1 जत्‌यार याकुब ह़मळ्‌यो के मीस्‌र देस मे अन से, तत्‌यार तीहयो आह़फा ना सोराम ने केदो, "तमु एक बीजा नु मोडु ह़ुका देख र्‌या।" 2 अळतेण तीहयो केदो, "मे ह़मळ्‌ळो से के मीस्‌र देस मे अन से; एतरे तमु तां जाय्‌न अमारी लेदे अन वेचातु ली आवो, जीनी सी आपणु नी मरया, पण जीवत्‌ला रेय।"✝ 3 तत्‌यार युसुफ ना दह भाय अन लेवा करीन मीस्‌र देस ज्‌या। 4 पण युसुफ ना भाय बीन्‌यामीन ने याकुब आहयो वीच्‌यार करीन भायुम नी ह़ाते नी मोकल्‌यो के कंखर आसम नी हये के तीनी पोर कोय वेला आय पड़े।

5 आहयी रीते जे माणहु अन वेचातु लेवा आया तीमनी ह़ाते याकुब ना सोरा बी आया; काहाके कनान देस मे बी भारी काळ हतु। 6 युसुफ ते मीस्‌र देस नो मुख्‌यो मंतरी हतो, अने तीहया देस ना आखा माणहुम ने तां अन वेचतो हतो; एतरे जत्‌यार युसुफ ना भाय आया ता भोय्‌मे मोडा ना भरहे पड़ीन वांद्‌या। 7 तीमने देखीन युसुफ ओळखी ते लेदो, पण तीमनी अगळ भोळो बणीन वातड़ो रीन तीमने पुछ्‌यो, तमु का गेथा आय र्‌या? तीहया केदा, "आमु ते कनान देस सी अन वेचातु लेवा नी लेदे आवला से।"

8 युसुफ आह़फा ना भायुम ने ओळखी लेदो, पण तीहया तीन नी ओळख्‌या। 9 तत्‌यार युसुफ आह़फा ना तीहया ह़पनाम ने फोम करीन जे तीहयो तीमना वारा मे देखलो हतो, तीमने केवा बाज ज्‌यो, "तमु होगा-होगा देस ना बारा मे जाणवा वाळा से; अने मीस्‌र देस नी केवी हालत से देखवा करीन आवला से।"✝

10 तीहया तीने केदा, "नी, नी," ए मालीक "तारा पावर्‌या खावा नी चीज वेचाती लेवा करीन आवला से। 11 आमु आखा एकीत बाह ना सोरा से, आमु ह़ुदला माणहु से, तारा पावर्‌या ह़ताय्‌न देस ना बारा मे जाणवा वाळा नी हय।"

12 युसुफ तीमने केदो, "नी, नी, तमु आहया देस नी हालत देखवात आवला से।"

13 तीहया केदा, "आमु तारा पावर्‌या बारे भाय से, अने कनान देस मे रेवा वाळा एकीत अदमी ना सोरा से, अने नान्‌लो आहयी टेमे अमारा बाह पांह से, अने एक मर जेलो से।"

14 "तत्‌यार युसुफ केदो," मे ते तमारी सी की देदो, के "तमु होगात ह़ेर ना बारा मे पतो लगाड़वा वाळा से। 15 ता आहयी रीते तमारी पारख हयहे, फीरोन ना जीवाय नी ह़ाम, जत्‌यार लग तमारो नान्‌लो भाय आञे नी आवे तत्‌यार लग तमु आञे सी नी जाय सकता। 16 एतरे आह़फाम नी मे सी काना एक ने मोकली देवो के तीहयो तमारा भाय ने ली आवे, अने तत्‌यार लग तमु केद मे रेहु; आहयी रीते तमारी वात पारखी जहे के तमु खरला से के नी हय। कदी खरला नी ठेर्‌या तत्‌यार ते फीरोन ना जीवाय नी ह़ाम तमु पक्‌का होगात ह़ेर ना बारा मे पतो लगाड़वा वाळा ह़मजी जहु।" 17 तत्‌यार युसुफ तीमने तीन दाहड़ा लग जेलखाना मे राख्‌यो।

18 तीसरे दाड़े युसुफ तीमने केदो, "एक काम करो ता जीवत्‌ला रेहु; काहाके में भगवान नी बीक मानु; 19 कदी तमु ह़ुदला माणेह हय, ता तमु आखा भायुम मे सी एक जणो आहया जेलखाना मे केद रेय; अने तमु आह़फाम ना घोरवाळाम नी भुक मीटाड़वा नी लेदे अन ली जावो। 20 अने आह़फा ना नान्‌ला भाय ने मारी पांह ली आवो; आहयी रीते तमारी वात खरली ठेरहे, अने तमु मरवा सी बच जावो।" तत्‌यार तीहया तेमेत कर्‌या। 21 तीहया आह़फा केदा, "कंय सण्‌का नी हय आपणु आपणा भाय युसुफ ना वारा मे गुनाळ्‌ळा से, काहाके जत्‌यार तीहयो अमारी सी आड़ी आड़ीन रावण्‌या कर्‌यो, ता बी आमु आहयु देखीन, के तीनी जीवाय कीसम वेला मे पड़ली से, तीनी नी ह़मळ्‌या; आहया कारण आमु बी हाव आहयी वेला मे पड़ र्‌या।"

22 रुबेन तीमने केदो, "ह़ु मे तमारी सी नी केदलो हतो के सोरा ना गुनाळ्‌ळा ना बणो? पण तमु नी ह़मळ्‌या। देखो, हाव तीना लोय नो बदलो अमारी सी लेय।"✝ 23 युसुफ अने तीमनी वात-चीत बे भासा ह़मजवा वाळा नी लारे हयती हती; आनी सी तीमने मालम नी हयु के युसुफ तीमनी बोली ह़मजे। 24 तत्‌यार युसुफ तीमनी ह़ाते गेथो छेटो हय्‌न रड़वा बाज ज्‌यो; अळी तीमनी पांह पाछो आवीन वात करीन तीमनी मे सी सीमोन ने टाळ लेदो अने तीमनी अगळ केद कर लेदो।

25 तत्‌यार युसुफ हुकम आप्‌यो, के तीमना ठेला अन सी भर देवो अने एक-एक जणा ना ठेला मे तीमना रुप्‌या बी मेल देवो, अळतेण तीमने वाट्‌ये खावा करीन खाणु बी आपो। अने तीमनी ह़ाते आसमेत कर्‌या। 26 तत्‌यार तीहया आह़फाम नु अन ना ठेला तीमना गदड़ा पोर बांदीन तां सी चाल देदा। 27 धरम साहळा मे जत्‌यार एक जणो आह़फा ना गदड़ा ने चारो घालवा नी लेदे आह़फा नो ठेलो छोड़्‌यो, तत्‌यार तीना रुप्‌या ठेला ना मोडा पोर मेकला देखाव पड़्‌यो। 28 तत्‌यार तीहयो आह़फा भायुम सी केदो, "मारा रुप्‌या ते पाछा आप देदला से, देखो, आहया मारा ठेला मे से," तत्‌यार तीमना जीव मे जीव नी र्‌यो, अने तीहया एक बीजा भणी बीक सी भाळवा बाज ज्‌या, अने केदा, "भगवान अमारी ह़ाते ह़ु करलो से?"

29 तत्‌यार तीहया कनान देस मे आह़फा बाह याकुब नी तां आया, अने आपणी आखी वात आहयी रीते देखाड़ देदा: 30 "जे अदमी तीहया देस नो मालीक से, तीहयो अमारी सी वातड़ो रीन वात कर्‌यो, अने आमने देस ना पतो लगाड़वा वाळा केदो। 31 तत्‌यार आमु तीनी सी केदा, ‘आमु ह़ुदा माणहु से पतो लगाड़वा वाळा नी। 32 आमु बारे भाय एकीत बाह ना सोरा से, एक भाय ते मर ज्‌यो, पण नानलो आहयी टेमे कनान देस मे अमारा बाह ने तां से।’ 33 तत्‌यार तीहयो अदमी, जे मीस्‌र देस नो मालीक से, अमारी सी केदो, ‘आनी सी मालम हय जहे के तमु ह़ुदा मानहु से; तमु आह़फाम मे सी एक ने मारी पांह मेकीन आह़फाम ना घोरवाळाम नी भुक मीटाड़वा नी लेदे कंय ली जावो, 34 अने आह़फाम ना नान्‌ला भाय ने मारी पांह ली आवो। तत्‌यार मने भरहो हय जहे के तमु पतो लगाड़वा वाळा नी हय, ह़ुदला माणहु से। अळतेण मे तमारा भाय ने तमने ह़ोप देही, अने तमु आहया देस मे लेन-देन कर सकहु’।"

35 आहयु कीन तीहया आह़फा-आह़फा ठेला मे सी अन नीकाळवा बाज ज्‌या, तत्‌यार ह़ु देखया, के एक-एक जणा ना रुप्‌या नी ठेली तीहया ठेला मे मेकली से। तत्‌यार रुप्‌या नी ठेली देखीन तीहया अने तीमनो बाह घणा बीह ज्‌या। 36 तत्‌यार तीमनो बाह याकुब तीमने केदो, "मने तमु वण-अवल्‌यात नो कर देदा, देखो, युसुफ बी नी र्‌यो, सीमोन बी नी आयो, अने हाव तमु बीन्‌यामीन ने बी लीजवा हींड र्‌या। आहयी आखी वेला मारी उपर आय पड़ली से।"

37 रुबेन आह़फा ना बाह सी केदो, "कदी मे बीन्‌यामीन ने पाछो नी लावु, ता मारा बेम सोरा ने मार नाखजे; तु हीने मार हात मे ह़ोप दे, मे हीने पाछो तारा हात मे पुगाड़ देही।"

38 याकुब केदो, "मारो सोरो बीन्‌यामीन तारी ह़ाते नी जाय; काहाके हीनो भाय युसुफ ते मर जेलो से, अने हाव तीहयो एखलो री र्‌यो: एतरे जे वाट्‌ये तु जही, तीनी मे कदी तीना पोर कानी वेला आय पड़े, तत्‌यार ते मे तमारी कारण आहया डायावारा नी हालत मे दुख भेळ मरला नी कळी मे रेही।"