1 तत्‌यार युसुफ आह़फा ना बाह ना मोडा पोर पड़ीन रड़्‌यो अने तीना बाह ने गोळो देदा। 2 अने युसुफ तीहया दाक्‌तर्‌या ने, जे तीना चाकर्‌या हता, हुकम आप्‌यो के तीना बाह ना धोड़ पोर गंदायण्‌यु तेल लगाड़े; तत्‌यार दाकतर्‌या याकुब ना धोड़ पोर गंदायण्‌यु तेल लगाड़ देदा। 3 अने तीना चाळीह दाड़ा पुरा हया, काहाके जीना धोड़ पोर गंदायण्‌यु तेल लगाड़े तीमने एतरा दाड़ा पुरात लागे; अने मीस्‌र ना माणहु तीनी जुगु सत्‌तर दाड़ा लग दुखी हयता र्‌या।

4 जत्‌यार तीना दुख ना दाड़ा वीत ज्‌या, तत्‌यार युसुफ फीरोन राजा ना घोराणा ना माणहु सी केवा बाज ज्‌यो, "कदी तमारी दया नी नींगा मारी पोर हय ता मारी आहयी खबर फीरोन राजा ने ह़मळावो, 5 मारो बाह आहयु कीन, ‘देख मे मरवा पोर से, मने आहयी ह़ाम खवाड़्‌या, जे मड़ाट्‌यु में मारी लेदे कनान देस मे खोदाड़लो से तीनी मे तु मने गाड़ देजे। एतरे हाव मने तां जाय्‌न आह़फा बाह ने गाड़वा नु हुकम आप, अळतेण मे पाछो आवती रेही।’"✝

6 तत्‌यार फीरोन राजा केदो, "जाय्‌न आह़फा नी बाह नी खवाड़ली ह़ाम नी अनसारे तीने गाड़ दे।"

7 एतरे युसुफ आह़फा ना बाह ने गाड़वा करीन चाल्‌यो, अने फीरोन ना आखा काम करवा वाळा, तीना घोर ना मुख्‌या, अने मीस्‌र देस ना आखा मुख्‌या तीनी ह़ाते चाल्‌या। 8 अने युसुफ ना घोर ना आखा माणहु, अने तीना भाय, अने तीना बाह ना घोर ना आखा माणहु बी ह़ाते ज्‌या; पण तीहया आह़फा सोरा सोरीम, अने गाडरा अने बोकड़्‌या, अने गाय अने बोळद्‌याम ने गोसेन मे छोड़ ज्‌या। 9 अने तीनी ह़ाते घोड़ागाडी अने घोड़ा पोर बहण्‌या बी ज्‌या, आहयी रीते टोळो ढेरेत मोटो हय ज्‌यो।

10 जत्‌यार तीहया यरदन नंदी नी धेड़े आताद नाम ना जागा ना खळान्‌तां पुग्‌या, तत्‌यार तां तीहया घणात रड़ीन दुखी हया, अने युसुफ आह़फा ना बाह जुगु ह़ात दाड़ा लग दुखी र्‌यो। 11 हाव तीहया ह़ेर मे रेवा वाळा कनानी माणहु आताद ना खळा मे माणहुम ने दुखी हयत्‌ला देख्‌यो तत्‌यार केदो, "आहयो ते मीस्‌र मे रेवा वाळाम नो भारी दुख से।" आहया कारण तीहया जागा नु नाम आबेल मीस्‌रेम* पड़्‌यु अने तीहयु यरदन नंदी नी ह़ेली पार से।

12 जीसम याकुब तीमने हुकम आपलो हतो, तेमेत तीना सोरा कर्‌या। 13 तीमना सोरा तीना धोड़ ने कनान देस मे लाया अने तीने मम्‌रे नी उगवणी भणी मकपेला नी जागा मे से तीहया दोर मे गाड़्‌या जीने आह़फा नु मड़ाट्‌यु बणाव्‌वा करीन अब्‌राहम हीत्‌ती जातीन एप्‌रोन सी जागा भेळ वेचाती लेदो हतो।✝ 14 युसुफ आह़फा बाह ने गाड़वा नी बाद आह़फा भायुम अने तीहया आखाम नी ह़ाते जे मीस्‌र देस गेथा तीना बाह ने गाड़वा आवला हता तीमनी ह़ाते पाछो आवती र्‌यो।

15 जत्‌यार युसुफ ना भाय देख्‌या के अमारो बाह मर जेलो से, तत्‌यार केवा बाज ज्‌या, "मालम पड़े युसुफ हाव अमारी सी वेर करे, अने जेतरी बुराय आमु हीनी सी करला हता, तीहयी आखी बुराय नो बदलो लेहे।" 16 एतरे तीहया युसुफ ने तां आहयु केवाड़ मोकल्‌या, "तारो बाह मरवा सी पेले आमने आहयो हुकम आपलो हतो 17 तमु युसुफ सी केजो के तीहयो दया करीन आह़फा भायुम ना गुना अने पाप माफ करे; काहाके आमु तारी सी बुराय करला हता, पण हाव आह़फा बाह ना भगवान ना पावर्‌याम ना गुना माफ कर।" तीमनी आहयी वात ह़मळीन युसुफ रड़ पड़्‌यो।

18 अने तीना भाय बी जाय्‌न तीनी अगळ पड़ीन केदा, "देख, आमु तारा पावर्‌या से।"

19 युसुफ तीमने केदो, "ना बीहो, ह़ु मे भगवान ना जागा पोर से? 20 तमु मारी लेदे बुराय नो वीच्‌यार करला हता; पण भगवान तीहयी वात नी लेदे भलाय नो वीच्‌यार करलो से, के तीना माणहु जीवत्‌ला बचे, जीसम के तीहया आज बी जीवत्‌ला से। 21 एतरे हाव ना बीहो: मे तमारो अने तमारी सोरा सोरी नो पाळण-पोसण करतो रेही।" आहयी रीते तीहयो तीमने ह़मजाड़ीन सांती आप्‌यो।

22 युसुफ आह़फाम ना बाह ना घोरवाळा नी भेळ मीस्‌र देस मे र्‌यो, अने युसुफ एक ह़ोव दह वरहु जीवत्‌लो र्‌यो। 23 अने युसुफ एप्‌रेम ना सोरा ना सोरा ने बी देख्‌यो अने मनस्‌से ना सोरा ना सोरा ने, जे माकीर ना सोरा हता, तीहया पयदा हया अने युसुफ तीमने खोळा मे लेदो। 24 युसुफ आह़फा भायुम ने केदो, "मे ते मरवा पोर से; पण भगवान तमारी खबर लेहे, अने तमने आहया देस सी नीकाळीन तीहया देस मे ली जहे, जीनी ह़ाम तीहयो अब्‌राहम, ईसाक, अने याकुब नी ह़ाते खादलो हतो।" 25 अळतेण युसुफ ईस्‌रायली माणहुम सी आहयु केदो के भगवान पक्‌को तमारी खबर लेहे, "तीमने आहया वारा मे ह़ाम खवाड़्‌यो के आमु तारा हाटका ने आञे गेथा ह़ेला देस मे ली जाय।"✝ 26 आहयी रीते युसुफ एक ह़ोव दह साल नो हय्‌न मर ज्‌यो: अने तीना धोड़ पोर गंदायण्‌यु तेल लगाड़्‌या, अने तीहया धोड़ ने मीस्‌र मे एक धोड़ नी पेटी मे मेक देदा।