1 अदी तुमी लोकगीन मोरी जरासी कम अक्ल* ला सह लेतो त का साजरो भय जातो हव मोरी सह भी लेवने। 2 काहेकी मी तुमरो बिसय मा परमेस्वर की खूब धुन मा लगयो रव्हा सेऊ एकोलाय का मीना एकच मानूस लक तुमरी पक्की करी सेउ, का तुमीला पवीतर कुवारी को जसो मसीह ला सोप देहू। 3 पर मी डरावा सेव का जसो सरप* न अपरी चलाकी लक हव्वा* ला बहकायो वसोच तुमरो आतमा वोना सीधो अना पवीतर लक जोन मसीह को संग रव्हनो चाव्हसे कदी खराब नोको कर दे। 4 अदी कोनी तुमरो जवर आयके कोनी दुसरो यीसु को परचार करयेत जेनको परचार हमी ना नही करयो कोनी अखीन आतमा तुमला मिलहेत जोन पहेल नही मिलयो होत्यो अना कोनी साजरो बारता आयकावत जेनको लक तुमी न पहेल नही मानयो होत्यो त तुमी वोला सह लेवासो।

5 मी त समजाय सेऊ का मी कोनी गोस्टी मा मोठो पेरीत गीन* लक कम नही सेव। 6 अदी मी बोलनो मा अनाड़ी सेव, तबच अक्ल मा नही, हमी न एको हर एक गोस्टी मा सबच पिरकार लक तुमरो लाई परगट करीसेजन। 7 का एको मा न कोनी पाप करी सेजन का मीना तुमला परमेस्वर की साजरो बारता फुकट आयकावइस अना अपरो आप खाल्या करीस का तुमी वोरता होय जाव? 8 मीना दुसरी कलीसिया गीन ला लूटयो अना मीना उनको लक मजदुरी लियो ताकी तुमरी सेवा करू। 9 अना जबा मी तुमरो संग होतो अना मोला कमी भई त मीना कोनी पर बोझ नही डाकयो काहेकी भाऊ गीन न मकीदुनिया लक आयके मोरी कमी ला पूरो करियो अना मीना हर गोस्टी मा अपरो आप ला तुमरो पर बोझ बनन लक रोखीस अना 10 अदी मसीह को खराई मोरो मा सेत, तो अखया छेतर मा कोनी मोला यो गरब करन लाय नही रोखेत। 11 कायको लाय? काय, एकोलाय का तुमरो लक मी पिरेम नही राखसू? परमेस्वर जानासेत का मी पिरेम राखासू।

12 पर जोन मी करासू वोच करत रव्हिन, का जोन लोकगीन डाव ढूढसेत, उनला डाव नोको मिल्हेत जोन लक, जोन गोस्टी मा वय गरब करासेत, वोमा वय आमरो बरोबर ठहरेत। 13 कायका असो लोक झूठो पेरीत अखीन छल बल करनवारा अना मसीह को पेरीत को रूप धरनवारा सेत 14 यो काही अचंभा को गोस्टी नाहती, काहेका सैतान भी खुदच जग मंग तो सरगदूत को रूप धरसेत। 15 एकोलाय अदी वोको सेवा करनवारा, धरम को दास जसो रूप धरेति तो कोनतो मोठी गोस्टी सेत। पर उनको आखीर उनको काम को अनुसार होयेती।

16 मी अखीन सांगसू कोनी मोला एड़ा नोको समझे नही तो एड़ा च समझ के मोरो सह लेव जेनको लक मी गरब कर सुक। 17 असो भरोसा लक मी बेधड़ाक गरब करके ना जो काही कव्हसू, उ पिरभू को हुकूम को अनुसार नही, पर मान लेव मोरो अठ्ठियापन लक मी कव्हसू 18 तर गजब मानूस गीन देह को अनुसार गरब करासेत तो मी भी करासू। 19 तुमी भी अक्कलवर सेव, पर खुस होयके अठ्ठियागीन को सहसेव। 20 काहेका जबा कोनी तुमला गुलामी करावा सेत, खाय जावासेत, आपरो जालमा फसा लेवासेत। अना आपरो आप ला मोठयो साबीत करासेत, या तुमरो तोन्ड मा झापड़ मारासेत, अना तुमी सहन कर लेवासो, 21 मानलेव आमी कमजोर सेजन एकोलाय आमी तुमरो बेइज्जति करासेजन,

पर मी कम अक्ल वारा मोठो हिम्मत करके साँगा सेऊ 22 का वोच इबरानी सेत, मी भी सेव? का वोच इसरायली सेत, मी भी सेव? का वोच अबराहम को खानदान को सेत मी भी सेव? 23 का वोच मसीह को दास सेत? मी बैताड को जसो कव्हसू मी उनलक मोठयो सेव। जादा मेहनत करनो मा, बार-बार जेल जानो मा, कोडा लक मार खानो मा, बार-बार मरते-मरते बचनो मा, 24 पाँच बेरा मीना यहूदिगीन को हात लक एक उनचाडिस कोड़ा मार खायो। 25 तिन बार मीना बेत लक मार खायो, एक बार मोला गोटा लक मार पडयो, तीन बार जोन जहाज मा बस्यो होतो वोच टूट गयो। एक रात दिवस मी ना सगर मा काटयो। 26 बार-बार यातरा मा नदी को जोखिम मा डाकुगीन को जोखिम मा, आपरो जातवाहि को जोखिम मा, परजात को जोखिम मा, नगर को जोखिम मा, जंगल को जोखिम मा, सागर को जोखिम मा, झूठ बोलन वारा भाऊगिन को जोखिम मा रव्हो। 27 मेहनत अखीन दूख मा, बार-बार जगनो मा, भूखओ अना तहान रव्हनो मा, बार-बार उपासी रव्हन मा, थंड मा, उघाडो रव्हनोमा, 28 अना लगत गोस्टी जोनला मी सागंनो नही चाव्हसू, सब कलीसिया हुन को फिकर, मोला राती-दिवस सतावा सेत, 29 कोनी को कमजोरी लक मी कमजोर नही होवासू, कोनी को ठोकर खावन लक मोरो जीव नही दुखसेत।

30 अदी गरब करनो जरुरी सेत, तो मी आपरो कमजोरी पर गरब करहीन। 31 पिरभू यीसु को परमेस्वर बाबूजी सदा धन्य सेत। उ जाना सेत का मी खोटो नही सागसू। 32 दमिसक नगर मा अरितास राजा को कन लक जोन राजपाल होत्यो, उ मोला धरान काजी दमिस्क नगर मा पहेरा लगा दियो होतो। 33 अना मी डलिया मा खिड़की लक सहेर को दिवाल मा लक खाल्या उतारो गयो अखीन मी बच गयो।सहेर को बेसकुड़ अखिन परकोट मा धसनो