1 पुरा बे साल वीतवा पोर फीरोन राजा आहयु ह़पनु देख्‌यो के तीहयो नील नंदी नी धेड़े उबो से। 2 अने तीहयी नंदी मे सी ह़ात घटाळी अने जबरी-जबरी गायु नीकळीन नंदी नी धेड़े नो चारो चरवा बाज जी। 3 अने ह़ु देख्‌या के तीनी पछळ अळी ह़ात गायु, जे मांदली अने लुल्‌ली से, नील नंदी मे गेथी नीकळी; अने बीजी गायुम नी ह़ाते नंदी नी धेड़े जाय्‌न उबी हय जी। 4 तत्‌यार आहयी मांदली अने लुल्‌ली गायु तीहयी ह़ात घटाळी अने जबरी-जबरी गायुम ने खाय जी। तत्‌यार फीरोन जाग उठ्‌यो। 5 अने तीहयो अळी ह़ुय ज्‌यो अने बीजु ह़पनु देख्‌यो के एक डांडळा मे सी ह़ात मोटा अने वारु-वारु उंब्‌या नीकळ्‌या। 6 अने ह़ु देख्‌यो के तीनी पछळ ह़ात उंब्‌या पातळी अने उगणली झाळ सी चीमायली नीकळी। 7 अने आहया पातळ्‌ळा उंब्‌या तीहया ह़ांत जाडा अने दाणा सी भरायला उंब्‌याम ने गळ ज्‌या। तत्‌यार फीरोन राजा जाग्‌यो, अने तीने मालम हयु के आहयु ह़पनुत हतु। 8 ह़वारे फीरोन नु मन घबरायलु हतु; अने तीहयो मीस्‌र ना आखा अक्‌कल वाळा, अने बड़वा ने बोलाव्‌वा मोकल्‌यो; अने तीमने आह़फा ह़पना देखाड़्‌यो; पण तीमनी मे सी कोय बी तीमनु फोळ फीरोन राजा ने नी देखाड़ सक्‌यो।✝

9 तत्‌यार पीवाड़वा वाळा नो मुख्‌यो फीरोन राजा सी केदो, "मारा गुना आज मने फोम आया: 10 जत्‌यार फीरोन राजा आह़फा पावर्‌याम नी सी खीजवायलो हतो, अने मने अने रांदवा वाळा ना मुख्‌या ने धरावीन रखवाळी करन्‌या सीपायड़ा ना मुख्‌या ना घोर ना जेलखाना मे बंद कराय देदो हतो, 11 तत्‌यार आमु बेम जणा एकीत राते मे, आह़फा-आह़फाम ना हुनर नी अनसारे ह़पनु देख्‌या; 12 अने तां अमारी ह़ाते एक ईब्‌रानी जुवान्‌यो हतो, जे रखवाळी करन्‌या सीपायड़ा ना मुख्‌या नो पावर हतो; तत्‌यार आमु तीने देखाड़्‌या, अने तीहयो अमारा ह़पनाम नो फोळ अमारी सी केदो, अमारी मे सी एक-एक नु ह़पना नु मतलब तीहयो देखाड़ देदो। 13 अने जीसम-जीसम मतलब तीहयो आमने केदो हतो, तेमेत हयु बी, मतलब मने ते मारो जागो अळी जड़्‌यो, पण तीने ते फासी पोर टांग देदा।"

14 तत्‌यार फीरोन राजा युसुफ ने बोलाय्‌न लाव्‌वा मोकल्‌यो। अने तीने छाटोत जेलखाना सी बारो नीकाळ्‌या, अने नीम्‌बाळा कतराय्‌न, अने लुगड़ा बदलीन फीरोन राज नी अगळ आयो। 15 फीरोन युसुफ सी केदो, "मे एक ह़पनु देखलो से, अने तीनु मतलब देखाड़वा वाळु कोय बी नी हय; अने मे तारा बारा मे ह़मळ्‌ळो से, के तु ह़पनु ह़मळतेत तीनु मतलब देखाड़ सकत्‌लो।"

16 युसुफ फीरोन सी केदो, "मे ते कंय नी जाणतो: भगवानेत फीरोन राजा नी लेदे वारु बोल आलहे।"

17 अळतेण फीरोन राजा युसुफ सी केवा बाज ज्‌यो, "मे मारा ह़पना मे देख्‌यो, के मे नील नंदी नी धेड़े उबो से। 18 अळी, ह़ु देख्‌यो, के नील नंदी मे गेथी ह़ात जबरी अने घटाळी-घटाळी गायु नीकळीन नंदी नी धेड़े वाळो नो चारो चरवा बाज जी। 19 बाद मे, ह़ु देख्‌यो, के तीमनी पछळ ह़ात अळी गायु नीकळी, जे हारली, अने ढेरेत मांदली, अने लुल्‌ली से; मे ते आखा मीस्‌र देस मे आसवी खोड़ली गायु कदी नी देख्‌यो। 20 आहयी लुल्‌ली अने खोड़ली गायु पेली ह़ातोव जबरी-जबरी गायु ने खाय जी। 21 अने जत्‌यार तीहयी तीमने खाय जी तत्‌यार आहयु मालम नी पड़तु हतु के तीहयी तीमने खाय जी, काहाके तीहयी पेलेन तेम जीसम के तीसम खोड़ली री। तत्‌यार मे जाग उठ्‌यो। 22 अळतेण मे बीजो ह़पनु देख्‌यो, के एकीत डांडळा मे ह़ात वारु-वारु अने दाणा सी भरला उंब्‌या नीकळी। 23 अळतेण ह़ु देख्‌यो, के तीमनी पछळ अळी ह़ात उंब्‌या पातळी अने उगवणु वाहळा सी चीमायली नीकळी। 24 अने आहयी पातळी उंब्‌या तीहयी ह़ात वारु-वारु उंब्‌या ने गळ जी। अने मे बड़वा ने देखाड़्‌यो, पण आने ह़मजाड़वा वाळो कोय नी जड़्‌यो।"

25 तत्‌यार युसुफ फीरोन राजा सी केदो, "फीरोन राजा नु ह़पनु ह़रकु से, भगवान जे काम करवा हींडे, तीने फीरोन राजा पोर उजन्‌तु करलो से। 26 तीहयी ह़ात वारु-वारु गायु ह़ात साल से; अने तीहयी ह़ात वारु-वारु उंब्‌या बी ह़ात साल से; ह़पना ह़रकुत से। 27 अळतेण तीनी पछळ जे लुल्‌ली अने खोड़ली गायु नीकळी, अने जे ह़ात पातळी अने उगवणु वाहळु सी चीमायली उंब्‌या नीकळी, तीहया काळ ना ह़ात साल हयहे। 28 आहयी तीहयीत वात से जे मे फीरोन राजा सी की चुक्‌यो, के भगवान जे काम करवा हींड र्‌यो, तीने तीहयो फीरोन राजा ने देखाड़लो से। 29 ह़मळ, आखा मीस्‌र देस मे ह़ात वरहु ते ढेरेत दाणा पाकहे। 30 तीनी बाद ह़ात वरहु काळ ना आवहे, अने आखा मीस्‌र देस मे माणहु आहयी आखी मेर ने वीहरी जहे; अने काळ सी देस खत्‌तम हय जहे। 31 अने काळ घणो जुदो पड़हे के वारली मेर अने फसल कोय ने फोम नी रेय। 32 अने फीरोन जे आहयु ह़पनु बे वार देखलो से आनु मतलब आहयुत से के आहयी वात भगवान भणी गेथी पक्‌की हय जेली से, अने भगवान आने ममार पुरो करहे।

33 "एतरे हाव फीरोन राजा काना ह़मजदार अने अक्‌कल वाळा माणेह ने ह़ोदीन तीने मीस्‌र देस नो मुख्‌यो मंत्‌री ठेरावे। 34 फीरोन राजा आहयु करे के देस पोर अदीकार्‌या पक्‌का करे, अने जत्‌यार लग वारली मेर ना ह़ात वरहु रेय तत्‌यार लग तीहयो मीस्‌र देस नी मेर नो पांचवो वाटो लीया करे। 35 अने तीहयो आहया वारला वरहु मे आखा भाती नी खावा नी चीज एकठी करे, अने ह़ेर-ह़ेर मे गोदाम घोर खाणा नी लेदे, फीरोन ना हक मे करीन तीनी रखवाळी करे। 36 अने तीहयी खावा नी चीज काळ ना तीहया ह़ात वरहु नी लेदे रेय, जे मीस्‌र देस मे आवहे, देस ने खावा नी लेदे मेकली रेय, जीनी सी देस तीहया काळ सी खत्‌तम नी हये।"

37 आहयी वात फीरोन राजा अने तीना आखा अदीकार्‌या ने वारु लागी। 38 एतरे फीरोन आह़फाम अदीकार्‌या ने केदो, "ह़ु आमने आसवो माणेह, जीसम आहयु से, जीनी मे भगवान नी आत्‌मा रेत्‌ली से, जड़ सके ह़ु?" 39 अळी फीरोन युसुफ सी केदो, "भगवान तने जे एतरु ग्‌यान आपलो से, के तारीन तेवो कोय ह़मजदार अने अक्‌कल वाळो नी हय, 40 आहया कारण तु मारा घोर नो अदीकारी हयही, अने तारा हुकम नी अनसारे मारी आखी असामी चालहे, नीस्‌तो राजगादी ना वारा मे तार सी मोटो ठेरही।✝ 41 अळी फीरोन राज युसुफ सी केदो, ह़मळ, मे तने मीस्‌र ना आखा देस नी उपर अदीकार्‌यो ठेराय देम।"✝ 42 तत्‌यार फीरोन आह़फा ना हाते गेथी सील-टप्‌पा वाळी वीटी नीकाळीन युसुफ ना हात मे पेराय देदो; अने तीने वारु लेफड़्‌या लुगड़ा पेराड़ मांग्‌यो, अने तीना गळा मे ह़ोना नी ह़ाकळ पेराय देदो;✝ 43 अने तीने आह़फा नी बीजी घोड़ागाड़ी पोर चड़ाय मांग्‌यो; अने माणहु तीनी अगळ-अगळ आहयु परच्‌यार करता चाल्‌या, के मांडा टेकीन वांद्‌या करो अने तीहयो तीने मीस्‌र देस पोर डाहलो मंतरी ठेरायो। 44 अळी फीरोन राजा युसुफ सी केदो, "फीरोन राजा ते मे से, अने आखा मीस्‌र देस मे कोय बी तारा हुकम वगर ह़ात अने पोग नी हीलावे।" 45 फीरोन राजा युसुफ नु नाम सापनत्‌पानेह* पाड़्‌यो। अने ओन ह़ेर ना पुंजारा पोतीपेरा नी सोरी आसनत सी तीना वेवा कराय देदो। अने युसुफ आखा मीस्‌र देस मे फीरवा बाज ज्‌यो। 46 जत्‌यार युसुफ मीस्‌र ना राजा फीरोन नी ह़ाते उबो हयो, तत्‌यार तीहयो तीस साल नो हतो। तीहयो फीरोन राजा नी ह़ाते सी नीकळीन आखा मीस्‌र देस मे फीरवा बाज ज्‌यो। 47 वारला ह़ांत वरहु मे धरती ढेरेत अन पयदा करती री, 48 अने युसुफ तीहया ह़ात वरहु मे आखा भातीन खावा नी चीजु, जे मीस्‌र देस मे हयती हती, एकठी करीन ह़ेर मे मेल्‌तो ज्‌यो, अने हरेक ह़ेर नी च्‌यारो मेर ना खेतर नी खावा नी चीज ने तीहयात ह़ेर मे एक्‌ठो करतो ज्‌यो। 49 आहयी रीते युसुफ मेर ने दर्‌या नी रेत नी तेम घणी ढेरकी भेळी कर्‌यो, आञे लग के तीहयो तीमने गीणवा छोड़ देदो; काहाके तीहया गीणाये नी एतरु हय ज्‌यी।

50 काळ ना पेल्‌ना साल ने आव्‌वा सी पेले युसुफ ना बे सोरा हया, ओन ह़ेर ना पुंजारा पोतीपेरा नी सोरी आसनत सी पयदा हया। 51 अने युसुफ आह़फा ना मोट्‌ला सोरा नु नाम आहयु कीन मनस्‌से* पाड़्‌यो, के "भगवान मार पांह सी मारु आखु दुख, अने मारा बाह नु आखु घोराणा" वीहराड़ देदलो से। 52 बीजा नु नाम तीहयो आहयु कीन एप्‌रेम* पाड़्‌यो, के मने दुख झेलवा ना देस मे भगवान मने फोळ आपलो से।

53 अने मीस्‌र देस ना वारली मेर पाकवा ना ह़ात वरहु खत्‌तम हय ज्‌या। 54 अने युसुफ नी केवा नी अनसारे ह़ात वरहु नो काळ सुरु हय ज्‌यो। आखा देस मे युसुफ केदलो तीनी अनसारे काळ पड़वा बाज ज्‌यो; पण आखा मीस्‌र देस अन हतु। ✝ 55 जत्‌यार मीस्‌र नु आखु देस भुकलु मरवा बाज ज्‌यु; तत्‌यार माणहु फीरोन राजा सी आड़ी-आड़ीन खाणु मांगवा बाज ज्‌या; अने तीहयो आखा मीस्‌र ना माणहु सी कीया करतो हतो, "युसुफ ने तां जावो; अने जे कंय तीहयो तमारी सी केय, तीहयुत करो।" 56 एतरे काळ आखी धरती पोर फेल ज्‌यु, अने मीस्‌र देस मे काळ घणु जुदु हय ज्‌यु, तत्‌यार युसुफ आखा गोदाम खोल-खोलीन मीस्‌र ना माणहु ने अन वेचवा बाज ज्‌यो। 57 एतरे आखी धरती ना माणहु मीस्‌र देस मे अन वेचातु लेवा नी लेदे युसुफ ने तां आव्‌वा बाज ज्‌या, काहाके आखी धरती पोर घणो-जुदो काळ पड़ र्‌यो हतो।