1 एकोलाय मि जोन पिरभु को होवन को काजी बन्दी बनो हुयो सेव, तुमी लक बिनती करुसेउ का तुमला आपरो जिंदगी वसोच जीवनो चाहिसे जसो का संतहुन को से। 2 हमेसा दीन रूप अना कोमलता रूप अना धीरज को सँगा बरताव करने। एक दुजो को माया लक सव्हतो रव्हने। 3 उ सांती, जोन तुमला आपसी मा बांधी राखासे, ओकोलक पैदा आतमा को एकता ला बनाय राखन को लाई हर पिरकार को कोसिस करत रव्हो। 4 एकच बदन अना एकच आतमा से: असोच तुमला भी जबा हाकलया गयत ता एकच आसा मा भागीदार होवन को लाई हाकलयो गयो। 5 एकच पिरभु एकच, भरोसा एकच बपतिस्मा 6 परमेस्वर एकच से अना उ सबको बाबूजी से। ओच सबको मालिक से हर कोनी को लक उ कामकरन वालो से, अना हर कोनी मावाच समायो हुयो से।

7 पर आमी मा लक हर मानूस ला मसीह को दया लक एक खास दान मिलीसेस। 8 एकोसाठी गिंरथ कव्हसे,

"उ वरता पर चघयो,

अना बन्धुवाई ला बाँध ले गइसेस।

अना मानूसगिन ला दान देईसेस।"

9 अबा चोवो, जबा उ कव्हसे, उ उचो पर चघयो काजक मतलब से? केवल योच की उ धरती को खाल्या जघा मा उतरीसेस। 10 अना उ जो उतरी से यो वाच से जोन सबच बादल गीन लक भी वरता चघ गयो की सबच काही पूरो कर देहे। 11 ओना काही ला पेरीत, काही ला भविस्यवक्ता* काही ला साजरो बारता को सांगन वालो अना काही ला परमेस्वर को मानूस को रक्सा करनवालो पासवान* अना काही ला गुरुजी* ठहराय देईसेस। 12 मसीह ना उनला यो दियो दान संत मानूस की सेवा को काम को लाई तैयार करन ला देइस ताकि हमी जोन मसीह को तन सेजन, आतमा मा अखिन पिक्को होवबिन। 13 जबा तकन की आमी सबच भरोसा मा अना परमेस्वर को लेकरा को गियान मा एक नही होय जावबिन। अना पक्को मानूस ना बन जावबिन, अना मसीह को पूरो डीलडोल तकन न बढ़ जावबिन। 14 एकोलाई हमी असो लेकराच न बनबिन जो हर कोनी असी नयी सिक्सा को हवा लक उछल जावबिन, जो आमरो रस्ता मा बव्हसे, लोकगीन को छल परन बेवहार लक, असी कपटता लक, जो ठगावन लक भरी योजना ला पेरीत करासे, इता-उता भटकाय दियो जावसे। 15 पर हमी माया को संग सत्य कव्हत हुयो हरेक पिरकार लक मसीह को जसो बनन काजी तरक्की करत जावबिन। मसीह डोस्का से, 16 जोको लक सप्पा बदन, सप्पा जोड़ मा एक सँगा बँधके अना संची होयके, सप्पा बदन को बेस तरीका लक ओमा होवासे, आपरो आप ला बढ़ावसे, अना माया मा तरक्की होवासे।

17 एकोलाय मि यो कव्हसू अना पिरभु मा चिताव सेव की जसो खोटो काम करनवालो आपरो मन को बेकार बिचार पर जीवन करत होतीन, तुमी वसो नोको जीवन करने, 18 उनको अक्कल अंधार भय गयी। वय परमेस्वर लक मिलन वारो जिंदगी लक दुहूर होय गयीसेत। काहेकि वय अगियानी अना उनको मन कठोर भय गयी से। 19 वय लाज सरम ला तजके लुचपन मा लगी गयीन अना उनना आपरो आप ला इन्दरी तपस्या मा लगाय देईन। का सबरो परकार को नीच काम, लालची होयके करन लगीसेत।

20 पर मसीह को बारे मा तुमीना जोन जानीसेव, उ ता असो नहाय। 21 मोलाकोनी संका नही से का तुमीना ओको बअरे मआयकिया सेव, अना उ सत्य जोन यीसु मा पायो जावसे, ओको जसो तुमला ओको चेला हुन को रूप मा सिक्सा भी दियो गयीसे। 22 यहान तक तुमरो जुनो जिंदगी को तरीका को सम्बन्ध से तुमला सिक्सा दियो गयो होती का तुमी आपरो जुनो मानुसपन ला उतार फेकने जोन ओको भटकावन वारो मरजी हुन को लाई खराब बनयो हुयोसे। 23 जेकोलक बुध्दि अना आतमा मा तुमला नयो कियो जाय सके। 24 अना नयो मानूस रूप ला डाक लेवने, जोन परमेस्वर को जसो खराई की धरमिपन अना पवितरता मा बनायो गयो से।

25 यो काजी तुमी खोटो कव्हनो तज देने। अना आपरो पड़ोसी लक खरो सांगने, कायसेकि आमी आपस मा एक दुसरो का आँग सेजन। 26 गुस्सा मा आयके पाप नोको करने। दिवस बुढ़न लक पयले अपरो गुस्सा ला साँत कर लेने। 27 सैतान ला आपरो पर मौका नोको देने। 28 जो चोरी करनवालो से मंग चोरी नोको करेत, पर आपरो हात लक मेहनत करेत खुदच आपरो हात लक कोनी काम, जेकोलक जरुरत मा पड़यो हुयो ला देवनको लाई ओको कठा काही होहे। 29 कोनी फालतू गोस्टी तुमरो टोंड लक नही निकलनो पाहिजे, पर केवल असी गोस्टी हिटनो पाहिजे जोन ओना बेरा की जरुरत को जसो तरक्की को साठी साजरो होय, जोको लक की आयकन वालो पर दया होय। 30 परमेस्वर की पवीतर आतमा ला दुखाने नोको, कहेका परमेस्वर को धन को रूप मा जोको लक तुमी पर सूटकारा को दिवस को साठी आतमा को संगा छाप लगय दियो गईसे। 31 सब परकार की कडुवाहट, ताव, गुस्सा, मुसीबत अना निन्दा सब परकार को ईरसा तुमी आपरो भीतर लक हेड़ फेकने। 32 आपसी मा एक दुसरो को दया अना रहमसील बनने, अना परमेस्वर ना मसीह मा जसो तुमरो गलती ला छिमा कियो गईसे। वसोच तुमी भी एक दुसरो की गलती ला छमा करने।