अब्राम नी ह़ाते यहोवा नो वायदो करवा ना बारा मे
1 आहयी वातु नी अळतेण यहोवा नो आहयो बोल दर्सन मे अब्राम नी पांह पुग्यो "ए अब्राम, ना बीहे; मे तारी ढाळ अने तारु घणु मोटु फोळ से।"
2 अब्राम केदो, "ए यहोवा, मे ते वांज्यो से, अने मारा घोर नो वारीसदार आहयो दमीस्क वाळो एलीएजेर हयहे, पण तु मने ह़ु आपही?" 3 अळी अब्राम केदो, "मने ते तु अवल्यात नी आप्यो, अने ह़ु देखु, के मारा घोर मे पयदा हयो एक जणो मारो वारीसदार हयहे।"
4 तत्यार यहोवा नु आहयो बोल तीनी पांह पुग्यो, "आहयो तारो वारीसदार नी हये, तारो जे सोरो हयहे, तीहयोत तारो वारीसदार हयहे।" 5 अने तीहयो तीमने बारथो ली जाय्न केदो, "ह़रग भणी नींगा करीन तारामंडळी ने गीण, ह़ु तु हीमने गीण सके?" अळतेण तीहयो तीने केदो, "तारी अवल्यात आसमेत हयहे।"15:5 रोमीयो 4:18; ईब्रानीयो 11:22
6 तीहयो यहोवा भगवान पोर भरहो कर्यो; अने यहोवा आहयी वात ने तीनी कीताप मे खरलो गण्यो।15:6 रोमीयो 4:3; गलातीयो 3:6; याकुब 2:23
7 अने तीहयो तीने केदो, "मे तीहयोत यहोवा से जे तु कसदीयो ना उर ह़ेर सी बारथो ली आयो, के तने आहया देस नो हक आपु।"
8 तीहयो केदो, "ए मालीक यहोवा मे कीसम जाणु के मे आनो अदीकार्यो हयही?"
9 यहोवा तीने केदो, "मारी जुगु तीन साल नी एक वाछड़ी, अने तीन साल नी एक बोकड़ी, अने तीन साल नु एक गाडरो, अने एक हुली अने पारवा नु बच्चु ली ले।" 10 अने आहया आखाम ने लीन, तीहयो वचे सी बे कटका कर देदो अने कटका ने आमने-अगळ मेल देदो पण चड़ाम ने तीहयो कटका नी कर्यो। 11 जत्यार मांह खाण्या चड़ा मांह पोर झपट्या, ता अब्राम तीमने उडाड़ देदो।
12 जत्यार दाहड़ो बुडवा बाज ज्यो, ता अब्राम ने घणी नींदर आवी; अने देखो, घणी बीक अने मोट्लु अंदारलु तीने घेरवी लेदु।15:12 अय्युब 4:13,14 13 तत्यार यहोवा अब्राम सी केदो, "आहयु पक्को जाण के तारा अवल्यात बीजा देस मे अंजाणला हय्न रेहे, अने तीहया देस ना माणहु ना पावर्या हय जहे; अने तीहया तीमने च्यार ह़ोव साल तक दुख देहे; 15:13 नीरगमन 1:1-14; नेवताळा ना काम 7:6 14 अळतेण जीना देस ना तीहया पावर्या हयहे तीमने मे डंड आपही: अने तीनीन अळतेण तीहया ढेरकु धन तां गेथा लीन नीकळी आवहे।15:14 नीरगमन 12:40,41; नेवताळा ना काम 7:7 15 तु तारा मरला आड़ा-बुड़ा मे सांती सी भेसकाय जही; तने डाहवारा मे मरहे ता कादा मे गाड़ देहे। 16 पण तीहया च्यार पीड़ी मे आञे पासा आवहे: काहाके हमणे तक एमोरी पाप करवा बंद नी कर्या।"
17 अने आसम हयु के जत्यार दाहड़ो बुड ज्यो अने घणु अंदारु हय ज्यु, ता एक वीटी जीनी मे सी धुकरो नीकळतो हतो अने एक धपत्लु कंदील देखाव पड़्यु जे तीहया कटका ना वचमे सी हय्न नीकळी जी। 18 तीहया दाहड़े यहोवा अब्राम नी ह़ाते आहयो वायदो कर्यो, "मीस्र नी मोट्ली नंदी सी लीन फरात नाम नी मोट्ली नंदी तक जेतरा देस से,15:18 नेवताळा ना काम 7:8 19 मतलब, केनीयो, कनीज्जीयो, कदमोनीयो, 20 हीत्तीयो, परीज्जीयो, रपाईयो, 21 एमोरीयो, कनानीयो, गीर्गासीयो अने यबुसीयो ना देस, मे तारा अवल्यात ने आपलो से।"