Daniel 4

नबूकदनेस्सर को दूसरो सपना

1 नबूकदनेस्सर राजा को कन लक देस–देस अना राज–राज का लोखहुन, अना बेगरो–बेगरो भासा बोलन वालो जितरो सप्पा धरती मा रव्हसेत, वोन सबच ला या खबर "तुम्हरो सजरो होहे!" 2 " मोला यो साजरो लग्यो का सब लक मोठो परमेस्वर ना जोन अचरज को काम अना हीदान चोवायो से उनला मी परगट करू। 3 वोको चोवायो गयो हिदान कितरो ताकतवर से, परमेस्वर हरामेसा को राजा से उ हरामेसा सासन करहेत।

4 मी नबूकदनेस्सर, अपरो महेल मा अराम को संग खुसी लक रव्हत होतो। 5 मी ना असो सपना ला चोयों का जेको कारन मी डर गयो अना हतरन मा पड़यो-पड़यो जोन बिचार मोरो हिरदय मा आयो अना जोन गोस्टी मीना देख्यो वोको कारन मी घबराय गयो। 6 तबा मीना हुकुम दियो का बेबीलोन का सबा सपन को अरथ सागंन वालो गिनला मोरो सामुर आनयो जाय। 7 तबा ज्योतिस बिद्या वालो जन्तर-मन्तर वालो कसदी अना आवन वालो गोस्टि ला सांगन वालो, सगुन बतावन वालो भीतर आयीन अखीन मी ना सपन ला सांगयो पर कोन्हि वोको अरथ नही बता सकयो। 8 आखीर मा दानिय्येल मोरो सामुर आयो, जेको नाव मोरो देवता को नाव को कारन बेलतसस्‍सर रख्यो गयो होतो, अना जेको मा पवितर देव कि आत्मा रहव्त होती; अना मी ना वोला आपरो सपन असो सांगयो, 9 ओय बेलतसस्‍सर, तू ता सबा ज्योतिसि गिन को परधान से, मी जानसेउ का तोरो मा पवितर देव को आत्मा रव्हासे, अना तु ता कोन्हि राज को कारन नहि डर से; एकोलाय जोन सपन ला मीना देख्यो सेऊ वोको अरथ सहित मोला सांग कर समझाव देहे। 10 जबा मी जप मा होतो तबा मी ना धरती को बीच मा एक मोठो झाड़ चोयो, 11 वय झाड़ मोठो होय गयो, अना वोकी ऊचाई सरग तकन पहुँच गयो, अना वय आमरो सप्पा धरती को छोर तकन चोय पड़त होतो। 12 वोका पत्ता खोबसूरत, अना वोमा बेजा फर होतिन, यो तकन का वोमा सबच को लाय जेवन से, वोको खाल्या बर्रा का सबच जनावर ढोर-बासरू ला सावली मिलत होति, अना वोकी डगाल मा बादर कि चिड़ि बसेरा करत होतिन, अना सबच पिरानी वोमा लक जेवन को लाय हिरवो चारा भेटत होतिन।

13 "मी ना हतरन मा सपन आवतो बेरा काजक चोवो, का एक पवितर पहरुआ सरग लक उतर आयो। 14 वोना जोर लक हाकल के कह्यो, ‘झाड़ ला काप डाको, वोकी डागालि ला छाँट देव, वोका पत्ता झड़ा डाको अना फर बगराय डाक्खो; जनावर ढोर-बासरु वोको खाल्या लक हट जाहेत, अना चिड़ि वोकी डगालि पर मा लक उड़ जाहेत।’ 15 तबा वोला ठूँठ को जड़ समेत धरती मा सोड़ो, अना वोला लोहा अना पीतल को संकल लक बाँधके बर्रा को हिवरि गवथ को बीच मा रव्हन देव। बादल की ओस लक ओदो होयेत अना धरती मा कि गवथ खावन लाय उता का जनावर ढोर-बासरु को संग हिस्सा होहेत। 16 सात साल तकन वोको मन मानूस को नही पर जनावर को मन होहेत।" 17 यो चेतयो हुयो अना जगतो हुयो सरगदूत गिनको फयला से ता हरेक जघा सप्पा लोक हुनला पता चलहेत का सबलक वरता को परमेस्वर को जवर मानूस को राज को ताकत से अना वा आपरो मनसा को अनुसार मा कोनिला भी देय सकासेत। यहान तकन कि जोन कोनी खास नहात। 18 नबूकदनेस्सर राजा ना सागयो योच वा सपना सेत जोन मी ना चोयोसेऊ, "अब, बेलतसस्‍सर, मोला सांग एको काजक मतलब से? मोरो कोनी सला देवनवालो नही सांग सकयो। पर तू सांग सका सेत काहेका तोरो मा देवको पवितर आतमा रव्हासे।"

दानियल सपना को बखान करासे

19 तबा दानिय्येल जोनको नाव बेलतसस्‍सर भी होतो घडी भर को लाय घबराय गयो। अना सोच मा पड़ गयो। तबा राजा कव्हन लगयो, "ओ बेलतसस्सर यो सपना अरथ लक तू नोको घबराव"

तबा बेलतसस्सर ना कह्यो, ओ मोरो मालिक यो सपना तोरो बयरी गिनको पर होय अखीन तोरो दुस्मन पर एको फर फलेत ना की तोरो पर। 20 जोन झाड़ ला तूना चोयो से वा मजबूत भयी गयो, अना जोन सरग तकन बड़ गयो होतो अना जोन धरती को छोर तकन चोवासेत, 21 वोका पत्ता खोबसूरत, अना वोमा बेजा फर होतिन। अना जोनमा सबा को लाय जेवन होतो। जोनको सावली खाल्या बर्रा को सप्पा जनावर रव्हत होतीन। अखीन जोनको डगाली मा चिड़ी बसेरा करत होतीन। 22 ओ राजा उ तू च आस, तू महान अखीन ताकतवर भयी गयो, तोरो राज धरती को छोर तक फयल गयो। 23 ओ राजा, तू ना जोन एक पवितर जागन वालो सरग दूत ला सरग लक उतरतो अखीन यो कव्हतो हुयो चोयो का जड़ ला काट के वोला नास करो, तोभी वोको ठूठ को जड़ समेत धरती मा सोड़ो, अना एला लोहा अना पितर को बन्धन मा बाँधके बर्रा को हिवरो गवथ मा रव्हन देव। उ बादल को ओस मा ओदो होहेत। अना वोको बर्रा को जनावर को संग हिस्सा होहेत। जब तकन सात साल ना बीत जाहेत। तबा तकन वोको वसोच दसा रव्हेत। 24 ओ राजा एको अरथ जो परम परधान ना ठान लियो से। का राजा पर घटेत उ यो से। 25 का तू मानूस गिनको बीचमा लक हेड़यो जाहेत। अना बर्रा को जनावर को संग रव्हेत, अना बइल गिनको जसो गवथ चरहेत। अना बादल को ओस लक वोदो होहेत। अना सात साल तकन असो बितेत। जब तकन तू ना जान लेय का मानूस गिनको राजमा परमेस्वर च राज करहेत, अना जोनला चाहेत वोला देदेहेत। 26 वोना झाड़ को ठूठ ला जड़ी समेत सोड़न को हुकुम भयो से एको अरथ यो से का तोरो राज को लाय बनयो रव्हेत, अना तू जान लेय का जगत को पिरभू सरग*4:26 सरग मा सासन करासेत। मा से तबा तू मंग लक राज करनो पाहेत। 27 यो कारन लक ओ राजा मोरो यो सला सुविकार कर, का अदि तू पाप सोड़ के नेकी करन लगहेत, अखीन अधरम सोड़के गरीब पर दया करन लगहेत, तो असो करनो मा तोरो चयन बनयो रव्हेत। 28 यो सबरी नबूकदनेस्सर राजा पर घट गयो। 29 एक साल बितन को बादमा जब उ बेबीलोन को राजभवन को छत मा हिन्डत होतो तबा उ कव्हन लगयो, 30 "का यो मोठो बेबीलोन नहात, जोनला मी च ना आपरो ताकत अना सक्ति लक राजधानी होवन को अधिकारी अखीन अपनो परताप को बड़ाई को लाय बसायो होतो?" 31 यो बचन राजा को तोन्ड लक हिटयो होतो का बादल लक अवाज आयो ओ राजा नबूकदनेस्सर, तोरो बारे मा यो हुकुम हिटयो से, राज तोरो हात लक हिट गयो। 32 अखिन तू मानूस गिनको बीच लक हेड़यो जाहेत। अखीन बर्रा को जनावर को संग रव्हेत अखिन बइल को जसो गवथ चरहेत। अना सात साल तोरो पर बितेत। जब तकन तू ना जान लेव का सब लक वरता परमेस्वर मानूस को राज मा परभूता करहेत, अना जोनला चाहे वोला दे देवासेत। 33 वोच घड़ी यो बचन नबूकदनेस्सर को बारेमा पूरो भयो। उ मानूस गिनमा हिट गयो, अखीन बइल को जसो गवथ चरन लगयो, अखिन वोको तन बादल को ओस मा ओदो होत होतो। इतरो तकन का वोको चुन्दि उकाब पक्सी गिनको पंखा जसो वोको नखून चिड़ी को पन्जा जसो बढ गयो।

नबूकदनेस्सर लक परमेस्वर को स्तुति करासे

34 उन दिवस बितनो पर, मोला नबूकदनेस्सर ना आपरो डोरा सरग को कन उठायो, अना मोरो अक्कल मंग जसो को तसो भयी गयो। तबा मी ना परमेस्वर ला धन्य कह्यो, अखीन जो सदा जिन्दो से, वोको स्तूती अना महीमा यो कव्हके करन लग्यो,

वोको परभूता सदा को रव्हेत,

अना वोको राज पिड़ी लक पिड़ी तकन बनयो रव्हन वालो से।

35 धरती को सप्पा रव्हन वालो वोको पूढा नीच गिनयो जावासेत

अखीन उ सरग को सेना अना धरती को रव्हन वालो को बीच

आपरो च इक्सा को अनुसार काम होवासेत,

अना कोनी वोला रोक के वोको लक नही कव्ह सकासेत तू ना यो काजक करयो से?

36 वोच बेरा, मोरो अक्कल मंग जसो को तसो भयी गयो, अखीन मोरो राज को महीमा को लाय मोरो परताप अखीन मुकुट मोरो पर मंग आ गयो। मोरो मन्तरी अना परधान लोख मोरो लक भेट करन को लाय आवन लगयो। अना मी आपरो राजमा मजबूत भयी गयो। अना मोरो लगत मान सम्मान होवन लगयो। 37 अबा मी नबूकदनेस्सर सरग को राजा ला बड़ाई करासू, अना वोको स्तुति अना महीमा करासू काहेका वोको सप्पा काम सच्चो अना वोको बरताव नियाव को से, अखीन जोन लोख घमन्ड लक चलासेत, वोला उ निचो कर सकासेत।