1 पर आतमा ला साजरो लक चोयके कव्हसे का अना आवन वालो बेरा मा केतरा लोक भरमावन वारो आतमा गीन अखिन बुरो आतमा की सिक्सा गीन पर मन लगायके बिस्वास लक बहेक जाहे। 2 यो वय झुठो मानूस गीन को कपट को कारन होहे जेनको अक्कल मानो गरम हुयो सरिया लक आकयो गयोसे। 3 जोन बिहा करन लक रोखेत अना जेवन की कोनी चीज गीन लक परे रहवन को हुकूम देहेत जीनला परमेस्वर ना यो काजी बनाइसेत का बिस्वासी खराई ला ओरखन वालो उनला धन्यवाद को संग खाय। 4 काहेकी परमेस्वर लक बनयो सब चीज साजरी से अना कोनी चीज ला नही पायो जाहे। 5 काहेकि परमेस्वर को बचन अना पिराथना लक पवीतर भय जासे।

6 अदि तु भाऊ गीन ला एनो गोस्टीहुन की सुधि देतो रहेत ता मसीह यीसु को साजरो दास ठहराहे अना बिस्वास अना वोना साजरी सिक्सा की गोस्टी लक जोन तु मानतो आइसेस तोरो पालन होवतो रहेत। 7 पर बुरी आतमा अना डोकरागिन की कथा-कहानी गीन लक अगल रहवो अना भक्ती बलिदान करो। 8 काहेकी तन को योगा लक कम फायदा होवासे पर भगती सबच गोस्टी गीन को लाई फायदा देनवालो से काहेकी एना बेरा का अना आवन वालो जीवन की परन एकोच लाईसे। 9 या सिक्सा सच्ची अना हर पिरकार लक बिस्वास करन जोगसे। 10 काहेकि हमी महेनत अना जतन एकोच लाई करासेजन का हमारो आस वोना जित्तो परमेस्वर पर से जोन सबच मानूस गीन को अना खुद अपनाके बिस्वासी गीन को सुटकारा करासे।

11 एना सिक्सा को हुकूम देव अना सिकावता रहवो। 12 कोनी तोरी जवानी ला हलको नही समझ पाहे पर बचन अना चाल-चलन अना पिरेम अखिन बिस्वास अना पवितर पन मा बिस्वासी गीन को लाई नमूना बन जाव। 13 जबा तकन मी नही आहू तब तकन बाचनो अना सिक्सा देवनो अना सिकावन मा उन्नती करो। 14 वोनो बरदान को लाय जोन तोरो मा से अना भविस्यवक्ता गीनको कन लक सयानो गीन को हात रखत बेरा तोला मिलयो होतो, लापरवाही नोको कर। 15 एना गोस्टी गीन सोचत रहवो अना इनको मा अपरो धयान लगायके रहवो त तोरी मान बढाई सबच पर परगट होहे। 16 अपरी अना अपरो सिक्सा की देख-रेख एना गोस्टी गीन पर अटल रहेत काहेकि अदि असो करतो रव्हबीन त तु अपरो अना अपरो आयकान वालो गीन को सुटकारा को कारन बनजोस।