Daniel 7

दानिय्येल लक आपरो दरसन को बखान

चार जनावर को बारेमा बखान

1 बेबीलोन देस को राजा बेलसस्सर को राज्‍य को बेरा पहलो साल मा दानिय्येल ना रात मा एक सपन अखिन दरसन देख्यो, उ जोन सपन चोवत होतो वोला लिखत अना सार सांगत होतो। 2 दानिय्येल ना कह्यो, "मी ना राति मा सपना चोयो का चारी कन लक वारा सागर मा चल रह्यो होतो। 3 तबा सागर लक चार मोठो-मोठो जनावर हिटयो, यो चार जनावर एक-मेक लक बेगरो होतीन।✝7:3 परकासित वाक्य 13:1; 17:8 4 पहलो जनावर सेर को जसो होतो। पर ओको मा उकाब को जसो पंखा उगया होतिन। जब मी वोला चोव रह्यो होतो तबा वोको पंखा, उखाड़ दियो गयो। वोला धरती मा लक उठायो गयो। अखीन मानूस को जसो दुय पाय मा उभो कर देइन अखीन वोला मानूस को हरदय दियो गयो।"

5 "दूसरो जनावर रीछ जसो होतो। उ एक कन तनके उभो होय गयो। वोको दाँत को बीच मा तीन पसली होतीन।" कोनी ना वोला कहीस "उठ अखीन खोब मांस खाय!"

6 "ओको बाद मी एक अखीन जनावर चोयो जोन चीता को जसो होतो। पर ओको पाठ मा पक्सिगिन जसो चार पंख होतीन। ओको चार डोका होतीन, ओला सासन करन को अधिकार दियो गयो होतो।"✝7:6 परकासित वाक्य 13:2

7 "यको बाद मा मी ना रात को बेरा मा चवथो जनावर ला चोयो उ भयानक अखीन डर लगाउ अखीन लगत मोठो होतो। ओको तोन्ड मा लोहा को मोठो दाँत होतो। उ जोन काही जेवत होतो वोला टुकड़ा-टुकड़ा कर देत होतो। जोन वोको तोन्ड लक बच जात होतो। वोला आपरो पन्जा लक रौंद डाकत होतो। वा पहलो वालो जनावर लक बेगरो च होतो, वोको दहा सींग होतिन। 8 मी ना सींगगिन ला धियान लक चोयो ओ बेरा वोना सींगगिन को बीच लक अखीन एक सींग हिटयो जोनको कारन तीन सींग जड़ लेक उखड़ गइन। यो सींग लहान होतो अखीन एको मा मानूस को डोरा जसो डोरा होतो। एको मा टोंड होतो जोन मोठो डींग हाकत होतो।"

हरामेसा जिन्दो रव्हन वालो को दरसन

9 "मी ना दरसन न मा चोयो का सिंघासन गीन राखयो गयो,

अखीन एक पिराचीन लगत उमर को विराजमान भयो।

ओको कपरा बरफ को जसो पान्डरो होतो।

अखीन डोका को बाल ऊन को जसो निटवल पांढरो होतो।

ओको सिघासन इस्तो को होतो

अखीन सिघासन को पाया स्तो जसो धधकत होतो।✝7:9 परकासित वाक्य 20:4; 20:4

10 ओको पुढा लक इस्तो को धगाड़ी हिटत होती।

ओको पुढो धाग नद्दि लक हिटके बोह रही होती।

हजारो-हजार सेवक ओको सेवा कर रही होतीन,

अखीन लाखो-लाख लोग ओको पुढो

हाथ-जोड़ खड़ा होतीन।

मंग न्यायी बस गयीन।"

अखीन किताबगीन खुलयो होतीन।✝7:10 परकासित वाक्य

11 "जबा वय सींग जोन डींग मारत होतो, तबा ओको आवाज लक मोरो धियान जनावर को कन गयो। मी ना चोयो का उ चवथो जनावर ला मार दियो गयो, ओको तन ला नास कर दियो गयो अखीन वोको लास इस्तो मा पेटान लाय दियो गयो।" 12 बाकी तीन जनावर गिन लेक राज्‍य पाट छीन लियो गयो पर उनको पिरान काही बेरा*7:12 टेम अना बेरा को लाय लक बचयो गयो।

13 मी ने रात को दरसन मा चोयो ,

बादल मा बादर को संग

मनुस को लेकरू जसो कोनी आवत होतो।

ओ पिराचीन युग मनुस को जवर आयो अखीन ओको पुढा हाजिर होय गयो।✝7:13 मत्ती 24:30; 26:64; 1:7

14 तबा पिराचीन युग मनुस ना उ सासन को अधिकार, महिमा अखीन राज मिलायो जेको लक धरती बेगरो-बेगरो राज अना बेगरो-बेगरो कुल बेगरो-बेगरो भासा बोलन वालो लोगो ओको सेवा करेत।

वोको सासन अमरता को सासन से,

जोन कभ्भू आखीर नही होहेत,

वोको राज जूग-जूग को अटल से,

जोनको कभ्भू बिनास नही होहेत।✝7:14 परकासित वाक्य 11:15

सपना को अरथ सांगनो

15 "मी दानिय्येल को मन चिन्‍ता लक भरयो गयो यो चोवयो गयो दरसन को कारन लक मोरो मन बिकल भय गयो।" 16 एकोलाय मी सेवा करन वालो मा लक एक को जवर गयो अखीन वोला इन दरसन को सच्चो अरथ को बारेमा पूसयो तबा वोना मोला इन दरसन को अरथ सांगयो। 17 वोना कह्यो "यो चार मोठो जनावर गीन चार मोठो राजा से, जोन धरती मा उठेत। 18 यो सब लक वरता परमेस्वर को भविस्यवक्ता च ला राज मिलहेत। वय सदा वोना राज मा अधिकार करहेत,जूग-जूग तक।"✝7:18 परकासित वाक्य 22:5

19 "तबा मोरो मनसा भयी का मी चवथी जनावर को बारेमा वोना सच्चो गोस्टी वोको लक पूस, यो जनावर दूसरो तीन जनावर लक बेगरो होतो। यो चोवनो मा बहुत भयानक होतो। यो दाँत लोहो को अखीन नख पीतल को होतीन। उ सब ला खात होतो अखीन टुकड़ा-टुकड़ा कर देत होतो। जो ओको टोंड लक बच जात होतो ओला अपरो पाय लेक रौंद-रौंद कर देत होतो।" 20 मंग वोको डोका को दहा सींग को भेद अना जोन नवतो सींग हीटन लक दहा सीग पड़ गयो, जोन सींग को डोरा अना टोन्ड जोन सेखी बघारत होतो। यो सबरी सीग लक जादा भयानक होतो उ वोको भी भेद जानन को मनसा भयी।

21 "जब मी ना यो सींग ला चोवयो, तबा मोला चोवयो का यो सींग ना परमेस्वर को भविस्यवक्ता लक कज्या करन लगयो, अखीन वोना बेरा तकन परबल नही भयो।✝7:21 परकासित वाक्य 13:7 22 तबा हरामेसा लक जिन्दो पिराचीन आयो, तब वो एक जोन हरामेसा को परचीन आयो अना परम परधान परमेस्वर को पक्स मा न्‍याय कियो। वा ठयरायो गयो बेरा आयो, अखीन परमेस्वर को लो ख राज ला राज अधिकार भेटे।"✝7:22 परकासित वाक्य 20:4

23 पुसनो मा वोना मानूस ना मोरो लक असो सागयो,

"चवथो जनावर को अरथ चवथो राज से जोन धरती मा उठेत, वा दूसरो राज लक बेगरो होहेत।

वा पूरो धरती ला नास करहेत।

वा वोला आपरो पंजा लक खुन्देत,

वा वोको तुकड़ा-तुकड़ा करेत।"

24 "वोना सासन मा दहा सासक उठेत अना उनको बाद एक दुसरो राज परगट होहेत वो सबरी लक बेगरो होहेत जो न तीनो ला पाड़ देहेत।

25 यो राजा सब को वरता परमेस्वर को निन्‍दा करहेत, अखीन ओको परमेस्वर को लोख गिनला पीस डाकेत।

अखीन वा उनको नेम अना तिहार, को बेरा ला

ला बदलन को कोसीस करेत,

सब लक वरता परमेस्वर को लोख साढ़े तीन साल लक एको हात मा सौंप दियो जाहेत।"✝7:25 परकासित वाक्य 12:14

26 तबा वोको फयसला सब लक वरता को परमेस्वर को दरबार मा होहेत

अखीन वोना राजा को हात लक

ओको राज-पाट हिसक लियो जाहेत।

ओको सासन पूरो नास होय जाहे,

ओको पूरो आखरी होय जाहेत।

27 राज अखीन अधिकार,

सप्पा बादल खालीया

"धरती को सब राज, को महानता,

सब लक वरता परमेस्वर को भविस्यवक्ता गीनको दल ला दियो जाहे।

ओको राज्‍य हरामेसा को राज्‍य होंहे,

धरती को सब सासक उनको सेवा करेत,

वोय उनको हुकुम को पालन करेत।"

28 "दरसन को सच्चो अरथ को चरचा इता पूरो होय जाहे। पर जहान तकन मी दानिय्येल मोरो बारेमा से। मोरो बिचार ना मोला दुखी कर देइस। मी घबरा गयो। पर मी यो गोस्टि कोनि ला नहीं सांगयो अपरो हिरदय मा राखयो।"