1 यीसु को दया लक परमेस्वर ना अमीला यो सेवा करन काजी देइसेस, अना एकोलाय आमी बेआस नको होहे सेजन। 2 अमिना सबच लुकयो अना लाज को काम लक बेगरो भईसेजन, आमी कोनी धोका को काम नही करतत, ना आमी परमेस्वर को बचन ला खोटो साबीत करसेजन। अना खराई लक आमी परमेस्वर को डोरा को पुड़ा रव्हसेजन। हरेक को डिमाक लक भलाई करन को कोसीस मा रव्हसेजन 3 आमी जोन साजरा बारता सांगीसेजन, अगर उ परदा* सेत तो सिरप वोना लोकगीन काजी सेत जोन गुम गयो सेत। 4 काहेका अबिस्वासी गीन को डिमाक ला यो दुनिया को दुस्ट देव ना अंधार मा ठेविसेत। उ वोना पर उजाड़ होवन काजी रोकसेत। जो साजरा बारता लक मसीह को बारे मा आवासे, यीसु मसीह जनमन परमेस्वर को रूप जसो सेत। 5 काहेका आमी खुदच को परचार नही करसेजन, पर आमी पिरभू यीसु मसीह ला परमेस्वर को रूप मा परचार करसेजन। अना आपरो बारेमा असो कव्हसेजन का आमी यीसु को कारन तुमारो दास सेजन। 6 परमेस्वर ना कव्हयो "अँधार मा उजाड भई जाहेत" जोन आमरो दिल मा उजाडो करासेत। ताकी अमीला यीसु मसीह को तोंड मा चमकत हुया परमेस्वर को महिमा को गियान भेटेत।

7 पर आमी माती को भान्डो* सेजन। अना आमी मा यो धन यो काजी ठेवो गई सेत का यो ताकत को बड़कपन आमरो कन लक नही पर परमेस्वर को कन लक से असो मालुम भई जाये। 8 आमी कई गन परेसानी मा होत रहया लेकिन नास नही भयो; कभी-कभी संका मा रहया लेकिन निरास नही रहया; 9 कई बैरी सेति लेकिन आमी कबच दोस्त को बगैर नही रहया; अना कई गन बुरो तरह ठोस लगी अखीन नास नही हुया। 10 कई गन जबा आमी आपरो पिरान ला यीसु को मिरतु मा लेय जासेजन, जोको लक आमरो देह मा भी ओको जीवन चोयो जाय सकेह 11 आमरो जिंदगी को मंघा आमी सदा यीसु को लाई मिरतु को खतरा मा सेजन ताकि आमरो जीवन को यो पिरान घातक देह मा ओको जीवन चोयो जाय सकेह। 12 एको मायना* से की मिरतु आमरो मा काम कर रही से लेकिन जीवन तुमरो काम मा से।

13 पवीतर गिरंथ कव्हसे, "मीना गोस्टी कियो, काहेका मोला भरोसा होतो।" को एकच आतमा मा आमी भी बोलासेजन कायसेकि आमी भरोसा करसेजन। 14 आमी जानासेजन का परमेस्वर जेने पिरभु यीसु ला जित्तो करिसेत, वाच आमीला यीसु को हिस्सादार समझके जित्तो करयेत। अना आमीला तुमरो सँगा आपरो हाजरी मा ले जाहे। 15 यो सब तुमरो साठी से; अना जसो की परमेस्वर की किरपा लगत स लोकगीन तकन पहुचसे, वय परमेस्वर की बड़ाई को धनवाद देन को साठी लगत पिराथना ला पेस करहेति।

16 एकोलाय आमी कबच निरास नही हुया, भलो ही आमरो नासवान सरीर धीरे-धीरे नास होवासे, मंग भी आमरो आतमिक देह* दिवस को मंघा नयो रूप कियो जाहे। 17 काहेकि आमरो जरासो देर को दुख आमरो लाई लगतच काम की अना अमर महिमा परगट करत जावसे, 18 काहे की जोन आमी ध्यान लक चोवसेजन ओना पर नही, लेकिन नही चोवन वारा चीज गीन पर आमरो ध्यान लगावा राखासेजन। का चोयो जाय सकसे, केवल एक बेरा को लाई रव्हसे, लेकिन अना चोवो चीज हरामेसा लाई रव्हसे।