Gênesis 18

అబ్రాహాముకు పో జొర్నుసి బులి వాగ్దానాము.

1 ఈనె మమ్రేపారెతల్ల సిందూర వనమురె అబ్రాహాము కొరబులె బొసద్వారబందం పారె బొస్సికిరి తల్లబులె యెహోవా, తాకు దీదిసి. 2 సే అంకీనె టెక్కికిరి దిగిల బులె తిల్లింకె మనమానె తా అగరె టారెకిరి అచ్చె, సే తంకు దిక్కిరి బొస దారోతీకిరి తంకు మిసిగినితె దోండికిరి, బీకు వంగికిరి, 3 ప్రబువా, తో కటక్సము మోఉంపరె తన్నె యించిని తో దాసుతీకిరి దాటిజేతన. 4 మి కుండె పని దనెపించుచి; దయకొరికిరి గొడ్డెనె దొయిగినికిరి యే గొచ్చొతొల్లె అలసట కడుగునోండి. 5 కుండె కది దనాంచి; తొమ పొర్నునొకు బల పర్చగునోండి; తరువాత తొమె జెవ్వొచ్చు;యడ వల్లరాక మి దాసునిపక్కు అయిమంచె బులి కొయిసె. తంకె తు కొయిల పనికరాక కొరుబులి కొయినాక. 6 అబ్రాహాము గుడారమురె తల్ల సారా పక్కు బేగ జేకిరి తు తొందరగా దీటదొస్టంపరె గుట్టె కేజిలు మెత్తని పిండి దనెకిరి పిస్సికిరి రొట్టినె కొరు బులి కొయిసి. 7 ఈనె అబ్రాహాము పసువూనె మందపక్కు దోండికిరి గుటె బొల్లాట కోలట దూడకు దనెకిరి జొనె పైటిలింకు అప్పగించిసి. సే సడకు బేగగా మోసొ సిద్దపరిచిసి. 8 తరువాత సే వెన్న, దుద్దొకు సే సిద్దము కొరిల దూడకు దనెకిరి తంక ఎదురు నొక్కిరి తంకె కద్ది కై తన్నుగా తంక పారె సే గొచ్చొతొల్లె టారేసి. 9 తంకె, తా సంగరె తో నైపోయీల సారా కెటె? అచ్చి బులి పొచ్చిరిసె. సడుకు అబ్రాహాము సే గొరొ బిత్తరె అచ్చి బులిసి. 10 సడకు సే అయిల యే కలొరాక తొపక్కు కచ్చితముగా యింక అంచీ. సెల్లె తో నైపోయీల సారాకు గుటె పో జొర్నొసి బులి కొయిసి. సారా తా పొచ్చడె తల్ల బొస దోరబందంపారె సునిలీసి. 11 అబ్రాహాము, సారా బడే బూతు కలొ గడిచికిరి మొంత్ర, మొంత్రి యీకిరి అచ్చె. పిల్లనె పైల వయసు తాకు యీజేసి. 12 సారా, మెత్తె బలము జేకిరి తల్ల పారె మెత్తె దేసంగరె మిసల సుకము పొందుగునించి కిర? మో యజమాని మొంత్ర యీకిరి అచ్చిని బులి తా మట్టుకు సే వసిగినిసి 13 సెల్లె యెహోవా అబ్రాహాము సంగరె మొంత్రి యీకిరి తల్లాట మి కచ్చితముగా పైపారి కిర బులి సారా వస్సి నీ? 14 యెహోవాకు అసాద్యమైలాట కిరెనె అచ్చికిర? అయిల యే కలొరె నిర్నయించిల కలొరె తో పక్కు యింక ఆంచి. సెల్లె సారాకు పో జొర్నుసి బులిసి. 15 సారా డొరొ జేకిరి మి వసివి నీ బులి కొయినాక,సెత్తెలె సే వుం తు వసులు బులిసి.

సొదొమ పట్నము గురించి అబ్రాహాము బతిమిలాడివురొ.

16 సెల్లె మనమానె సెట్టెతీకిరి ఉటికిరి సొదొమ ఆడుకు దిగిసె. అబ్రాహాము తంకు పక్కరె దీకిరి పొడిదితె తంక సంగరెంక జేసి. 17 సెల్లె యేహోవా మి కొరివాసె బుల్ల పైటి అబ్రాహాముకు నా కొరుకుంట నుచ్చిదూంచి కిర? 18 అబ్రాహాము కచ్చితముగా బలముగల గొప్ప జనుము వూసె, తా మూలముగా బీ ఉంపరె సొబ్బిలింకు జనుమూనె ఆసీర్వదించబొడుసె. 19 కిరుకుబునె యెహోవా అబ్రాహాముకు గూరించి కొయిలట తాకు కలిగిల పనికిరి తా తరువాత తా పిల్లనుకు తా గొరొ లింకు నీతి న్యాయము కొరుకుంట, యెహోవారొ బట్టొకు సునితె సే తంకు ఆజ్ఞాపించిల పనికిరి మి తాకు అరకగీకిరి అంచి. 20 ఈనె యోహోవా సొదొమ గొమొర్రలకు గూరించి మొర గొప్పట గనకు తాండ్రొ పాపము బోతు బారమైలట గనక, 21 మి ఒల్లిజేకిరి మో పక్కు అయిల సే మొర చొప్పురాక తంకె సంపూర్తిగా కొరిసివొ నివొ దిగిమి; నా కొరినె మి తెలిసిగిమ్మి బులిసి. 22 సే మనమానె సెట్టెతీకిరి బుల్లికిరి సొదొమ అడుకు జేసె, అబ్రాహాము యింక యెహోవా సన్నిదిరె టారికిరి అచ్చె. 23 సెల్లె అబ్రాహాము అయికిరి యాకిరి కొయిసి. దుస్టునెదీకిరి కూడా నీతి మంతునెకు నాసనము కొరుసునా? 24 సే గారె గుటెబులె పంటదొస్ట నీతిమంతునెలింకె తన్నె, తాండెబిత్తరె తల్ల పంటదొస్ట నీతిమంతునె కోసం సే స్తలముకు నాసనము నా కొరుకుంట తాసు నీ కిర? 25 సాకిరాక కొరికిరి దుస్ట మనమానె సంగరెంక నీతిమంతునెకు పొర్నొ కడివిరొ తొత్తె దూరుయీవొ, నీతిమంతుడుకు దుస్టుడు సంగరె సమనాముపని కుజ్జివొరొ తొత్తె దూరు వూసి, లొకొ అల్లకు తీర్పు తీర్చిలాట న్యాయము కొర్నికిర బులి కొయిలబెలె, 26 యెహోవా, సొదొమ గారె పంటదొస్ట నీతిమంతునె మెతె దీదిన్నె తంక వల్లరె సే స్తలముకల్ల క్సమించుంచి బులి కొయిసి. 27 సడకు అబ్రాహాము యిత్తొ దూలి, పోసొపని తల్లాట మి ప్రబువు సంగరె కొతలగివొరొ దైర్యంకొరిసి. 28 పంటదొస్ట నీతిమంతునెరె గుటెబెలె పంచిలింకె తక్కువ యీనె, పంచిలింకె తక్కువ యీలంద్రె సే పట్నము కల్ల నాసనము కొరుసు కిర బులి యింక పొచ్చిరిసి, సడకు సే సెట్టె చార దొస్ట పంచిలింకె మెత్తె దీదిన్నె నాసనము కొర్ని బులి కొయిసి; 29 సే ఇంక తా సంగరె కొతలక్కుంట గుటెబెలె సెట్టె చారదొస్టొ లింకెంక దీదుసికీవొ బులి కొయిలబెలె, సే చారదొస్టలింకు బట్టి నాసనము నా కొరుకుంట తాంచిబులి కొయినాక, 30 సే ప్రబువు నా రగ్గొపొన్నె మి కొతలగుంచి; గుటెబెలె సెట్టె తింట దొస్టలింపరె దీట మంది దీదుసి కివొ కొయిలబెలె సే సెట్టె తింటదొస్టంపరె దీట మంది మెత్తెదీదిన్నె నాసనము కొరిని బులి కొయిసి. 31 సడకు సే యిత్తొ ప్రబువు సంగరె కొతలగివురొ తెగించిచి; గుటెబెలె ఇరువది మంది దీదిన్నె బులి కొయిలబెలె, సే ఇరువై మంది బట్టి నాసనము కొర్నిబులి కొయినాక, 32 సే ప్రబువు నా రగ్గొపొన్నె మి యింక గుటె సారక కొతలగుంచి; గుటెబెలె సెట్టె దొస్టలింకె దీదుసి కీవొబులి కొయిలబెలె సే, దొస్టలింకె బట్టి నాసనము కొర్నిబులి కొయిసి. 33 యెహోవా అబ్రాహాము సంగరె కొతలగివొరొ ఆపికిరి బాజెల్ల. అబ్రాహాము తా గొట్టికి బుల్లికిరి బాజేసి.