेला, ता ईसु हात मे रोट्‌लो धर्‌यो, अने रोट्‌ला जुगु भगवान ने, तु घणो वारु से कीन रोट्‌लो भागीन आह़फा ना चेला ने आपतो जीन केदो, "लेवो, आहयो रोट्‌लो खावो, आहयो रोट्‌लो मारु डील से।"

23 आहयी रीते रोट्‌लो खायलीन ईसु अंगुर नो रोह भरला पीयाला जुगु भगवान ने तु घणो वारु से कीन चेला ने आप्‌यो अने तीहया आखा तीनी मे गेथो पीदा। 24 आहयु तीहयो तीमने केदो, "आहयो अंगुर नो रोह नो पीयालो, मारा लोय मे बोली करला नवला वायदा नी सेलाणी से, आहयु लोय मे तमारी जुगु वयाड़वा वाळो से।"✝14:24 नीरगमन 24:8; यीरम्‌या 31:31-34 25 मे तमने ह़ाचलीन केम, "मे अंगुर नो रोह तीहया दाड़े लग कदी नी पीम जत्‌यार लग भगवान ना राज मे नवलो अंगुर नो रोह नी पी लेम।"