1 యెహోవా సే కొయిల చొప్పురె సారాకు మిసిల. యెహోవా సె దిల్ల కొత బట్టి సారాగూరించి కొరిసి. 2 క్యాకిరిబుల్నే పురువు అబ్రాహాము సంగరె కొయిల నిర్నయించిల కలొరె సారా సుచ్చమనమ యీకిరి తా మొంత్రి బులె తాకు పోకు జొర్నొదీసి. 3 సెల్లె అబ్రాహాము తా నైపో సార సంగరె తాకు జొర్నొ దిల్లట తా పోకు ఇస్సాకు బులి నా నొగిసి 4 ఈనె పురువు అబ్రాహాముకు ఆజ్ఞాపించిల చొప్పురె సే అట్ట దినొత యీలబులె ఇస్సాకు బులి తా పోకు సున్నతి కొరసి. 5 అబ్రాహాము పో యీల ఇస్సాకు తాకు జొర్నిల బులె సే సొయి బొచ్చొరొనె గలట. 6 "సెల్లె సారా పురువు మెతె వసవిరొ కలిగిదీసి". 7 ఈనె సారా పిల్లనెకు దుద్దొ దూసిబులి కేసె అబ్రాహాము సంగరె కోసె? మి తాకు మొంత్ర బులె పోకు జొర్నొదీంచినీ కిర బులిసి. 8 సే కుర్ర బొడికిరి దుద్దొ సడిదీసి. ఇస్సాకు దుద్దొ సడిదిల్ల దినొరె అబ్రాహాము గొప్ప విందు కొరిసి.

9 సెల్లె అబ్రాహాముకు అయిగుప్తు రొజాయీల హాగరు జొర్నొదిల్ల పోకు కుడిసాలు లగివిరొ సారా దిక్కిరి. 10 యే దాసికి తా పోకు గొడ్డిదె; యే దాసిపో, మో పోయీల ఇస్సాకు సంగరె వారసుడు యీకిరి తన్ని బులి అబ్రాహాము సంగరె కొయిసి. 11 తా పో బట్టి సే కొత అబ్రాహాముకు చాల దుక్కము కలిగిసి. 12 ఈనె పురువు యే సన్ని కుర్ర బట్టి తో దాసుని బట్టి తు దుక్కపొడితి నా. సారా తో సంగరె కొయిల ప్రతి విసయమురె తా కొత సును; ఇస్సాకువల్డరె యీలటాక తో సంతానము. 13 ఈనెను యే దాసిరొ పో, తో సంతానమాక గనక సేకూడ గుటె జనముగా కొరుంచి బులి అబ్రాహాము సంగరె కొయిసి. 14 కాబట్టి సొక్కలపైల బులె అబ్రాహాము ఉటికిరి కద్ది, పని తిత్తిని కడిగినికిరి సే కుర్ర సంగరెంక హాగరుకు అప్పగించికిరి సే మొట్ట కందొ ఉంపరె సడనుకు నొక్కిరి సే మొట్టకు పొడిదిపేసి. 15 సే తిత్తిరె పని యీజెల్ల బెలె సే మొట్ట గుటె పొద తొల్లె సే సన్ని కుర్రకు పొక్కిదీకిరి, 16 యే సన్ని కుర్రరొ మొర్నొ దిగినారి బులి కొయిగినికిరి, కుండె దూరు జేకిరి తాకు ఎదురుగా బొస్సి. సే మొట్ట ఎదురగా బొస్సికిరి బొట్ట కేకా పొక్కుంట కందిసి. 17 పురువు సే సన్నికుర్ర మొర సునిసి. సెల్లె పురువురొ దూత మెగొ తీకిరి హాగరుకు డక్కికిరి హాగరు తొత్తె కిర యీసి? డొరితినా; సే సన్నికుర్ర తల్ల చోటు పురువు తా మొర సునికిరి అచ్చి. 18 తు ఉటికిరి సే సన్ని కుర్రకు టెక్కిగినికిరి తో అత్తొరె దరుగును.; తాకు గొప్ప జనుము కొరిమి బులి సే మొట్ట సంగరె కొయిసి.

19 ఈనె పురువు సే మొట్టరొ అంకీనె పిటిలందిరె సే మొట్ట పని ఊట దిక్కిరి జేకిరి సే తిత్తిరె పని సంగరె పూరిదీకిరి సే సన్ని కుర్రకు పీపించిసి. 20 పురువు సే సన్ని కుర్రకు తోడికిరి అచ్చి. సే సన్ని కుర్ర బొడికిరి బొట్ట యీకిరి సే బొనొరె జీతైకిరి విల్లు విద్యారె ఆరితేరిసి. 21 సే పారాను బొనొరె తల్ల బెలె తా మా అయిగుప్తు తీకిరి గుటె తిల్డ్ర మొట్టకు కొడిగినికిరి అయికిరి తాకు బ్యా కొరిసి.

22 సే కలొరె అబీమెలెకు తా సేనాదిపతి యీల పీకోలుకు అబ్రాహాము సంగరె కొత లక్కిరి తు కొరిల పైటినె బిత్తరల్ల పురువు తొత్తె తోడుకిరి అచ్చి గనక, 23 తు మెతె యీనెను మో పోన్రె పోనె యీనెను నా నసించికుంట, మి తొత్తె కొరిల ఉపకారము చొప్పురె మెత్తె ఇంక తు పరదేసి యీకిరి తల్ల యే దెసొకు కొరిమి బులి పురువురొ నారె ఎట్టె మో సంగరె సొత్తొ కొరుబులి కొయిసి. 24 సడకు అబ్రాహాము సొత్తొ కొరుంచి బులి కొయిసి. 25 అబీమెలెకు దాసునె బలాత్కాముగా కడిజేకిరి పని సో విసయమురె అబ్రాహాము, అబీమెలెకు యే పైటి కేసె కొరిసివొ మెతె అరక నీ; 26 తువ్వంకా మో సంగరె కొయిలాని; మిత్తె ఆజాక యే సంగీతినె అరికైసి. 27 అబ్రాహాము గొర్రినుకు, ఎడ్లకు దనెపించికిరి అబీమెలెకుకు దీసి. తంకె దీలింకె యాకిరి గుటె నిబందన కొరిగినిసె. 28 తరువాత అబ్రాహాము తా గొర్రినె మందరెతీకిరి సత్ర తిల్డ్రగొర్రినె వేరె నొగిసి. 29 అబీమెలెకు అబ్రాహాము సంగరె తు ఏరుగా నొగిల యే సత్ర గొర్రిపిల్లనె కైంకీ బులి పొచ్చిరిసి. సడకు సే, 30 మి యే సో కులిపించిలందుకు మో సాక్సాముకు యే సత్ర గొర్రిపిల్లానెకు తు మో సంగరె కడుగును బులి కొయిసి. 31 సెట్టె తంకె దీలింకె సాకిరి ప్రమానము కొరిగిలందుకు సే చోటు బెయేర్సెబా* బులి కోసె. 32 బెయేర్సెబారె తంకె గుటె నిబందన కొరిగిల్ల తరువాత అబీమెలెకు ఉటికిరి తా సేనాదిపతియీల పీకోలు సంగరె పిలిస్తిన్రె దెసొకు బుల్లికిరి బాజేసె. 33 అబ్రాహాము బెయేర్సెబారె గుటె పిచుల గొచ్చొ పొక్కిరి సెట్టె నిత్య పురువుయీల యెహోవా నారే ప్రార్దనకొరిసి. 34 అబ్రాహాము పిలిస్తీన్రె దెసొరె కెత్తొ దినొనె పొదరె దెసొత పనికిరి అచ్చి.