1 पर हनन्याह नाव को मानूस न अना ओकी बायको सफीरा ना मिलके आपरी जायदाद को एक हिस्सा बेच देइन। 2 अना वोना अपरी बायको ला जानकारी मा ओना एमा लक काही धन बचा लेइयो। अना बाकी धन पेरीत ला को पाय खाल्या राख देइन। 3 ऐको पर पतरस न कहीस, "अरे हनन्याह; सैतान ला तुना आपरो मनमा यो गोस्टी कायलाई डाखन दियो? का तुना पवितर आतमा लक खोटो सांगे, अना बोकी जमीन को रकम लक काही बचाय के राख लियो। 4 जब तक तुना उ जघा ला बिकी नही होतयो का वा तोरी नही होती? पर जब तुना ओला बिक दियो, अना जोन धन मिलयो उ तोरोच होतो, मंग तुना आपरो डिमाक मा खोटो बोलन को कायलाय सोचयो? तुना मानूस लक नही, पर परमेस्वर लक खोटो सागिसेस।" 5 यो गोस्टी आयकत च उ भुईमा पड़ गयो, अना उ मर गयो। वय सबच जोन यो गोस्टी आयकत होतिन, उनमा भेव समा गयो। 6 जुवान गीन न उभो होयके वोला कफन मा लपेट के अना बाहेर ली जायके गाड़ देईन।

7 लगभग तीन घन्टा बाद मा ओको लक अनजान, वोकी बायको भितर आई, वा ऐना घटना को बारे मा काही नही जानत होती।

8 पतरस न वोला सवाल करीस, "का अता मोला सांग, उ जघा वोतरोच मा बिकी सेव?" ता वा जवाब देइस, "हव येतरोच मा से।"

9 ऐको पतरस न वोको लक कहीस, "या काजक गोस्टी से? का तुमी दुई पिरभू को आतमा की परिक्सा लेवन को लाय एक चित भई सेव? अता चोव, जोन लोक गीन तोरो नवरा ला गड़ाय के आयोसेत वय बेसकुड़ मा उभो सेत, अना अबा तोला भी लिजाहेत।" 10 वा वोच बेरा पतरस को पाय खाल्या पड़ गई, अना वोको जान हिट गयो। जवानगीन भितर आयके वोला मरयो हुयो पाईन, अना वोला उचलके, वोको नवरा को बगल मा गड़ाय देईन। 11 ऐको लक सारी कलीसिया मा अना जेतरा लोक गीन न ऐना गोस्टी ला आयकिसेत, वय सबच पर मोठो भेव छाय गयो।

12 पेरीत गीन लक लोकगिन को बीच लगत सा हिदान, दिसात होतिन। अना अचँभा काम करत होतिन। वय सबा बिस्वासी गिन सुलेमान*5:12यहुदि गिनको एक राजा जोनना मंदिर बनवायो होतो। को ओसरी मा जमा होतीन। 13 वोना समहु मा सामिल होवन को हिम्मत कोनी नही करत होतिन मंग लोकगीन उनकी बढाई जरुर करत होतीन। 14 पिरभू मा भरोसा करन वालो मानूस अना बायका लगत-लगत बड़त होतिन। 15 एको असो फर भयो का जोन लोक अपरा बिमारगीन ला आनके खाट अना बिस्तर मा आन-आन के रस्ता-बाट मा सोवान लगीन, जोनलक जबा पतरस उता लक हिटेत त काही भी पिरकार लक वोकी सावली पड़जाय। 16 येरुसलेम नगर को आखापाखा को नगर लक अपरो बीमार गीन ला अना दुस्ट आतमा लक पीड़ित लोकगीन ला आनके उनको जवर राख देइन, अना वय सबच साजरो भय जात होतीन।

17 मंग महायाजक अना उनको संगी मजे वोना नगर को सदुकीगिन को झुंड उनको बिरोध मा उभा भय गईन। वय ईरसा लक भर गईन। 18 एकोलाई उनना पेरीतगीन ला बान्ध के एक जेल मा डाख देइन। 19 पर रात को बेरा मा, पिरभू को एक सरगदूत ना जेल को बेसकुड़ खोल देइस। अना उनला बाहेर हेडके असो कहीस। 20 "जावो, मंदिर मा उभो भई जाव, अना यो नवा जिंदगी को बारेमा सबला सांगो।"

21 जबा उनना असो आयकिन ता सक्कारी वय मंदिर जायके धस के उपदेस देन लगीन। मंग महायाजक यहुदि अगवा अना उनको संगी वहान आइन त उनना वहान पर उनना यहुदी अगवा अना इसरायल को सायना हिन को पुरो सभा ला बुलाइन। अना सिपाई धाड़िन का जेल मा लक पेरीतगीन ला आनो। 22 जबा अधिकारी जेल मा पहुचीन, ता वहान पेरीतगीन ना होतीन। त उनना लवटके खबर सांगिन। 23 अना उनना कहिन, "जबा हमी जेलमा पहुचयो ता अमीना चोवयो का जेलमा कुलुप लगयो होतो, अना बेसकुड़ मा पेहरा देवनवारा उभो होतिन। पर बेसकुड़ खोलन पर मंग हमला भीतर कोनी च नहि भेटयो।" 24 जबा मंदिर को रखवारा गिनको अधिकारी ना अना महायाजकगिन न असी खबर आयकिन ता वय उनको बारेमा सोच मा पड़ गइन "का अबा काजक होहेत।" 25 ऐतरो मा कोनी न आयके उनला खबर देइस "देखो तुमी ना जिन लोकगीन ला जेल मा डाकिसेव वय मंदिर मा उभा होयके लोक गीन ला सिक्सा देय रहीसेत।" ✝5:25 मत्ती 27:25 26 तबा मंदिर को सुरक्सा करनवारा सिपाईगिन को अधिकारी आपरो अधिकारी गिन सग वहान गयो। अना बिना सकती बरते उनला वापस आनीन। काहेकी उनला डर होतो का कही लोकगिन अमीला गोटा नोको मारहेत।

27 उनना पेरीतगीन ला मोठी धरम सभा को पुड़ा उभा कर देइन मंग महायाजक न सवाल पुसिस अना कह्यो, 28 "हमीना एना नाव को सिक्सा देवन लाई तुमला कड़ो हुकूम मना कियो होतो, मंग तुमी यो सिक्सा लक सप्पा येरुसलेम सहेर ला भर देइसेव। अना वोना मानूस की हत्या को दोस आमरो पर लादनो चाव्हासेव।"

29 पतरस अना पेरीतगीन न असो जवाब देइन, "मानूस गीन को बजाय परमेस्वर को गोस्टी ला माननो जरूरी सेत।" 30 "तुमी लोकगीन न यीसु ला कूरूस काड़ी मा खील्ला ठोक के मार डाकिसेव। पर आमरो सायना गीन को परमेस्वर न उनला मरयो मा लक जित्तो करीस। 31 ओला च परमेस्वर ना अगवा अना सुटकारा देवनवालो ठहरायके उजो हात कन राखीसेस, ताकी उ इसरायल गीन ला पाप छिमा अना मन मुरकान को मौका देहे। 32 एना सप्पा गोस्टी को अमी गवाही सेजन, अना वसोच पवीतर आतमा भी जोनला परमेस्वर न आपरो हुकूम मानन वारा लोकगीन ला देइसेस।"

33 जबा सभा को मेम्बरगीन न असो आयकिन, त वय दुफारी को ऊन जसो तमतमा गइन। अना वय प्रेरितगिनला मार डाखन चाव्हत होतीन। 34 पर उन मा लक एक फरिसी जोनको नाव गमलीएल होतो। जोन मोसे को नियम को गुरू होतो, अना सब लोकगिन मा वोको मोठो मान होतो। सभा मा उभो भयो अना यो हुकूम दियो। का पेरीतगीन ला जरासो बेरा को लाई बाहेर हेड़ देव। 35 तबा उ सभा मा कव्हन लगयो। "इसरायली भाऊगिन तुम इन लोकगीन को संगा जोन काही करन चाव्हसेव वोला तुमी सोच समझके करो। 36 का तुमला हेत से? काही बेरा पयले, आपरो आपला एक महान मानूस कव्हन वालो, थेउदास नाव को मानूस तुमरो बीच मा उभो भयो होतो। अना करिब चार संबर लोकगिन वोको मघा भय गई होतीन। पर उ मार डाख्यो गयो, अना वोका मानन वारा सबच लोक इता-उता बगर गईन। अना वोको कोनी मतलब नही हिटयो। 37 मंग जनता को गिनती को बेरा, गलील को रव्हनवारा, एक यहूदा नाव को मानूस उभो भयो। ओना भी काही लोकगिनला आपरो मंघा कर ह लियो होतो। उ भी मारो गयो, अना तीस ओको मघा चलनवारा सबच लोक इता-उता बगर गईन। 38 एको लाई ऐना बेरामा, मी तुम्हिला कव्हसू, ऐना लोकहुन लक बेगरो रव्हो। इनको मामला मा कोनी काम नोको करो, इनला एकलो राख देव अदि इनको पिलान अना काम मानूस को कन लक सेत, त आपरो आप खतम भयी जाहेत। 39 पर अदी यो काम परमेस्वर को कन लक सेत, ता तुमी येला नही रोख सकसो। अना तबा होय सकसे, तुमी आपरो आपला परमेस्वर को बिरोध मा पाहो।" उनना वोको बात मान लेइन। 40 अना उनना पेरीत गिनला बुलाइन, अना उनला कोड़ा मरवाइन, अना हुकूम देइन का यीसु को नाव को चरचा नोको करे, अना उनला सोड़ देइन। 41 वय खुसी होयके मोठी सभा लक चली गईन, काहेका उनना असो मानिन का परमेस्वर ना उनला यीसु को नाव लाई, बेइज्जत होवन को काबील समझयो। 42 मंग वय मंदिर अना घर-घरमा हरेक दिवस सदा ऐना साजरो बारता ला आयकावन लगीन। का यीसु च मसीह से। उपदेस देवनो अना चरचा करनो नही सोड़िन।