1 अळतेण भगवान नुह ने अने तीना सोरा ने बरकत आप्‌यो अने तीमने केदो, "फुलो-फालो अने वदो अने धरती मे भराय जावो।✝ 2 तमारी बीक अने सक्‌ती धरती ना आखा जानवरु, अने ह़रग ना आखा चड़ा, अने धरती पोर ना आखा पेट ना भरहे चालवा वाळा जीव, अने दर्‌या ना आखा माछला पोर बणीन रेहे तीहया आखा तारा हक मे कर देम। 3 आखा चालवा वाळा जीव तमारु खाणु हयहे; जीसम तमने लील्‌ला-लील्‌ला नाना झाड़ आपला हता, तेमेत तमुने आखु कंय आपु। 4 पण मांह ने जीव भेळ मतलब लोय भेळ नी खाजो।✝ 5 अने पक्‌को मे तमारा लोय नो मतलब जीव नो बदलो लेही: आखा जानवरु, अने माणहु, बेम सी मे लेही; माणेह ना जीव नो बदलो मे एक-एक माणहु सी लेही। 6 जे कोय माणेह नु लोय वयाड़हे तीनु लोय माणेह सी वयाड़हे काहाके भगवान माणेह ने आह़फा सीका नी लारे बणावलो से।✝

7 "अने तमु ते फुलो-फालो अने वदो अने धरती पोर ढेरेत सोरा पयदा करीन तीनी मे भराय जावो।"✝

8 अळी भगवान नुह अने तीना सोरा ने केदो, 9 "ह़मळो, मे तमारी ह़ाते अने तमारी अळतेण जे तमारी अवल्‌यात हयहे, तीमनी ह़ाते बी वायदो करु। 10 अने आखा जीवत्‌ला जानवरु ह़ाते बी जे तमारी ह़ाते से, ह़ु चड़ा ह़ु पाळला जानवरु, ह़ु धरती ना आखा जंगली जानवरु, धरती ना जेतरा जीव-जन्‌तु मोट्‌लु ढुन्‌ड्यु मे गेथा नीकळला से। 11 अने मे तमारी ह़ाते मारो आहयो वायदो करु के आखा जानवरु अळी मुसळ-धार्‌या पाणी सी खत्‌तम नी हये अने धरती ने खत्‌तम करवा करीन अळी मुसळ-धार्‌यो पाणी नी हये।" 12 अळी भगवान केदो, "जे वायदो मे तमारी ह़ाते, अने जेतरा जीवत्‌ला जानवरु तमारी ह़ाते से तीहया आखाम नी ह़ाते बी हमेसा-हमेसा नी पीड़ी जुगु करु, तीनी आहयी सेलाणी से: 13 के मे वादळा मे मारो बाम मेकलो से, तीहयो मारी अने धरती ना वचमे वायदा नी सेलाणी हयहे। 14 अने जत्‌यार मे धरती पोर वादळु फेलावु तत्‌यार वादळा मे बाम देखाव पड़हे। 15 तत्‌यार मारो जे वायदो तमारी अने आखा जीवत्‌ला डीलवाळा जानवरु नी ह़ाते करलो से; तीने मे फोम करही, तत्‌यार एवु मुसळ-धार्‌यो पाणी अळी नी हये जीनी सी आखा जानवरु खत्‌तम हये। 16 वादळा मे जे बाम हयहे मे तीने देखीन आहयु हमेसा नो वायदो फोम करही, जे भगवान अने धरती पोर ना आखा जीवत्‌ला डीलवाळा जानवरु ना वचे करलो से।" 17 अळी भगवान नुह ने केदो, "जे वायदा मे धरती पोर ना आखा जानवरु नी ह़ाते करलु से, तीनी सेलाणी आहयीत से।"

18 नुह ना जे सोरा मोट्‌लु ढुन्‌ड्यु मे गेथा नीकळ्‌या, तीहया सेम, हाम अने येपेत हता; अने हाम कनान नो बाह बण्‌यो। 19 नुह ना तीन सोरा आहयात से अने ईमनी अवल्‌यात आखी धरती पोर फेल जी।

20 नुह जे कीरसाण हतो अंगुर नी वाड़ी लगाड़वा वाळो पेल्‌लो माणेह हतो। 21 अने तीहयो अंगुर नो रोह पीन छाक ज्‌यो; अने आह़फा तम्‌बु मे मोय नांगरलो हय ज्‌यो। 22 तत्‌यार कनान नो बाह हाम, आह़फा बाह ने नांगरलो देख्‌यो, अने बारो आवीन आह़फा ना बेम भाय ने की देदो।✝ 23 तत्‌यार सेम अने येपेत बेम लुगड़ु लीन आह़फा ना खबा पोर मेक्‌यो अने पाछो फीरीन अने उल्‌टो चालीन आह़फा ना बाह ना नांगरला डील ने ढाक देदो अने तीहया आह़फा नु मोडु पाछु करला हता करीन तीहया आह़फा बाह ने नांगरलो नी देख्‌या। 24 जत्‌यार नुह नो नस्‌यो उतरी ज्‌यो, तत्‌यार तीहयो जान लेदो के तीनो नानलो सोरो तीनी हाते ह़ु कर्‌यो। 25 करीन तीहयो केदो, "कनान सरापीत हये: तीहयो आह़फा ना भाय ना पावर्‌या नो पावर्‌यो हयही।" 26 अळी तीहयो केदो, "सेम नो यहोवा भगवान जुगाळो से, अने कनान सेम नो पावोर हये। 27 भगवान येपेत नी अवल्‌यात ने वदाड़्‌यो; अने तीहयो सेम ना तम्‌बु मे वह्‌या, अने कनान तीनो पावर्‌यो हये।"

28 मुसळ-धार्‌या पाणीन अळतेण नुह तीन ह़ोव पचाह साल जीवत्‌लो र्‌यो। 29 आहयी रीते नुह नी आखी उमर नव ह़ोव पचाह साल नी हयी; अळतेण तीहयो मर ज्‌यो।