1 ऐको मंघा ओना सरगदुत ना मोला जिंदगी को पानी को नदी दीसायो, जोन स्फिटक को जसो निरमल, अना वोमा आरपार दिसत होतो, जोन परमेस्वर अना मेढ़ा को सिघासन लक हिटके, 2 यो नदी नगर को मुख रास्ता लक होतो बोहत होतो। नदी को दुही कना जीवन को झाड़ से। जिनमा बारा परकार को फर पैदा होसेत। यो झाड़ हर मास फर देसेत। यो झाड़ को पान गीन मा देस ला चँगा करन की ताकत से।

3 अता लक वहान सराप नाहती। परमेस्वर अना मेढ़ा को सिघासन ओनो नगर मा सेत। उनको दास उनको भगती करयेत। 4 वय उनको चेहेरा ला दिसेत अना उनको नाव उनको मस्तक पर लिखो होहे। 5 वहान अता लक रात होहेत नही। नाच ता उनला दियो को उजाड़ा को जरुरत होहे अना नाच सूरज को उजाड़ा, काहेका खुदच पिरभु परमेस्वर उनको उजाडो होहे। उ सदा राज करेहेती।

6 तबा सरगदूत ना मोला सांगीस, "उ दास खरो अना भरोसा लायक से। पिरभु ना जो भविस्यवक्ता गीन को आतमा को परमेस्वर से। आपरो सरगदूत ला आपरो भविस्यवक्ता गीनको कठा उ सब दिसावन ला धाड़ीसेस। जोको लवकर पूरो होवनो जरुरी से।"

7 "चोवो, मि लवकर आवनवालो सेव! धन्य सेत उ जो येने किताब को भविस्यवानी को गोस्टी मानासे।"

8 चोवो, मि योहन वाच सेउ। जो ना खुदच यो सब आयकयो, अना चोवीसेऊ। यो सब आयकन अना दिसन पर, मि ओना सरगदूत ला नमस्कार करके ओको पाय मा पड़ गयो, जोना मोला यो सब दिसायो होतो। 9 पर ओना मोरो लक सांगीस, "चौव, असो नोको कर! काहेकि मि तोरो अना तोरो भाऊ भविस्यवक्ता गीन, अना ऐना किताब को गोस्टी ला मानन वालो को संगी दास सेउ। परमेस्वर च ला नमस्कार कर।" 10 मंग ओना मोला कहीस, "ऐना किताब को भविस्यवानी ला सील नोको करस काहेकि बेरा जवर से। 11 जो अन्याव करासे, उ अन्याव ही करत रह; अना जो मलिन से, उ मलिन बनयो रह; अना जो न्यायी से उ न्यायी बनयो रह अना जो पवीतर सेउ पवीतर बनयो रह।"

12 चोव, मि लवकर आवनवारा सेव। अना हरेक काम को जसो बदला देवन को लाई प्रतिफर मोरो जवर से। 13 मि, पहेलो अना आखीर, आदि अना अन्त सेव।

14 धन्य सेत वय, जो आपरो कपरा धोय लेसेत, काहेकि उनला जिंदगी को झाड़ को जवर आवन को हक मिलेह। अना वय बेसकुड़ लक होयके नगर मा धस जाहेत। 15 पर कुतरा अना टोनहा अना छिंडरावारा अना खूनी अना मुरत पुजा करनवारा, अना हरेक झुठो को चहेतो अना बनानवारा बाहेर रह।

16 मोला यीसु ना आपरो सरगदूत ला एकोलाय धाड़ियो। की तुमरो पुढ़ा कलीसिया ला एको बारे मा गवाही देव। उ कव्हसेत मि दाऊद को जड़ अना खानदान अना भोर को चमकत हुयो तारा सेव।

17 आतमा अना नौरी दुही सांग सेत, "आव।"

अना आयकन वालो भी कहे, आव!

"जो तहान से उ आय अना जो कोनी चाहे उ जिंदगी को पानी फुकट मा लेहे।"

18 मि हरेक ला, जो ऐना किताब को भविस्यवानी को गोस्टी आयकसे, गवाही देवसु अदी कोनी मानूस ऐना गोस्टीहुन मा काही बढ़ाय ता परमेस्वर ओना मुसीबत गीन ला, जो ऐना किताब मा लिखी से, ओको पर बढ़ाये।

19 अदी कोनी ऐना भविस्यवानी को किताब को गोस्टी मा लक काही हेड़ डाकेह, ता परमेस्वर ओना जिंदगी को झाड़ अना पवीतर नगर मा लक, जेनको बयान ऐना किताब मा से, ओको पराय हेड़ देहे।

20 जो ऐना गोस्टी को गवाही देवासे उ यो कव्हसे, "हव, मि जल्दीच आवनवालो सेव।" आमेन। हे पिरभु यीसु आव!

21 पिरभु यीसु को दया पवीतर लोकगीन को सँग रव्हे। आमीन।