Marcos 14

यीसु को विरोध मा साजिस

1 दुई दिवस को मंघा पास्का अना बलिदान को तिहार होवन वालो होतो। मुखिया याजक अना मोसे को नियम को गुरू यो बात को तक्का मा होतिन की ओला कसो छल लक धरके मार डाकबिन। 2 पर कव्हत होतीन की "तिहार को दिवस मा नही, एकोलाय की कही असो न होय की लोकगीन मा बगावत होय जाय।"

यीसु को बैतनिय्याह गाँव मा आवभगत

3 ✝ 14:3 लूका 7:37-38 यीसु जबा बैतनिय्याह समौन कोढ़ी को घर जेवन करन लाई बसयो होतो, तबा एक बायको सील बँद सीसी मा सुध्द जटामाँसी को बेसकीमती इतर आनी, अना सील तोड़के तेल ला ओको डोस्का मा रिचाय देइस 4 पर कोनी आपरो मन मा गुस्सा होयके कव्हन लगीन, यो इतर ला बेकार काहे कर दियो? 5 काहे की यो इतर ला तीन सौ खुरोको सिक्का मा जोन एक साल की मजदुरी से बिकके कँगालगीन मा बाट दियो जातो, अना वय ओला गुस्सा करके बोलन लगीन।

6 यीसु ना कहीस, "ओला छोड़ देव ओला काहे सतावासो? ओना ता मोरो सँग भलाई करीसेस। 7 कंगाल तुमरो सँग सदा रहेत, अना तुमी जबा चाव्हने तबा उनलक भलाई कर सकासो। पर मि तुमरो सँग सदा नही रहुँ। 8 जोन काही ओना कर सकीस, ओना करीस, ओना मोरो गाड़न को तैय्यारी मा पुढ़ा लक मोरो देह मा तेल रिचाइस। 9 मि तुमी लक खरो सांगासु, की सारो संसार मा जिता- जिता साजरो बारता की जाहे, उता ओको हेतमा यो काम की चरचा भी कियो जाहे।"

यूदस यीसु ला धरान लाई तैय्यार हुयो

10 तबा यूदूस इस्करियोति जो बारा मा लक एक होतो, मुखिया याजक गीनको जवर गयो की यीसु ला उनको हात धराय दे। 11 वय यो आयक के खुस भईन अना ओला रुपये देवन को परन करीन, अना उ मौका तलासन लगयो की ओला कोनी तरीका लक धरवाहु।

चेला गिनको सँग फसह को जेवन

12 पाठी को बलिदान तिहार को पयलो दिवस जोन मा वय फसह को बलिदान करत होतीन, ओको चेला ना ओला पुसिन, "तु किता चाव्हसेस की आमी जायके तोरो लाई फसह को पाठी को बलिदान को तैय्यारी करबीन?"

13 ओना दुई चेला ला यो कहके धाड़िस, "नगर मा जाव अना एक मानूस घघरा मा पानी लेयके जावतो चोयेत ओको मंघा होय जाने।" 14 अना उ जेना घर मा जाहे, ओनो घर को मालिक लक कहने, गुरूजी कव्हसे की "कनघर" जिता मि आपरो चेला गीन को सँग फसह को जेवन जेवहु। उ किता से? 15 उ तुमला एक सजी अना तैय्यार मोठी अटारी मा खोली दिसाएत, उता हमरो लाई तैय्यारी करने।

16 चेला गीन हिटके सहर मा पहुचीन अना जसो उनलक ओना कव्हयो होतो, वसोच पायीन अना फसह को जेवन तैय्यार करीन।

17 जबा झुलाखाली भय गई त उ बारा चेला गीनको सँगा आयो। 18 जबा वय बसके जेवन कर रही होतीन त यीसु ना कहीस, मि तुमिलक खरो कव्हुसू की "तुमी मा लक एक, जो मोरो सँगा जेवन कर रही से, उ मोला धराहे।"

19 चेला गीन उदास भई गईन अना वय एक-एक करके ओला पुसन लगीन, "का उ मि सेव?"

20 यीसु उनलक कहीस, "उ बारा मा लक एक से, जो मोरो संग ठाव मा हात डाकीसेस। 21 काहेका मानूस को टूरा ता जसो वोको बारे मा लिखयो से, की उ मारो जाहेत पर हाय ओना मानूस पर जेनको लक उ बैरी को हात धरायो जाहे। अदी उ मानूस को जनमच नही होतो, ता ओको लाई साजरो होतो।"

पिरभु-भोज

22 जबा वय जेय रही होतीन तो, यीसु ना भाकर लेइस अना परमेस्वर ला धन्य वाद देके ना तोड़िस, अना चेला गीनला देइस अना कहीस, "लेव यो मोरो तन आय।"

23 मंग ओना कटोरा लेके परमेस्वर ला धन्य वाद देइस, अना चेलागीन ला देइस अना उन सब ना ओमा लक पीइन। 24 अना यीसु उनलक कहीस, "यो मोरो खून से, जोन लगतगीन को लाई बहायो गयो से, जोन परमेस्वर की करार से। 25 मि तुमी लक खरो कव्हसू की अंगूर को रस ओनो दिवस तकन मंग कभी न पीहुँ, जबा तकन परमेस्वर को राज मा नयो अंगूर को रस नही पीहुँ।"

26 मंग वय भजन गायके, बाहेर जैतून को पहाड़ पर गईन।

यीसु पतरस को मना करन ला साँगनो

27 तबा यीसु ना उनलक कहीस, "तुमी सब मोला छोड़के पराय जाहो, काहेकि लिखीसे, मि रखवालो ला मारु, अना मेढ़ा तितर-बितर भय जाहेत।" 28 पर मि आपरो जित्तो उठन को मंघा तुमी लक पयले गलील छेतर ला जाहुँ।✝14:28 मत्ती 28:16

29 तर पतरस ना ओला कहीस, "अदी सब सोड़ जाहेत पर मि नही सोड़ू।"

30 यीसु ना पतरस लक कहीस, "मि तुमिलक खरो कव्हसू, की आज येने रात ला कुकड़ा को दुई बार चिल्लावन लक पयले, तु तीन बार मोरो नाव ला मना करजोस।"

31 पर पतरस अखीन जोर देयके कव्हासे, "अदी मोला तोरो सँग मरनो भी पड़ेत, ता भी मि तोला मना नही करुह।"

येने रिति लक सबच चेला ना कहिन।

यीसु की गतसमनी बाग मा पिराथना

32 मंग यीसु अना ओको चेला गतसमनी नाव को एक जघा मा आइन अना ओना आपरो चेला ला कहीस, "यहान बसा रव्हो, जबा तकन मि पिराथना करके आवुसू।" 33 अना उ पतरस अना याकूब अना योहन ला आपरो सँगा ले गयो, अना लगत बैचेन अना परेसान होवन लगयो, 34 अना ओना उनलक कहीस, "मोरो मन लगत उदास से, यहान तकन की मि मरन पर सेउ, तुमी यहान रुको अना जागत रव्हो।"

35 मंग उ पुढा बढ़यो अना जमीन पर गिरके पिराथना करन लगयो की अदी होय सके ता या घड़ी मोरो पर लक हट जाय, 36 अना कहीस, "ओ परमेस्वर बाबूजी, तोरो लक सब काही होय सकासे, येने दुख को कटोरा ला मोरो जवर लक हटाय ले, ता भी जसो मि चाव्हसु वसो नोको पर जोन तु चाव्हासेस, वाच होय।"

37 मंग उ वापिस आयो अना उनला झोपत पायके पतरस ला कहीस, "हे समौन, तु झोपासेस? का तु जरासी देर भी नही जाग सकयोस तू कोनी काम को नाहत? 38 जागतो अना पिराथना करता रव्हो, की तुमी परिक्सा मा नोको पड़हो, काहेका आतमा ता तैय्यार से पर आँग कमजोर से।"

39 अना उ चलो गयो अखीन ओनो सबद लक पिराथना करीस। 40 मंग आयो ता उनला झोपत पायीस, काहे की उनला जपरी लगी गई होती अना नही जानत होतीन की ओला का जवाब देबिन।

41 मंग तिसरो बार उन ला झोपत चोयीस ता कहीस, "का तुमी अबा तकन जप मा सेव? अना आराम कर रही सेव! अता घड़ी आय पहुचयो, चोवो! मानूस को टूरा बैरीगीन पापी को हात धरायो जाहे। 42 उठो अना चलो! चोवो मोरो धरानवालो जवर आय गई से।"

यीसु ला धोखा लक धरो जावनो

43 उ यो कव्हत च होतो की यूदूस जोन बारा मा लक एक होतो, आपरो सँग मुखिया याजक अना मोसे को नियम को गुरू अना सयानो को कन लक एक मोठी भीड़ लेके गदने पहुचियो जोन्हासीन तलवार अना लाठी धरी होतीन। 44 यूदस ना उनला यो साँगी होतीस की जेनला मि चुम लेहु वाच से, ओला धर लेने।

45 उ आयो, अना गदने ओको जवर जायके कहीस, "हे गुरू!" अना ओला चुमीस। 46 तबा उनना ओला धर लेईन। अना ओला बाँध देईन 47 उनको चेला मा लक एक ना तलवार खीचिस अना मुखिया याजक को दास को कान ला काट देइस। 48 यीसु ना उनलक कहीस "का तुमी मोला डाकु समझके तलवार अना लाठि लयके मोला धरन ला हिटि सेव? 49 मि ता हरपल तुमरो सँग रहयो, अना मंदिर मा सिक्सा देवत रहयो, अना तुमीना मोला नही धर सकयत, पर यो ऐकोलाई भयो की पवितर गीरंथ की गोस्टी पूरी होय।"✝14:49लूका 19:47; 21:37

50 असो होवन पर ओको चेला ओला सोड़के पराय गईन।

51 एक जवान आपरो मलमल को चददर घालयो ओको मंघा चल रहयो होतो, अखीन लोकगीन ओला पकड़नो चाहीन। 52 पर उ मलमल चददर ला छोड़के पराय गयो।

यीसु ला यहुदी की मोठी सभा को पुढा ले जावनो

53 यीसु मुखिया याजक को जवर ले जायो गयो, अना सब मोठा याजक, अना सयाना, अना मोसे को नियम को गुरू, ओको जवर एकठ्ठो भईन। 54 पतरस दुहुर लक चोवके मंघा-मंघा मुखिया याजक को आँगन तकन गयो, अना सिपाही गीनको सँग बसके स्तो तापन लगयो। 55 मुखिया याजक अना यहुदीगीन की मोठी सभा यीसु मारन डाकन लाई ओको विरोध मा पुरुप की खोज मा होतीन पर काही गवाही नही मिलयो। 56 काहेकि वय ओको बारे मा झुठी गवाही देवत होतीन अना उनको गवाही एक दुसरो लक नही मिलत होती।

57 तबा काही लोक जाग के ओको विरोध मा झुठी गवाही देवन लगीन, उनना कहिन, 58 "आमी ना यो सांगतो आयकीसेजन, ‘मि यो हात को बनायो मंदिर ला नास कर देहू, अना तीन दिवस मा दुजो बनाहु। जोन हात लक नही बनो रहेत✝14:58योहन 2:19।’" 59 एतरो मा भी उनको गवाही एक जसो नही होतो।

60 तबा मुखिया याजक ना बीच मा उभो होयके यीसु लक पुसिन, "तु काहे जवाब नही देवासेस? यो लोक तोरो खिलाप मा का गवाही देसेत?"

61 पर उ चुप रहयो, अना काही जवाब नही देइस। मुखिया याजक ना मंग ओला पुसयो, "का तु सब लक मोठो परमेस्वर परम धन्य को टूरा मसीह आस?"

62 यीसु ना कहीस, "मि सेउ, अखीन तुमी मानूस को टूरा ला सब लक ताकत वर परमेस्वर को उज्जो कन बसा, अना बादल को बदली मा आवता चोवो।"

63 तबा मुखिया याजक ना आपरो कपरा फाड़के कहिन "अता आमीला पुरुप को का जरुरत से? 64 तुमीना यो निन्दा आयकासेव, तुमरी का राय से?"

वय सब कव्हन लगीन यो परान दन्ड को लायक से।

65 तबा सिपाही गीन ओको पर थुकन अना टोन्ड ढाकन अना ओला थप्पड़ मारन लगीन अना कव्हन लगीन, "अता जान के साँग, की कोन ना तोला मारिसेस?"

पतरस यीसु को लक मुकर जावनो

66 जबा पतरस आँगन मा उभो होतो, तो मुखिया याजक की एक दासी वहान आयी। 67 अना पतरस स्तो ताप रहयो होतो, ता ओना ओला ध्यान लक चोवीस, तबा कव्हासे, "तु भी यीसु नासरी को सँग होतो।"

68 उ मुकर गयो अना कहीस "मि नही जानु अना नही समझु की तु का कव्हसेस?" मंग उ बाहेर दरवाजा मा गयो अखीन *14:68काही हात लक लिखयो दस्तावेज मा कुकड़ा चिल्लायो असो लिखयो नहात।कुकड़ा ना चिल्लाय देइस।

69 वा दासी ओला चोवके उनलक जो कठा उभा होतीन, मंग कव्हन लगीन "यो उनमा लक एक से।"

70 पर उ मंग मुकर गयो। जरा देर मंघा उनना जो जवर उभा होतीन मंग पतरस लक कहीस, "सही मा तु उनमा लक एक सेस; काहेकि तु भी गलीली सेस।"

71 तबा पतरस ना कहीस, "मि कसम खावसु की अदी मि झुठो कव्हासू ता परमेस्वर मोला सजा दे।"

72 तबा कुकडा ना दुबारा चिल्लाय देइस। पतरस ला उ गोस्टी जो यीसु ना ओला कहि होतीस हेत आई "कुकड़ा को दुई बार चिल्लान को पुढा तु तीन बार मोरो इन्कार करजोस।" अना पतरस आखरी मा सोचिस, की मीना पिरभु को नाव ला मना करीसेव, एकोलाय उ फुट-फुट के रोवन लगयो।