1 जत्‌यार अब्‌राम नीन्‌यान्‌नु साल नो हय ज्‌यो, तत्‌यार यहोवा तीने दरसन आपीन केदो, "मे आखा गेथो जोर-भर्‌यो भगवान से; मारी हजुरी मे चाल अने पक्‌को हयतो जा। 2 मे तारी ह़ाते वायदो करही, अने तारी अवल्‌यात ने ढेरेत वदाड़ही।" 3 तत्‌यार अब्‌राम मोडा ना भरहे पड़्‌यो अने भगवान तीनी सी आहयी वात करतो ज्‌यो, 4 "देख, मारो वायदो तारी ह़ाते बांदलो रेहे, एतरे तु राज्‌य ना टोळा नो मुख्‌यो बाह हय जही। 5 एतरे हाव सी तारु नाम अब्‌राम नी रेय पण तारु नाम अब्‌राहम रेहे, काहाके मे तने राज्‌य ना टोळा नो मुख्‌यो बाह बणाय देदलो से।✝ 6 मे तने ढेरेत फोळ वाळो करही, अने तने राज्‌य-राज्‌य नो मुख्‌यो बणाय देही, अळी तारी अवल्‌यात मे राजा पयदा हयहे।

7 "अने मे तारी ह़ाते, अने तारीन अळतेण पीड़ी-पीड़ी तक तारी अवल्‌यात नी ह़ाते बी आहया मरजी सी के हमेसा-हमेसा नी वायदो बांदु, के तारी अने तारीन अळतेण तारी अवल्‌यात नो बी भगवान रेही।✝ 8 अने मे तने, अने तारीन अळतेण तारी अवल्‌यात ने बी, आहयु आखु कनान देस, जीनी मे तु अंजाणलो हय्‌न रेय, आहयी रीती सी आपही के तीहयी हमेसा-हमेसा तीमनी आह़फी जागा रेहे, अने मे तीमनो भगवान रेही।" ✝

9 अळतेण भगवान अब्‌राहम ने केदो, "तु बी मारी ह़ाते करला वायदा ने पाळजे; तु अने तारीन अळतेण तारी अवल्‌यात बी आपणी-आपणी पीड़ी मे तीने पाळ्‌या करे। 10 मारी ह़ाते करलो वायदो, जीने पाळवा तने अने तारीन अळतेण तारी अवल्‌यात ने पड़हे, तीहयो आहयो से: तमारी मे सी एक-एक अदमी नु खतनु हये।✝ 11 तमु आपणी-आपणी फतरी नु खतनु कर लेजो: जे वायदो मारी अने तमारी वचमे से, तीनी आहयी सेलाणी हयहे। 12 पीड़ी-पीड़ी मे तारी अवल्‌यात ना एतरात माणहु नी पण तारा घोर मे पयदा हयलो हय, नीता परदेसी ने रुप्‌या आपीन वेचातु लेदला, एसवा आखा माणहु बी जत्‌यार आंठ दाहड़ा ना हय जाय, तत्‌यार तीमनु बी खतनु करे। 13 जे तारा घोर मे पयदा हये, नीता तारा रुप्‌या वेर वेचातु लेदलु हय, तीमनु खतनु हयवात जोवे; आहयी रीते मारो वायदो जीनी सेलाणी तारा डील मे हयहे तीहयी हमेसा-हमेसा रेहे। 14 जे अदमी वण-खतना नो रेय, मतलब जीनी फतरी नु खतनु नी हये, तीहयो माणेह आपणा माणहु मे गेथो खत्‌तम करे, काहाके तीहयो मारी ह़ाते करला वायदा ने पुरो नी कर्‌यो।"

15 अळी भगवान अब्‌राहम सी केदो, "तारी जे लाडी सारे से, तीने तु हाव सारे नी केजे, तीनु नाम सारा* रेहे। 16 मे तीने संयबरकत आपही, अने तने तीनी लारे एक सोरो आपही; अने मे तीने एसवी संयबरकत आपही, के तीहयी जाती-जाती नी डाहली आय्‌ह बण जहे; अन तीनी अवल्‌यात मे राज्‌य-राज्‌य ना राजा पयदा हयहे।"

17 तत्‌यार अब्‌राहम मोडा ना भरहे पड़्‌यो अने हाह्‌यो, अने मन-मन मे केवा बाज ज्‌यो, "ह़ु ह़ोव साल ना अदमी ने बी सोरा हयहे अने ह़ु सारा जे नब्‌बे साल नी से सोरो पयदा करहे?" 18 अने अब्‌राहम भगवान सी केदो, "ईस्‌माएल तारी नींगा बणीन रेय! आहयुत ढेरेत से।"

19 तत्‌यार भगवान केदो, ह़ाचलीन तारी लाडी सारा नो तारी लारे एक सोरो पयदा हयहे; अने तु तीनु नाम ईसाक* राखजे; अने मे तीनी ह़ाते आसवो वायदो करही जे तीनीन अळतेण तीनी अवल्‌यात नी जुगु हमेसा-हमेसा ना वायदा हयहे। 20 ईस्‌माएल ना बारा मे बी मे तारी ह़मळो से; मे तीने बी संयबरकत आपही, अने तीने फोळ वाळो करही अने ढेरेत वदाड़ही। तीनी सी बारे मुख्‌या पयदा हयहे, अने में तीने एक मोट्‌लु राज्‌य बणावही। 21 पण मे मारो वायदो ईसाक नीत ह़ाते करही जे सारा नी लारे अगला साल नी आहयी टाकली टेम मे पयदा हयहे। 22 तत्‌यार भगवान अब्‌राहम सी वात करवा बंद कर्‌यो अने तीनीन तांह गेथो उपर जत र्‌यो।

23 तत्‌यार अब्‌राहम आह़फा सोरा ईस्‌माएल ने बोलायो अने, तीना घोर मे जेतरा पयदा हयला हता, अने जेतरा तीना रुप्‌या सी वेचाता लेदला हता, मतलब तीना घोर मे जेतरा अदमी हता, तीहया आखाम नी बोलावीन तीहया दाहड़े भगवान ना बोल ना अनसारे तीमनी फतरी नु खतनु कर्‌यो। 24 जत्‌यार अब्‌राहम नी फतरी नु खतनु हयु ता तीहयो नीन्‌यान्‌नु साल नो हतो। 25 अने जत्‌यार तीना सोरा ईस्‌माएल नी फतरी नु खतनु हयु ता तीहयो तेरे साल नो हतो। 26 अब्‌राहम अने तीना सोरा ईस्‌माएल बेम नु खतनु एकीत दाड़े हयु। 27 अने तीना घोर मे जेतरा अदमी हता जे घोर मे पयदा हया, बाखीन जे परदेसी ना हात सी पय्‌हा वेर वेचाता लेदला हता, आखाम नु खतनु तीमनी ह़ाते हयु।